ដោយ ដែន ចែងចាំង
ភ្នំពេញ៖ ទម្រង់ធុរកិច្ច ដែលផ្តល់សេវាបដិសណ្ឋារកិច្ចប្រកបដោយភាពកក់ក្តៅថ្មីមួយ នៃគំរោង Silver Town កំពុងទទួលបានជោគជ័យនៅរាជធានីភ្នំពេញ បន្ទាប់ពីគំរោងនេះបានក្លាយជាទីតាំង ដើម្បីផ្តល់ទីកន្លែងស្នាក់នៅដល់ភ្ញៀវទេសចរណ៍ និងអ្នកស្វែងរកការធ្វើធុរកិច្ចមានអារម្មណ៍ដូចជាស្នាក់នៅផ្ទះរបស់ពួកគេ។
អគ្គនាយកក្រុមហ៊ុន NAKI GROUP លោក មាស ង៉ែតវាសនា ដែលជាក្រុមហ៊ុនគ្រប់គ្រងគំរោងនេះបានថ្លែងថា យើងជាក្រុមហ៊ុននាំមកនូវទស្សនទាននៃការវិនិយោគថ្មីនេះដំបូងគេនៅរាជធានីភ្នំពេញ តាមរយៈការផ្តល់សេវាកម្ម ពីក្រុមហ៊ុនជំនាញមកពីសហរដ្ឋអាមេរិក ដែលបានចូលរួមសហការ ដើម្បីផ្តល់សេវាកម្មគ្រប់គ្រងប្រកបដោយភាពកក់ក្តៅ និងច្នៃប្រឌិតដល់អតិថិជន។
លោកបន្តថា “សេវា Condo-Tel នឹងជាសេវាមានលក្ខណៈចម្រុះដែលរួមបញ្ជូលនូវសេវាកម្មខុនដូ ដោយក្នុងចំណោមផ្ទះ១១០យូនីត នៅក្នុងអគារ Silver Town នឹងត្រូវប្រើប្រាស់ ៥០ភាគរយជា Condo-Tel និង ៥០ភាគរយជាខុនដូ”។
លោកបន្តថា “ខ្ញុំជឿជាក់ថាគម្រោងនេះនឹងទទួលបានជោគជ័យ ដោយយើងផ្តោតសំខាន់លើអតិថិជនជាអ្នក Business Travelling និងអតិថិជន ដែលត្រូវការសេវាស្នាក់នៅមានលក្ខណៈជាឯកជន”។
សេវាកម្ម Condo-Tel ជាសេវាមានភាពស្រដៀងគ្នានឹងសណ្ឋាគារ ប៉ុន្តែការរៀបចំសេវាបែបនេះ គឺធ្វើយ៉ាងណាឲ្យភ្ញៀវមានអារម្មណ៍ថា ដូចជាផ្ទះទី២ របស់ពួកគេដោយពួកគេអាចចម្អិនអាហារបានដោយខ្លួនឯង អាចរៀបចំតុបតែងបន្ទប់របស់ពួកគេ និងពួកគេទទួលបានសេវាកម្ម និងការបំពាក់សម្ភារៈប្រើប្រាស់គ្រប់មុខ រួមទាំងកន្លែងហាត់ប្រាណ អាងហែលទឹក សេវាកម្មសម្អាត ភោជនីយដ្ឋាន សេវាម្ហូបអាហាររយៈពេល២៤ម៉ោងជាដើម។
លោក មាស វាសនាបានបន្តថា “យើងបានគិតពីស្តង់ដារ និងរៀបចំទទួលបដិសណ្ឋារកិច្ចភ្ញៀវបែបណា ដើម្បីពេលពួកគេមកដល់ទីតាំងរបស់យើង ពួកគេទទួលបានអារម្មណ៍ កក់ក្តៅ និងប្រកបដោយផាសុខភាពខ្ពស់”។
តម្លៃស្នាក់នៅក្នុង Condo-Tel ដែលមានការរៀបចំសេវាកម្មដូចសណ្ឋាគារផ្កាយប្រាំមានតម្លៃបន្ទប់ចន្លោះពី១៤០ទៅ១៥០ដុល្លារក្នុងមួយយប់។ លោកវាសនាបានបន្តថា សេវាកម្ម Condo-Tel បានចាប់ផ្តើមនៅកម្ពុជារួចហើយ ប៉ុន្តែនៅមានតិចនៅឡើយនៅទីក្រុងភ្នំពេញ“ដូច្នេះយើងមិនបារម្ភពីការប្រកួតប្រជែងនោះទេ ផ្ទុយទៅវិញយើងជឿជាក់ថា នឹងទទួលបានជោគជ័យ ព្រោះសេវាកម្មបែបនេះនឹងមានលក្ខណៈល្អប្រសើរនាពេលអនាគត”។
លោក ហូ វណ្ឌី អគ្គលេខាធិការសម្ព័ន្ធសមាគមទេសចរណ៍ជាតិកម្ពុជា បានថ្លែងថា សេវាកម្ម Condo-Tel ជាសេវាកម្មថ្មីសម្រាប់កម្ពុជា ប៉ុន្តែវាជាសេវាចាស់នៅប្រទេសរីកចម្រើននានា ប៉ុន្តែសេវាកម្មនេះនឹងមានការរីកចម្រើនខ្លាំងនៅកម្ពុជា ក្រោយពេលគេយល់ច្បាស់ពីវិស័យនេះ ពិសេសពេលកម្ពុជាធ្វើការរៀបចំហេដ្ឋារចនាសម្ព័ន្ធ និងសន្តិសុខបានល្អប្រសើរ នឹងមានភ្ញៀវបុកចូលមកច្រើន ដោយសារការធ្វើសមាហរណកម្មអាស៊ាន។
លោកបន្តថា “សេវាកម្ម Condo-Tel ជាសេវាកម្មស្នាក់នៅរយៈពេលខ្លី និងវែង ដែលមានលក្ខណៈគ្រួសារ ឬជាបុគ្គល ដែលពួកគេអាចចម្អិនអាហារ អាចរៀបចំតុបតែងដាក់រូបថត ឬសម្ភារៈប្រើប្រាស់នៅក្នុងបន្ទប់ស្នាក់នៅរបស់ពួកគេ ប្រៀបបី ដូចជាផ្ទះរបស់ពួកគេបាន ប៉ុន្តែភ្ញៀវមិនអាច ផ្លាស់ប្តូរទម្រង់ដើមនៃបន្ទប់របស់ពួកគេនោះទេ”។
លោកបន្តថា “សេវាកម្មនេះទើបចាប់ផ្តើមនៅកម្ពុជា ប៉ុន្តែវានឹងមានការរីកចម្រើនខ្លាំងនាពេលអនាគត ព្រោះការធ្វើសមាហរណកម្មអាស៊ាន អាចមានភ្ញៀវធ្វើដំណើរជាលក្ខណៈគ្រួសារ ឬឯកជន ពួកគេត្រូវការសេវាបែបនេះ”៕
