ដោយដែន ចែងចាំង
ភ្នំពេញៈ សម្តេចតេជោហ៊ុន សែននាយករដ្ឋមន្រ្តីកម្ពុជាបានថ្លែងថា កំណើនសេដ្ឋកិច្ចកម្ពុជាអាចឆ្លុះបញ្ចាំងបានថា កំណើនសេដ្ឋកិច្ចកម្ពុជាសម្រេចបានក្នុងរង្វង់ប្រមាណ ៧ភាគរយ តែតួលេខរបស់ធនាគារជាតិ និងអ្នកឯកទេសគឺកម្ពុជាអាចសម្រេចបានកំណើនសេដ្ឋកិច្ច៧.១ភាគរយ ខណៈអត្រាអតិផរណាមានជាង២ភាគរយ។
សម្តេចបានមានប្រសាសន៍បែបនេះ ក្នុងពេលអញ្ជើញប្រគល់សញ្ញាបត្រដល់និស្សិតសាកលវិទ្យាល័យឯកទេសនៃកម្ពុជាចំនួន៧០០០នាក់ នៅសាលសន្និសីទ និងពិព៌ណកោះពេជ្រនាព្រឹកថ្ងៃទី១១ ធ្នូនេះ។
សម្តេចតេជោ ហ៊ុន សែន បានថ្លែងបន្តថា “ស្ថានភាពកំណើនសេដ្ឋកិច្ចក្នុងរង្វង់៧ភាគរយ និងអត្រាអតិផរណាជាង២ភាគរយនេះ គឺជាស្ថានភាពសេដ្ឋកិច្ចដ៏ល្អ”។
សម្តេចតេជោ ហ៊ុន សែន បានថ្លែងថា ចក្ខុវិស័យតាំងពីដើមរបស់រាជរដ្ឋាភិបាល គឺមានសន្តិភាព ទើបមានអ្វីៗទាំងអស់ ពោលមានសន្តិភាព ទើបមានសិទ្ធិមនុស្ស។ សិទ្ធិមនុស្ស ចាប់ផ្តើមពីសិទ្ធិរស់រានមានជីវិត។ សម្តេចតេជោបានថ្លែងថា ក្រុមមនុស្ស «សិទ្ធិមនុស្សនិយម» នៅពេលប្រទេសមានបញ្ហា គឺរត់លឿនជាងគេទាំងអស់។
ការលើកឡើងរបស់សម្តេចតេជោស្របគ្នា នឹងការព្យាករណ៍របស់ស្ថាប័នអន្តរជាតិធំៗ ដូចជាធនាគារពិភពលោក ធនាគារអភិវឌ្ឍន៍អាស៊ី និងមូលនិធិរូបិយប័ណ្ណអន្តរជាតិ ដែលបានរំពឹងថា សេដ្ឋកិច្ចកម្ពុជានឹងសម្រេចបាននូវកំនើន ក្នុងរង្វង់៧ភាគរយនៃឆ្នាំនេះ៕
