ដោយ ៖ រ៉ាណេត
ភ្នំពេញ ៖ គម្រោងអាជីវកម្មថ្មសំណង់ថ្មីមួយទៀតក្រោមការវិនិយោគពីសំណាក់ក្រុមហ៊ុនក្នុងស្រុក នៅលើផ្ទៃដីទំហំជិត១៦ហិកតា ស្ថិតនៅក្នុងខេត្តកំពត ត្រូវបានរដ្ឋាភិបាលសម្រេចអនុម័ត និងគាំទ្រឱ្យចាប់ដំណើរការទៅតាមការស្មើសុំបន្ទាប់ពីឆ្លងកាត់កិច្ចប្រជុំអន្តរក្រសួងដែលពាក់ព័ន្ធ។
នៅទីស្តីការក្រសួងបរិស្ថាននាថ្ងៃទី១២ ខែធ្នូ ឆ្នាំ២០១៩ នេះ ក្រោមការដឹកនាំប្រជុំអន្តរក្រសួង ដោយលោក នេត ភក្ត្រា រដ្ឋលេខាធិកាក្រសួងបរិស្ថាន ស្តីពីការពិនិត្យ និងផ្តល់យោបល់លើរបាយការណ៍វាយតម្លៃហេតុប៉ះពាល់បរិស្ថាន និងសង្គមដំបូង (IESIA) សម្រាប់គម្រោងអាជីវកម្មថ្មសំណង់ លើផ្ទៃដីទំហំ ១៥,៩០ហិកតា នៅក្នុងខេត្តកំពត ត្រូវបានសម្រេចគាំទ្រ និងអនុម័តឱ្យដំណើរការ ប៉ុន្តែត្រូវស្ថិតក្រោមការគ្រប់គ្រង និងអនុវត្តទៅតាមច្បាប់។
ទីតាំងគម្រោងអាជីវកម្មថ្មសំណង់មួយនេះ មានទីតាំងស្ថិតនៅតំបន់ភ្នំស្យា ក្នុងភូមិសាស្រ្តភូមិត្រពាំងរាំង ឃុំតានី ស្រុកអង្គរជ័យ ខេត្តកំពត ក្រោមការវិនិយោគរបស់ក្រុមហ៊ុន CHH INVESTMENT CO,. LTD (ម្ចាស់គម្រោង) សិក្សា និងរៀបចំរបាយការណ៍វាយតម្លៃដោយក្រុមហ៊ុនទីប្រឹក្សា អ ធី អិម ហ្រ្គីន ខនសាល់ធេនស៊ី ឯ.ក ។
កិច្ចប្រជុំនេះ មានសមាសភាពចូលរួមពីតំណាងអគ្គនាយកដ្ឋានពាក់ព័ន្ធ នៃក្រសួងបរិស្ថាន អគ្គលេខាធិការដ្ឋាននៃក្រុមប្រឹក្សាជាតិអភិវឌ្ឍន៍ដោយចីរភាព តំណាងអន្តរក្រសួងពាក់ព័ន្ធក្រុមប្រឹក្សាអភិវឌ្ឍន៍កម្ពុជា រដ្ឋបាលខេត្តកំពត មន្ទីរបរិស្ថានខេត្តកំពត អង្គការ DPA នាយកដ្ឋានវាយតម្លៃហេតុប៉ះពាល់បរិស្ថាននៃក្រសួងបរិស្ថាន តំណាងម្ចាស់គម្រោង និងក្រុមហ៊ុនទីប្រឹក្សា សរុបប្រមាណ ៣៦នាក់។
បន្ទាប់ពីឆ្លងកាត់កិច្ចប្រជុំ បានសម្រេចគាំទ្រក្រុមហ៊ុនឱ្យចាប់ដំណើរការអាជីវកម្ម ប៉ុន្តែត្រូវស្ថិតនៅក្រោមការគ្រប់គ្រង និងអនុវត្តទៅតាមច្បាប់កំណត់ ជាពិសេស ផ្នែកបរិស្ថាន និងសុខសុវត្ថិភាពរបស់បុគ្គលិក កម្មករ ក៏ដូចជាអ្នកដែលពាក់ព័ន្ធជាមួយនឹងគម្រោងអាជីវកម្មផងដែរ៕
