ដោយៈ រ៉ាណេត
ភ្នំពេញៈ តាមរយៈឯកអគ្គរដ្ឋទូតប្រចាំកម្ពុជា សហរដ្ឋអាមេរិក បានបង្ហាញពីគោលបំណង់រឹតបណ្តឹងចំណងមិត្តភាពការទូត និងសហប្រតិបត្តិការជាមួយកម្ពុជា លើការពង្រឹងវិស័យឌីជីថល ឱ្យកាន់តែមានភាពល្អប្រសើរថែមទៀត ខណៈដែលវិស័យមួយនេះមានសារសំខាន់ នៅក្នុងការជួយបង្កើនកំណើន និងគ្រប់គ្រងចំណូលសេដ្ឋកិច្ចជាតិយ៉ាងសំខាន់។
លោក W. Patrick Murphy ឯកអគ្គរដ្ឋទូតសហរដ្ឋអាមេរិកប្រចាំកម្ពុជាបានមានប្រសាសន៍ក្នុងជំនួបជាមួយលោកត្រាំ អ៊ីវតឹករដ្ឋមន្រ្តីក្រសួងប្រៃសណីយ៍ និងទូរគមនាគមន៍កាលពីថ្ងៃទី៤ ធ្នូកន្លងមកថា គោលបំណងរបស់លោកនៅក្នុងការចូលជួបនេះ គឺដើម្បីពង្រឹងកិច្ចសហប្រតិបត្តិការ ក្នុងវិស័យឌីជីថលរវាងសហរដ្ឋអាមេរិក និងព្រះរាជាណាចក្រកម្ពុជា ឱ្យកាន់តែល្អប្រសើរឡើងថែមទៀត ដោយលោកបានវាយតម្លៃខ្ពស់ ចំពោះការរីកលូតលាស់នៃវិស័យទូរស័ព្ទចល័តនៅកម្ពុជា។
លោកបញ្ជាក់ថា “កម្ពុជា គឺជាប្រទេសមួយស្ថិតក្នុងចំណោមប្រទេសនាំមុខ ដែលមានអ្នកប្រើប្រាស់ទូរស័ព្ទច្រើនជាងគេនៅក្នុងតំបន់ ហើយកម្ពុជាក៏ជាប្រទេសមួយដែលមានកិច្ចសហការល្អរវាងក្រសួង និងក្រុមប្រឹក្សាធុរកិច្ចអាស៊ាន-សហរដ្ឋ អាមេរិក ហៅកាត់ (USABC) នាពេលកន្លងមក”។ លោកបន្តថា “សហរដ្ឋអាមេរិករំពឹងថានឹងមានការិយាល័យតំណាង USABC នៅកម្ពុជានាពេលខាងមុខ ហើយការទំនាក់ទំនងរវាងប្រទេសទាំងពីរ នឹងកាន់តែត្រូវបានពង្រឹង និងពង្រីកទ្វេរឡើងថែមទៀត”។
រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ត្រាំ អ៊ីវតឹក បានស្វាគមន៍យ៉ាងកក់ក្តៅចំពោះវត្តមានរបស់ លោកឯកអគ្គរដ្ឋទូត ដែលត្រូវបានរដ្ឋាភិបាលសហរដ្ឋអាមេរិក ផ្តល់ទំនុកចិត្ត និងប្រគល់ភារកិច្ចថ្មី មកបំពេញបេសកកម្ម ជាឯកអគ្គរដ្ឋទូតសហរដ្ឋអាមេរិកថ្មីប្រចាំព្រះរាជាណាចក្រកម្ពុជា។
ជាមួយគ្នានេះ លោកក៏បានបង្ហាញពីការគាំទ្រយ៉ាងពេញទំហឹង ទៅលើគោលបំណងខាងលើនេះ ជាមួយនឹងការសុំឱ្យមានការជួយ បណ្តុះបណ្តាលនូវជំនាញបច្ចេកទេសពាក់ព័ន្ធទៅនឹងវិស័យឌីជីថល បែបទំនើបចុងក្រោយមកដល់កម្ពុជា។
លើសពីនេះទៅទៀត លោកសង្ឃឹមថា វត្តមានរបស់ឯកអគ្គរដ្ឋទូតថ្មីសហរដ្ឋអាមេរិកនៅព្រះរាជាណាចក្រកម្ពុជា នឹងបន្តពង្រឹងកិច្ចសហប្រតិបត្តិការទំនាក់ទំនង ដែលមានស្រាប់ឱ្យកាន់តែល្អប្រសើរឡើងថែមទៀត រវាងប្រទេសទាំងពីរ៕
