ដោយ ៖ វុត្ថា
ភ្នំពេញ ៖ សម្តេចតេជោ ហ៊ុនសែន នាយករដ្ឋមន្ត្រីនៃកម្ពុជាបានឱ្យដឹងថា តាមរយៈចំណូលដែលប្រមូលបានពីអគ្គនាយកដ្ឋានគយ និងរដ្ឋាករកម្ពុជា និងអគ្គនាយកដ្ឋានពន្ធដារ ដែលគិតមកដល់ពេលនេះ ស្ថានប័នទាំង២នេះ បានប្រមូលចំណូលពន្ធលើសផែនការ ដែលបានកំណត់ដោយច្បាប់ថវិកា រហូតដល់ជាង១៤០០លានដុល្លាររួចជាស្រេច។
សម្តេចតេជោនាយករដ្ឋមន្ត្រី ហ៊ុន សែន មានប្រសាសន៍បែបនេះក្នុងពិធីប្រគល់សញ្ញាបត្រជូននិស្សិតបញ្ចប់ការសិក្សា ដោយជោគជ័យមក ពីសាកលវិទ្យាល័យភូមិន្ទ នីតិសាស្ត្រ និងវិទ្យាសាស្ត្រសេដ្ឋកិច្ច (RULE) ប្រមាណ២៧៩០នាក់នាថ្ងៃទី១៦ ខែធ្នូនេះ នៅវិទ្យាស្ថានជាតិអប់រំ។
សម្តេចតេជោបន្តថា ជាភ័ព្វសំណាងដែរ ក្នុងការប្រមូលចំណូលឆ្នាំនេះ ដែលមកដល់ពេលនេះ គឺបានលើសពី១៤០០លានដុល្លាររួចស្រេចទៅហើយ។ ផ្នែកគយ គិតត្រឹមថ្ងៃទី២៥ ខែធ្នូម្សិលមិញនេះ លើស៩២០លានដុល្លារ បានសេចក្តីថា លើសច្បាប់ថវិកានៃការប្រមូលចំណូល នេះក៏បានមកពីការកំណែទម្រង់ហរិញ្ញវត្ថុសាធារណៈ ដែលផ្តល់ឲ្យប្រាក់ចំណូលគ្រាន់តែគយមួយ គិតត្រឹមពីម្សិលមិញលើសផែនការជាង៩០០លានដុល្លារស្រេចទៅហើយ អីចឹងសល់ប៉ុន្មានថ្ងៃទៀត ដែលជាមធ្យមគឺ ១០លានដុល្លារក្នុង១ថ្ងៃ។
សម្តេចបន្ថែមថា ហើយពន្ធដារក្នុងប៉ុន្មានថ្ងៃមុននោះ បានធ្វើរបាយការណ៍មកថា លើសផែនការ៥១៣លានដុល្លាររួចស្រេចទៅហើយ បើគិតទាំងគយ និងពន្ធដារ ចំណូលសើស១៤០០លានដុល្លារ។
ក្នុងច្បាប់ថវិកា ឆ្នាំ២០១៩ កំណត់ឲ្យអគ្គនាយកដ្ឋានគយ និងរដ្ឋាករប្រមូលចំណូលឲ្យបាន២,២៦០លានដុល្លារ ប៉ុន្តែពេលនេះគយបានរកចំណូលលើសច្បាប់ថវិកា រហូតដល់ជាង៩០០លានដុល្លារ។ ចំណែកអគ្គនាយកដ្ឋានពន្ធដារ ច្បាប់ថវិកាឆ្នាំ២០១៩ កំណត់ឲ្យប្រមូលចំណូលឲ្យបាន ២,២៨៨លានដុល្លារ ប៉ុន្តែពេលនេះពន្ធដារប្រមូលចំណូលបានលើសច្បាប់ថវិការហូតដល់ជាង៥០០លានដុល្លារ។
កំណើនខ្ពស់នៃការប្រមូលចំណូលពន្ធគយ និងពន្ធដារនេះ ត្រូវបានសម្តេចតេជោ ហ៊ុន សែន ចាត់ទុកថាកើតចេញពីការធ្វើកំណែទម្រង់ហរិញ្ញវត្ថុសាធារណៈ ដែលដាក់ចេញដោយរាជរដ្ឋាភិបាលកម្ពុជា៕
