ដោយ ប៊ី
ភ្នំពេញ៖ ក្រុមហ៊ុនសណ្ឋាគារ និងរមណីយដ្ឋាន Lebua Hotels and Resorts ដែលមានទីស្នាក់ការកណ្តាលនៅថៃ គ្រោងនឹងពង្រីកប្រតិបត្តិការអាជីវកម្មរបស់ខ្លួនមកកាន់កម្ពុជាដែលស្ថិតក្នុងចំណោមប្រទេសមួយចំនួននៅអាស៊ីអាគ្នេយ៍។
ប្រតិបត្តិករសណ្ឋាគារ និងភោជនីយដ្ឋានដែលមានទីស្នាក់ការកណ្តាលនៅថៃនេះកំពុងរៀបចំផែនការសម្រាប់ការចុះបញ្ជីជាសាធារណៈនៅទីក្រុងបាងកក ឬសឹង្ហបូរីសម្រាប់ការរៀបចំការពង្រីកអាជីវកម្មផ្នែកផ្សេងទៀតក្នុងតំបន់។ នេះគេហទំព័រព័ត៌មានឧស្សាហកម្មទេសចរណ៍ Skift បានរាយការណ៍នៅសប្តាហ៍នេះ។
ដំណើរការនៃការចុះបញ្ជីត្រូវបានរំពឹងថានឹងបញ្ចប់ក្នុងរយៈពេលមួយ ឬពីរឆ្នាំ។របាយការណ៍ដដែលបានចាត់ទុកប្រទេសវៀតណាម ឡាវ និងកម្ពុជាជាទិសដៅសំខាន់សម្រាប់ការវិនិយោគនាពេលអនាគតនៅខាងក្រៅពីប្រទេសថៃ។
ក្រៅពីសណ្ឋាគារលំដាប់ផ្កាយ ៥ នៅទីក្រុងបាងកក ក្រុមហ៊ុនណ្ឋាគារ និងរមណីយដ្ឋាននេះក៏មានអចលនទ្រព្យប្រណីតចំនួន ២ នៅប្រទេសឥណ្ឌា និងមួយផ្សេងទៀតនៅញូវហ្សេឡែន។
ក្រុមហ៊ុននឹងបើកសណ្ឋាគារចំនួន ២ បន្ថែមទៀតនៅក្នុងប្រទេសឥណ្ឌានៅឆ្នាំក្រោយ។នាយកប្រតិបត្តិក្រុមហ៊ុនលោក Deepak Ohri បាននិយាយថា “ការចុះបញ្ជីនេះនឹងផ្តល់មូលនិធិដល់ការពង្រីកទីផ្សារនៅតំបន់ឥណ្ឌូចិនដែលកំពុងរីកចម្រើននៅក្នុងប្រទេសកម្ពុជា មីយ៉ាន់ម៉ា ឡាវ និងវៀតណាម ខណៈប្រទេសថៃនឹងនៅតែជាមជ្ឈមណ្ឌលកណ្តាល ដោយសារតែទីតាំងភូមិសាស្ត្រ”។
លោក Ohri បាននិយាយថា ពួកគេនឹងនាំមកនូវអ្វីដែលថ្មីដែលសាកសមនឹងប្រទេសនីមួយៗដែលបានរៀបរាប់ខាងលើ។លោក បានបន្តថា “យើងនឹងផ្តល់គំនិតផ្សេងគ្នាដើម្បីឱ្យសមស្របនឹងទីផ្សារកម្ពុជា មីយ៉ាន់ម៉ា ឡាវ និងវៀតណាម។ ស្រមៃមើលទូកមួយជាមួយក្លឹបមួយថ្ងៃនៅ ឆ្នេរសមុទ្រហាឡុង។ សណ្ឋាគារបូទិកដែលមានបន្ទប់ប្រហែល ៨០ ក្នុងទីតាំងពិសេស។
លោកបានឱ្យដឹងទៀតថា “យើងនឹងជ្រើសរើសទីតាំងរបស់យើងដោយយកចិត្តទុកដាក់។ ហើយអ្វីគ្រប់យ៉ាងដែលយើងធ្វើនឹងត្រូវធ្វើឡើងជាមួយសម្ភារៈសំណង់ដែលមាននិរន្តរភាព ។ មានកិច្ចការជាច្រើនដែលត្រូវធ្វើនៅក្នុងទីផ្សារកម្ពុជា មីយ៉ាន់ម៉ា ឡាវ និងវៀតណាម”។
