ដោយ វុត្ថា
ភ្នំពេញៈ លោកទេសរដ្ឋមន្ត្រីស៊ុន ចាន់ថុល រដ្ឋមន្ត្រីក្រសួងសាធារណៈការ និងដឹកជញ្ជូនបានជំរុញឱ្យក្រុមហ៊ុន Rafulin Holdings Sdn Bhd ដែលជាក្រុមហ៊ុនដ៏ធំមួយរបស់ប្រទេសម៉ាឡេស៊ី ចូលរួមបណ្តាក់ទុនវិនិយោគលើវិស័យហេដ្ឋារចនាសម្ព័ន្ធ នៅក្នុងប្រទេសកម្ពុជា។
លោកទេសរដ្ឋមន្ត្រី ស៊ុន ចាន់ថុល នៅក្នុងជំនួបពិភាក្សាពីឱកាសវិនិយោគទៅលើវិស័យហេដ្ឋារចនាសម្ព័ន្ធនៅកម្ពុជា និងតំណាងក្រុមហ៊ុន Rafulin Holdings Sdn Bhd កាលពីថ្ងៃទី ១២ ខែធ្នូ ឆ្នាំ ២០១៩ នេះ បានលើកឡើងអំពីការរីកចម្រើនយ៉ាងឆាប់រហ័សក្នុងវិស័យហេដ្ឋារចនាសម្ព័ន្ធរូបវ័ន្តនៅកម្ពុជា ជាពិសេសការសាងសង់ផ្លូវថ្នល់ ស្ពាន ផ្លូវដែកជាដើម។
លោកបន្តថា “ការរីកចំរើននេះ សំដៅជំរុញនូវការតភ្ជាប់នៅទូទាំងប្រទេស ដែលមានលក្ខណៈពហុមធ្យោបាយ និងបណ្តាគម្រោងសាងសង់ធំៗជាច្រើនទៀត រួមមានផ្លូវល្បឿនលឿន ភ្នំពេញ-ខេត្តព្រះសហីនុ និងភ្នំពេញ-បាវិត ជាដើម”។
លោកទេសរដ្ឋមន្ត្រីស៊ុន ចាន់ថុល បានបន្តថា ដើម្បីឆ្លើយតបទៅនឹងការកកស្ទះចរាចរណ៍ ដោយសារកំណើននៃយានយន្ត និងតម្រូវការនៃដឹកជញ្ជូន ក្រសួងបានពិនិត្យអំពីលទ្ធភាព នៃការប្រើប្រាស់ប្រព័ន្ធ Automated Guideway Transit (AGT) កសាងផ្លូវក្រវ៉ាត់ក្រុងទី៤ Monorail ឬ ផ្លូវក្រោមដីជាដើម។
លោកទេសរដ្ឋមន្ត្រី ក៏បានឱ្យដឹងអំពីការលើកទឹកចិត្តរបស់រាជរដ្ឋាភិបាល តាមរយៈច្បាប់វិនិយោគ ដែលអនុញ្ញាតឱ្យមានកិច្ចសន្យារយៈពេលវែង ការកាន់កាប់នូវទុន១០០ភាគរយ ការបើកចំហរការវិនិយោគលើគ្រប់វិស័យ ការអនុគ្រោះពន្ធ។ល។ ជាងនេះទៅទៀត លោកទេសរដ្ឋមន្ត្រី ក៏បានជំរុញឱ្យក្រុមហ៊ុនពិនិត្យលទ្ធភាព ក្នុងការចូលរួមដាក់ទុនវិនិយោគ ក្នុងការកសាងនិងអភិវឌ្ឍន៍វិស័យហេដ្ឋារចនាសម្ព័ន្ធនៅកម្ពុជា។
តំណាងក្រុមហ៊ុនក៏បានថ្លែងអំណរគុណ ដល់លោកទេសរដ្ឋមន្ត្រី ចំពោះទស្សនវិស័យទៅលើការអភិវឌ្ឍ លើវិស័យហេដ្ឋារចនាសម្ព័ន្ធ និងបង្ហាញនូវចំណាប់អារម្មណ៍ក្នុងការចូលរួមបណ្តាក់ទុនវិនិយោគនៅកម្ពុជា។
ក្រុមហ៊ុន Rafulin Holdings Sdn Bhd គឺជាសហគ្រាស និងមានការរិយាល័យនៅមូលដ្ឋាននៅទីក្រុងកូឡាឡាំពួប្រទេសម៉ាឡេស៊ី។ សហគ្រាសនេះ បានធ្វើប្រតិបត្តិការក្នុងការគ្រប់គ្រងលើឧស្សាហកម្មក្រុមហ៊ុន និងសហគ្រាស៕
