ដោយ គង់ សូរិយា
ភ្នំពេញ៖ ស្ងាត់ៗ អាគារការិយាល័យ Hyundai Phnom Penh Tower ត្រូវបានដូរឈ្មោះ បន្ទាប់ពីអាគារនេះត្រូវបានទិញយកដោយក្រុមហ៊ុន Prince Real Estate Group ។
អាគារ Hyundai Phnom Penh Tower ត្រូវបានប្តូរឈ្មោះមកជា Prince Phnom Penh Tower បន្ទាប់ពីក្រុមហ៊ុនអចលនទ្រព្យយក្សរបស់ប្រទេសចិន គឺ Prince Real Estate Group បានទិញយក។
អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានមានប្រសាសន៍ឲ្យដឹងតាមទូរស័ព្ទនៅព្រឹកថ្ងៃទី១ កុម្ភៈនេះថា ការផ្លាស់ប្តូរឈ្មោះអាគារនេះ បានចាប់ផ្តើមប្រហែលពីរខែមុន បន្ទាប់ពីអាគារនេះត្រូវបានទិញដោយក្រុមហ៊ុនPrince ប៉ុន្តែក្រុមហ៊ុន CBRE Cambodia ជាអ្នកគ្រប់គ្រងអាគារនេះ ទាំងពេលអាគារនេះគ្រប់គ្រងដោយក្រុមហ៊ុន Hyundai និងពេលអាគារនេះត្រូវបានទិញដោយក្រុមហ៊ុន Prince Real Estate Group។
អ្នកនាងបន្តថា “អាគារកំពស់២២ជាន់នេះ មានទំហំសរុប២៥,០០០ម៉ែត្រការ៉េ ប៉ុន្តែផ្ទៃក្រឡាខាងក្នុង និងប្រើប្រាស់ពេញលេញមានទំហំតែ២០,០០០ម៉ែត្រការ៉េប៉ុណ្ណោះ”។អ្នកនាងបន្តថា “វាជាអាគារការិយាល័យកម្រិត B Plus និងដាក់ជួលក្នុងតម្លៃ២៣ដុល្លារក្នុងមួយម៉ែត្រការ៉េ”។
អាគារ Prince Phnom Penh Tower មានទីតាំងស្ថិតនៅស្របតាមបណ្តោយមហាវិថីព្រះមុនីវង្ស ស្ថិតក្នុងសង្កាត់វាលវង់ ខ័ណ្ឌ៧ មករា។
អាគារការិយាល័យដ៏ប្រណីតនេះ បានបញ្ចប់និងដាក់ឲ្យដំនើរការកាលពីខែ មេសា ឆ្នាំ២០១១៕នេះបើតាមការឲ្យដឹងពីអ្នកនាងអាន សុធីតា៕
