ដោយ ៖ រ៉ាណេត
ភ្នំពេញ៖ បណ្តាក្រុមហ៊ុន រោងចក្រ និងសហគ្រាសធំៗជាង២០ ដែលមានទីស្នាក់ការកណ្តាលនៅប្រទេសកូរ៉េ និងធ្លាប់មានគម្រោងធ្វើការវិនិយោគទៅកាន់ប្រទេសវៀតណាមកាលពីពេលកន្លងទៅនោះ ពេលនេះបានបង្ហាញពីចំណាប់អារម្មណ៍ចង់បង្វែរគោលដៅរបស់ខ្លួនមកកាន់ប្រទេសកម្ពុជាវិញនៅពេលឆាប់ខាងមុខនេះ។
បន្ទាប់ពីបានឆ្លងកាត់កិច្ចពិភាក្សាលើមុខជំនួញ ដែលបង្ហាញពីកាលានុវត្តភាព និងឱកាសវិនិយោគនៅកម្ពុជាក្នុងវិស័យឯកជន តាមរយៈកិច្ចជំនួបសភាពាណិជ្ជកម្មកម្ពុជា និងអ្នកតំណាងប្រតិភូវិនិយោគកូរ៉េ កាលពីថ្ងៃទី២៧ ខែវិច្ឆិកា ឆ្នាំ២០១៩ នៅទីក្រុងប៊ូសាន ប្រទេសកូរ៉េ ជាលទ្ធផល កម្ពុជាទទួលបានចំនាប់អារម្មណ៍ពីសំណាក់បណ្តាអ្នកវិនិយោគ និងអ្នកតំណាងក្រុមហ៊ុនធំៗជាច្រើន ដូចជាក្រុមហ៊ុនអ៊ីហ្គេនតិចសាជីវកម្មលីជុនហូ ក្រុមហ៊ុនមហ៊ុន Dawonsys Park Soon-sun និងនាយកសហព័ន្ធអចលនទ្រព្យពិភពលោកផងដែរ។
អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី បានមានប្រសាសន៍ប្រាប់តាមរយៈបណ្តាញសារអេឡិចត្រូនិកកាលពីល្ងាចថ្ងៃទី២៨នេះថា តាមរយៈនៃកិច្ចជំនួបពិភាក្សាស្ដីពីកិច្ចសហប្រតិបត្តិការសេដ្ឋកិច្ចក្នុងវិស័យការទូតឯកជនខាងលើនេះ យើងទទួលបានផលល្អជាច្រើន ដោយមានបណ្តាក្រុមហ៊ុន និងរោងចក្រ សហគ្រាសជាច្រើនបង្ហាញពីចំណាប់អារម្មណ៍ចូលមកវិនិយោគនៅកម្ពុជា។
លោកឧកញ៉ា នួន រិទ្ធី បានមានប្រសាសន៍ប្រាប់ថា “ក្រោយកិច្ចជំនួបពិភាក្សា មានក្រុមហ៊ុន រោងចក្រ និងសហគ្រាសសរុបចំនួន២១ ដែលមានប្រភពដើមនៅក្នុងប្រទេស និងធ្លាប់មានគម្រោងវិនិយោគនៅក្នុងប្រទេសវៀតណាមកាលពីពេលកន្លងទៅនោះ ពួកគាត់បានបង្ហាញពីចំណាប់អារម្មណ៍ចង់បង្វែរទិសដៅវិនិយោគទាំងនោះមកកានើកម្ពុជាវិញ”។
លោកឧកញ៉ាបានបន្តទៀតថា “ក្រុមហ៊ុនកូរ៉េ ដែលមានបំណង់ចង់មកវិនិយោគនៅក្នុងប្រទេសកម្ពុជា ជាប្រភេទរោងចក្រតម្លើងគ្រឿងបង្គុំរថយន្ត គ្រឿបរិក្ខារថយន្តដើរដោយថាមពលអគ្គិសនី និងក្រុមហ៊ុនដែលធ្វើការអភិវឌ្ឍក្នុងវិស័យអចលនទ្រព្យផងដែរ”។
លោកបានបន្តទៀតថា “ការបង្វែរគោលដៅបណ្តាក់ទុនវិនិយោគទាំងនេះ ក៏ព្រោះតែពួកគេបានសិក្សា និងស្វែងយល់បន្ថែមពីសក្ដានុពលនៅក្នុងប្រទេសកម្ពុជា ប៉ុន្តែក៏មានការស្នើសុំឱ្យមានការចូលរួមសម្របសម្រួលវិស័យឯកជនពីសំណាក់រាជរដ្ឋាភិបាលផងដែរ ទាំងការសម្របសម្រួលច្បាប់វិនិយោគ និងការកំណត់ទីតាំងផងដែរ ដើម្បីធានាថាការវិនិយោគអាចមានភាពល្អប្រសើរ”។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេង បានបង្ហាញពីក្ដីសាទរចំពោះការទទួលបានចំណាប់អារម្មណ៍ពីបណ្តាវិនិយោគិនកូរ៉េខាងលើនេះ។ លោកបានមានប្រសាសន៍តាមទូរស័ព្ទកាលពីល្ងាចថ្ងៃជាមួយគ្នាននេះថា “ក្នុងនាមជាសភាពាណិជ្ជកម្មកម្ពុជា គឺមានគោលជំហរជួលសម្រួលរាល់ការវិនិយោគទាំងអស់នៅក្នុងប្រទេស ដែលមិនត្រឹមតែប្រទេសកូរ៉េតែមួយនោះទេ ពោលគឺជួយសម្រួលគ្រប់ភាគីទាំងអស់”។
លោកបានបន្តទៀតថា “សព្វថ្ងៃនេះ យើងមានក្រុមការងាររហូតដល់១៣ ដែលរង់ចាំដោះស្រាយការលំបាករបសើវិស័យឯកជនដែលមកវិនិយោគនៅកម្ពុជា ដោយការលើកយកបញ្ហាដោះស្រាយជាមួយរដ្ឋមន្ត្រីក្រសួងដែលពាក់ព័ន្ធ ហើយក្នុងករណីដែលដោះស្រាយមិនចេញទេ នឹងបញ្ជូនទៅដល់នាយករដ្ឋមន្ត្រី ដើម្បីអន្តរាគមន៍ និងដោះស្រាយបន្ត”។
លោកឧកញ៉ាបានបន្តទៀតថា “ក្នុងនាមជាសភាពាណិជ្ជកម្ម សូមលើកទឹកចិត្តទៅដល់បណ្តាអ្នកវិនិយោគមកពីបណ្តាប្រទេសនានាទាំងអស់មកកាន់កម្ពុជា ជាមួយនឹងការព្យាយាមជួយសម្រួលសម្រួលនូវរាល់បញ្ហាប្រឈមនានាដែលកើតមាន ដើម្បីអាចទទួលបានភាពរីកចម្រើន និងអភិវឌ្ឍន៍រួមគ្នា” ៕
