ដោយ Donald Lee
ភ្នំពេញ៖ អនុប្រធានាធិបតីចិនលោក Liu He នឹងជួបជាមួយប្រធានាធិបតីអាមេរិកលោក Donald Trump នៅទីក្រុងវ៉ាស៊ីនតោននៅថ្ងៃ ច័ន្ទ សប្តាហ៍ក្រោយដើម្បីចុះហត្ថលេខាលើកិច្ចព្រមព្រៀងពាណិជ្ជកម្មរវាងអាមេរិក និងចិនដំណាក់កាលទី ១។
កិច្ចព្រមព្រៀងពាណិជ្ជកម្មអាមេរិក និងចិនដំណាក់កាលទី ១ បានបញ្ឈប់សង្គ្រាមពាណិជ្ជកម្មដែលមានតម្លៃថ្លៃបំផុតមួយនៅក្នុងប្រវត្តិសាស្រ្តមនុស្សជាតិ និងបាននាំមកនូវសញ្ញាដំបូងនៃការថយចុះនៃសង្រ្គាមពាណិជ្ជកម្មរយៈពេល ១៧ ខែរវាងប្រទេសដែលមានសេដ្ឋកិច្ចធំជាងគេទាំងពីរនៅលើពិភពលោក។
លោក Trump បានសរសេរនៅលើបណ្តាញសង្គម Twitter នៅមុនឆ្នាំថ្មីថា “ខ្ញុំនឹងចុះហត្ថលេខាលើកិច្ចព្រមព្រៀងពាណិជ្ជកម្មដំណាក់កាលទី ១ ដ៏ធំ និងទូលំទូលាយរបស់យើងជាមួយប្រទេសចិននៅថ្ងៃទី ១៥ ខែ មករា”។
លោកបានបន្ថែមថា “ពិធីនេះនឹងប្រព្រឹត្តទៅនៅសេតវិមាន។ តំណាងជាន់ខ្ពស់របស់ចិននឹងមានវត្តមាន”។
អង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) បានបញ្ជាក់ថា ផលប៉ះពាល់នៃសង្រ្គាមពាណិជ្ជកម្មអាមេរិក និងចិនបានបណ្តាលឱ្យកំណើនសេដ្ឋកិច្ចពិភពលោកធ្លាក់ចុះ ដូចកម្រិតវិបត្តិហិរញ្ញវត្ថុដ៏ធំកាលពី ១០ ឆ្នាំមុន។
ផលប៉ះពាល់នៃសង្រ្គាមពាណិជ្ជកម្មរវាងអាមេរិក និងចិនបណ្តាលឱ្យមានការធ្លាក់ចុះកំណើនសេដ្ឋកិច្ចពិភពលោក និងការតម្រៀបឡើងវិញនូវខ្សែសង្វាក់តម្លៃពិភពលោកនៅក្នុងតំបន់អាស៊ីប៉ាស៊ីហ្វិក។
លោក Trump បាននិយាយថា លោកនឹងធ្វើដំណើរទៅកាន់ទីក្រុងប៉េកាំងដោយខ្លួនឯងដើម្បីចរចាដំណាក់កាលទី ២ នៃកិច្ចព្រមព្រៀងពាណិជ្ជកម្ម។
លោក Trump បានថ្លែងថា “នៅកាលបរិចេ្ឆទក្រោយ ខ្ញុំនឹងទៅទីក្រុងប៉េកាំងដែលកិច្ចពិភាក្សានឹងចាប់ផ្តើមនៅដំណាក់កាលទី ២!”៕
