ជនបរទេសចាប់ផ្តើមដណ្តើមទីផ្សារគ្នានៅខេត្តព្រះសីហនុ

ដោយឡែកជនបរទេស ដែលកំពុងស្នាក់នៅប្រកបអាជីវកម្មខេត្តព្រះសីហនុមានចំនួន១៥ សញ្ជាតិ ដូចជា អាឡឺម៉ង់ អ៊ីតាលី ហ្វីលីពីន ទួកគី អូស្ត្រាលី ឥណ្ឌា ឥណ្ឌូនេស៊ី អ៊ីស្រាអែល ជប៉ុន បារាំង ចិន រុស្សី អាមេរិក អង់គ្លេស និងកូរ៉េ។ ក្នុងចំណោមណ្តាជនជាតិទាំងនេះ ជនជាតិចិនមានចំនួនច្រើនជាងគេ និងមួយចំនួនកំពុងតែប្រកបអាជីវកម្មខ្នាតតូច ដូចជា កាត់សក់ លក់គ្រឿងទេស លក់គ្រឿងសំណង់ ម្ហូបអាហារ បន្លែ និងផ្លែឈើ ប្តូរប្រាក់ និងអាហារដ្ឋាន ដែលបានបង្កជាក្តីកង្វល់ដល់ប្រជាពលរដ្ឋនៅមូលដ្ឋានដែលប្រកបមុខរបរខាងលើនោះ។

ឆ្លើយតបនឹងបញ្ហានេះ កិច្ចប្រជុំបានពិនិត្យ និងពិភាក្សាទៅលើលិខិតបទដ្ឋានច្បាប់ដែលពាក់ព័ន្ធនានា ក្នុងនោះ រួមមានកញ្ចប់សន្យារបស់កម្ពុជា ក្នុងក្របខ័ណ្ឌអង្គការពាណិជ្ជកម្មពិភពលោក កិច្ចព្រមព្រៀងអាស៊ាន-ចិន ច្បាប់ស្តីពីការងារច្បាប់អន្តោប្រវេសន៍ ព្រមទាំងលិខិតបទដ្ឋានគតិយុត្តិដទៃទៀតដែលពាក់ព័ន្ធ។

លោកសុខ សុភ័ក្រ្តបានលើកឡើង អំពីយន្តការច្បាប់ជាតិ និងអន្តរជាតិរបស់មន្ត្រីជំនាញ និងអាជ្ញាធរមូលដ្ឋាននៅមានកម្រិត កង្វះខាតបទប្បញ្ញតិ្តជាតិ សម្រាប់គ្រប់គ្រងជនបរទេស ក្នុងការធ្វើអាជីវកម្មខ្នាតតូច និងការកំណត់មុខរបរនៅកម្ពុជា  និងភាពនៅមានកម្រិតនៃការផ្លាស់ប្តូរព័ត៌មានរវាងអន្តរក្រសួង ស្ថាប័នជំនាញពាក់ព័ន្ធជាមួយនឹងរដ្ឋបាលថ្នាក់ក្រោមជាតិ គឺជាកត្តាចម្បងដែលធ្វើឲ្យបញ្ហាដែលបានលើកឡើងខាងលើនេះ នៅមិនទាន់មានការដោះស្រាយបានពេញលេញនៅឡើយ។

កិច្ចប្រជុំនេះ បានឯកភាពលើដំណោះស្រាយបឋមមួយចំនួន ដូចជា បង្កើនការផ្សព្វផ្សាយ និងអនុវត្តលិខិតបទដ្ឋានច្បាប់ យកចិត្តទុក​ដាក់តាមដានស្ថានការណ៍ជាប្រចាំ បង្កើតឲ្យមានមន្ត្រីបង្គោលសម្របសម្រួលអន្តរក្រសួង-ស្ថាប័ន បង្កើនការចែករំលែកព័ត៌មាន និងផ្សព្វផ្សា​យច្បាប់ពាក់ព័ន្ធដល់មន្ត្រីមូលដ្ឋាន ព្រមទាំងពិនិត្យលទ្ធភាពកំណត់ ឬបង្កើតបទប្បញ្ញត្តិថ្មី លើការកំណត់មុខរបរតូចតាច។ ស្តង់ដាសម្រាប់ការស្នាក់នៅ ការគ្រប់គ្រងចលនាចេញ-ចូលនៃជនបរទេសជាដើម៕