ដោយ វុត្ថា
ភ្នំពេញ៖ ក្រុមអ្នកវិនិយោគមកពីខេត្តសានស៊ី នៃសាធារណរដ្ឋប្រជាមានិតចិនបន្តចុះស្វែងរកឱកាសបណ្តាក់ទុនវិនិយោគនៅក្នុងខេត្តសៀមរាប ដែលជាខេត្តមានសក្តានុពលខ្ពស់លើវិស័យទេសចរណ៍វប្បធម៌។
លោក Wu Fujie អនុប្រធាន នៃក្រុមការងារលើកកម្ពស់ពាណិជ្ជកម្មខេត្តសានស៊ី នៅក្នុងជំនួបជាមួយលោក ស្រី លោកស្រី យូ សុភា អភិបាលរងខេត្តសៀមរាប កាលពីថ្ងៃទី ១ ខែធ្នូម្សិលមិញនេះបានឱ្យដឹងថា ក្នុងការដឹកនាំគណៈប្រតិភូខេត្តសានស៊ីមកបំពេញដំណើរទស្សនកិច្ចមកកាន់ខេត្តសៀមរាបនាពេលនេះដែរ ក្នុងគោលបំណងពង្រឹងលើកកម្ពស់កិច្ចសហប្រតិបត្តិការលើវិស័យពាណិជ្ជកម្ម និងស្វែងរកការវិនិយោគក្នុងខេត្តសៀមរាប។
លោកបន្តថា ខេត្តសៀមរាបមានសក្តានុពលខ្ពស់ចំពោះការវិនិយោគលើវិស័យទេសចរណ៍ បដិសណ្ឋារកិច្ច សេវាកម្ម និងវិស័យផ្សេងៗទៀត និងបង្កើតមិត្តភាព ព្រមទាំងកិច្ចសហប្រតិបត្តិការស្របតាមគោលនយោបាយ ផ្លូវ និងក្រវ៉ាត់របស់ប្រធានាធិតីចិន ស៊ី ជិនពីន និងស្របតាមទំនាក់ទំនងដ៏ល្អរវាងរដ្ឋាភិបាលនៃប្រទេសទាំងពីរ។
លោកស្រី យូ សុភា អភិបាលរងខេត្តសៀមរាប បានឱ្យដឹងថា រដ្ឋបាលខេត្តសៀមរាប ក៏ស្វាគមន៍ដល់វិនិយោគចិនដែលមានបំណងចង់មកវិនិយោគនៅខេត្តសៀមរានផងដែរ។
លោកស្រីបន្តថា ខេត្តសៀមរាបមានសក្តានុពលលើវិស័យទេសចរណ៍ និង កសិកម្ម ហើយក្រៅពីតំបន់ប្រាសាទ ខេត្តសៀមរាបក៏មានតំបន់រមណីយដ្ឋានធម្មជាតិ ព្រមទាំងមានរៀបចំនូវគម្រោង ក្នុងការពង្រីកតំបន់អេកូទេស ចរណ៍ នៅតាមបណ្តាស្រុកមួយចំនួន ជាអេកូទេសចរណ៍ធម្មជាតិ និងកសិទេសចរណ៍ ក្នុងការទាក់ទាញភ្ញៀវចូលមកទស្សនា និងស្នាក់នៅបានយូរថ្ងៃផងដែរ។
លោកស្រីបន្ថែមថា ហើយអាជ្ញាធរខេត្ត ក៏មានតម្រូវការចំពោះអ្នកវិនិយោគលើវិស័យទេសចរណ៍នេះ ព្រោះថាទោះបីហេដ្ឋារចនាសម្ព័ន្ធវិស័យទេសចរណ៍មានការរីកចម្រើននៅក្នុងក្រុងសៀមរាប ក៏ពិតមែន ប៉ុន្តែនៅមិនទាន់បានបំពេញនូវតម្រូវការចាំបាច់របស់ភ្ញៀវនៅឡើយ ជាពិសេសនៅពេលមានបុណ្យទានម្តងៗ។
រដ្ឋាភិបាលកម្ពុជាបានចាត់ទុកខេត្តសៀមរាបជាប៉ូលសេដ្ឋកិច្ចលំដាប់ទី ៣ បន្ទាប់ពីរាជធានីភ្នំពេញ ខេត្តកំព្រះសីហនុ ដែលបានផ្តល់ឪកាសវិនិយោគលើគ្រប់ផ្នែកជាច្រើនដល់អ្នកវិនិយោគិនជាតិ និងអន្តរជាតិ ដែលមានបំណងវិនិយោគនៅក្នុងខេត្តប្រវត្តិសាស្ត្រមួយនេះ៕
