ដោយ វុត្ថា
បាត់ដំបង: ក្រុមហ៊ុនចិនដែលជាប់លំដាប់ទី៣ មកពីទីក្រុងសៀងហៃ នៃសាធារណរដ្ឋប្រជាមានិតចិន គ្រោងបោះទុនវិនិយោគក្នុងការសាងសង់រោងចក្រកែច្នៃសំរាមដើម្បី ផលិតថាមពលអគ្គិសនី នៅក្នុងខេត្តបាត់ដំបង។
លោក Zhou Yuhui ប្រធានក្រុមហ៊ុន CITICPE នៅក្នុងជំនួបពិភាក្សាការងារជាមួយ លោកងួន រតនៈ អភិបាលខេត្តបាត់ដំបងកាលពីម្សិលនេះបានឪ្យដឹងថា នេះគឺជាលើកទី១ ហើយដែលក្រុមហ៊ុនរបស់លោក បានសម្លឹងឃើញពីសក្តានុពលក្នុងការកែច្នៃសំរាមឲ្យទៅជាថាពលអគ្គិសនីក្នុងខេត្ត។
លោកបន្តថា “ការសាងសង់នូវរោងចក្រកែច្នៃសំរាម ឲ្យទៅជាថាមពលអគ្គិសនីដើម្បីជាការឆ្លើយតបអំពីកង្វល់ និងតម្រូវការក្នុងខេត្ត និងឆ្លើយតបទៅនឹងការអំពាវនាវ របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដែលបានអំពាវនាវដល់បណ្តាក្រុមហ៊ុននានាទាំងក្នុង និងក្រៅប្រទេសឲ្យមកវិនិយោគលើវិស័យកែច្នៃសំរាមនៅកម្ពុជា”។
លោក Zhou Yuhui បានបន្ថែមថា គម្រោងនេះកំពុងស្ថិតក្នុងការសិក្សានៅឡើយ ព្រោះដោយសារខាងក្រុមហ៊ុន ស្នើដល់អាជ្ញាធរខេត្តឲ្យជួយគាំទ្រ ទៅលើការងាមួយចំនួន ដែលទាក់ទិនទៅ និងការវិនិយោគរបស់ខ្លួននៅក្នុងខេត្តបាត់ដំបង ដែលក្នុងនោះការងារប្រមូលសំរាម ដែលជាតម្រូវការចាំបាច់យ៉ាងហោចណាស់ ក្នុងមួយថ្ងៃឲ្យបាន៦០០តោន ដើម្បីធ្វើឲ្យសង្វាក់ផលិតថាមពលពីការកែច្នៃសំរាម ទទួលបានជោគជ័យនិងធានាពីតម្រូវការក្នុងការកែច្នៃប្រចាំថ្ងៃ។
លោកក៏បានស្នើឲ្យអាជ្ញាធរជួយ ពីការទុកដាក់កាកសំណល់សំរាមរបស់ពលរដ្ឋនៅកន្លែងណាមួយច្បាស់លាស់ ដើម្បីធ្វើការដឹកជញ្ជូនសំរាម នៅក្នងខេត្តបាត់ដំបង។ កន្លងមកនៅក្នុងខេត្ត ក៏មានក្រុមហ៊ុនកំពុងតែធ្វើការដឹកជញ្ជូនសំរាម និងប្រមូលទុកដាក់សំរាម។ ដូចនេះ សុំឲ្យអាជ្ញាធរជួយសម្របសម្រួល ឲ្យមានអ្នកជំនាញរបស់ក្រុមហ៊ុនបានចុះធ្វើការសិក្សាដោះស្រាយពីបញ្ហាសំរាមក្នុងខេត្តជាមួយ និងក្រុមហ៊ុនទាំងនោះផងដែរ។
លោក Zhou Yuhui បានសង្កត់ធ្ងន់ទៀតថា បើការងារត្រូវបានសិក្សា និងដោះស្រាយចប់រួចរាល់ជាមួយ និងក្រុមហ៊ុនហើយនោះ គឺនឹងឈានទៅដល់ការសាងសង់រោងចក្រដែលអាចកែច្នៃសំរាមមួយចំនួន ទៅជាឋាមពលអគ្គិសនី ដូចជា៖ សំរាមប្លាស្ទិក និងលោហៈធាតុ ដែលអាចធ្វើការកែច្នៃជាវត្ថុប្រើប្រាស់វិញបាន ហើយថែមទាំងធ្វើឲ្យបរិស្ថានក្នុងខេត្តកាន់តែមានភាពល្អប្រសើរផងដែរ។ គម្រោងនេះអាចរំពឹងថា នឹងទទួលបានជោគជ័យ និងបានជាគំរូដល់ខេត្តផ្សេងៗផងដែរ។
លោកងួន រតនៈ អភិបាលខត្តបាត់ដំបង បានសម្ដែងនូវការស្វាគមន៍គាំទ្រយ៉ាងខ្លាំង និងថែមទាំងបានជំរុញ ពីគម្រោងវិនិយោគរបស់ក្រុមហ៊ុនចិន ដែលបានមើលឃើញពីសក្តានុពលរីកចម្រើន និងជាខេត្តគោលដៅរបស់ខ្លួន។
លោកក៏បានជំរុញទៅខាងក្រុមហ៊ុន ឲ្យសហការជាមួយអាជ្ញាធរខេត្ត ចុះទៅតាមបណ្ដាស្រុក ដើម្បីសិក្សាស្វែងយល់បន្ថែមទៀតមុន នឹងសម្រេចឈានដល់ការព្រមព្រៀងផ្នែកផ្លូវច្បាប់-ផ្នែកបច្ចេកទេស និងដើម្បីធ្វើឲ្យគម្រោងមួយនេះ លេចចេញជារូបរាងពិតប្រាកដ និងទទួលបាននូវផលផ្លែផ្កាក្នុងរយៈពេលដ៏ខ្លីឆាប់ៗខាងមុខនេះ។
យោងតាមរបាយការណ៍របស់ក្រសួងបរិស្ថាន បានបង្ហាញឲ្យដឹងថាតាមបណ្តាខេត្ត-រាជធានីធំៗ ដែលផលិតបរិមាណសំរាមច្រើនក្នុងនោះ រាជធានីភ្នំពេញ ប្រមាណជាង៣ពាន់តោនក្នុង១ថ្ងៃ។ ក្រុងព្រះសីហនុប្រមាណ៧០០តោនក្នុង១ថ្ងៃ។ ក្រុងសៀមរាប៣៨០តោនក្នុង១ថ្ងៃ។ ដោយឡែកនៅក្នុងក្រុងបាត់ដំបង ប្រមាណពី១៣០ទៅ១៥០តោនក្នុងមួយថ្ងៃ។ ហើយសំរាមទាំងនោះ៦៥% ជាសំណល់សរីរាង្គ និង៣៥%គឺជាសំណល់ប្លាស្ទិក៕
