ដោយ Donald Lee
ភ្នំពេញៈ ទីផ្សារភាគហ៊ុននៅអាស៊ីបានធ្លាក់ចុះនៅព្រឹកនេះ ដោយសារភាពតានតឹងកំពុងពុះកញ្ជ្រោលនៅមជ្ឈឹមបូព៌ា បន្ទាប់ពីប្រធានាធិបតីអាមេរិកលោកDonald Trump បានបញ្ជាឱ្យធ្វើឃាតមន្ត្រីជាន់ខ្ពស់អ៊ីរ៉ង់មួយរូបនៅអ៊ីរ៉ាក់កាលពីថ្ងៃ ព្រហស្បតិ៍។
ក្រុមហ៊ុន Nikkei 225 របស់ជប៉ុនបានធ្លាក់ចុះជិត២ភាគរយ ហើយទីផ្សារនៅកូរ៉េខាងត្បូង និងហុងកុងបានធ្លាក់ចុះប្រហែល ១ ភាគរយ។
មន្ត្រីអ៊ីរ៉ង់ដែលជាមេបញ្ជាការយោធាលោក Qasem Soleimani ត្រូវបានសម្លាប់ ដោយការវាយប្រហារដោយយន្តហោះគ្មានមនុស្សបើក ដែលបញ្ជាដោយលោកTrump។ រដ្ឋាភិបាលអ៊ីរ៉ង់បានថ្កោលទោសការធ្វើឃាតនេះ ហើយប្តេជ្ញាសងសឹកតបវិញនឹងអាមេរិក។
រដ្ឋមន្ត្រីការពារជាតិអ៊ីរ៉ង់លោក Amir Hatami បាននិយាយថា “ការសងសឹកនឹងត្រូវធ្វើឡើង សម្រាប់ការធ្វើឃាតដោយអយុត្តិធម៌របស់លោក Soleimani … យើងនឹងសងសឹកពីអ្នកដែលពាក់ព័ន្ធ និងទទួលខុសត្រូវចំពោះការធ្វើឃាតរបស់គាត់”។
កាលពីចុងសប្តាហ៍អ៊ីរ៉ង់បានឱ្យដឹងថា ខ្លួននឹងដកខ្លួនចេញពីកិច្ចព្រមព្រៀងនុយក្លេអ៊ែរឆ្នាំ២០១៥ ដែលកំណត់ការចម្រាញ់ សារធាតុអ៊ុយរ៉ាញ៉ូមដែលមានកំណត់ បន្ទាប់ពីការធ្វើឃាតរបស់មេបញ្ជាការយោធាកំពូលរបស់អ៊ីរ៉ង់។
លោក Trump បានចេញសេចក្តីគំរាមមួយ នៅលើប្រព័ន្ធផ្សព្វផ្សាយសង្គម Twitter ថា អាមេរិកនឹងកំណត់គោលដៅអ៊ីរ៉ង់សម្រាប់វាយប្រហារ ប្រសិនបើប្រទេសនេះសងសឹកតាមមធ្យោបាយណាមួយ។
លោក Trump បានសរសេរលើTwitter របស់លោកនៅថ្ងៃនេះថា“ការចុះផ្សាយរបស់ប្រព័ន្ធផ្សព្វផ្សាយទាំងនេះ នឹងទុកជាការជូនដំណឹងដល់សភាអាមេរិកថា ប្រសិនបើអ៊ីរ៉ង់វាយប្រហារទៅលើបុគ្គល ឬគោលដៅណាមួយ អាមេរិកនឹងវាយបកវិញយ៉ាងឆាប់រហ័ស ហើយប្រហែលជាក្នុងលក្ខណៈមិនសមាមាត្រ។ ការជូនដំណឹងផ្លូវច្បាប់បែបនេះមិនត្រូវបានទាមទារទេ ប៉ុន្តែត្រូវបានផ្តល់ជួន។ ទោះយ៉ាងណាក៏ដោយ!”។
លោក Trump បានបន្ថែម “អាមេរិកទើបតែចំណាយប្រាក់២ទ្រីលានដុល្លារ លើឧបករណ៍យោធា។ យើងគឺជាប្រទេសដែលធំជាងគេបំផុត ហើយរហូតមកដល់ពេលនេះគឺល្អបំផុតនៅលើពិភពលោក”។
លោក បានបន្តថា ”ប្រសិនបើអ៊ីរ៉ង់វាយប្រហារមូលដ្ឋានអាមេរិក ឬជនជាតិអាមេរិកណាមួយ យើងនឹងបញ្ជូនគ្រឿងបរិក្ខារស្រស់ស្អាតថ្មីៗ មួយចំនួនរបស់ពួកគេទៅ ..ហើយដោយមិនស្ទាក់ស្ទើរ!”។
លើសពីនេះទៀត សភាអ៊ីរ៉ាក់បានបោះឆ្នោត បណ្តេញយោធាអាមេរិកចេញពីប្រទេសខ្លួន បន្ទាប់ពីការធ្វើឃាតដោយចោទប្រកាន់អាមេរិកថា បានរំលោភលើអាណត្តិរបស់ពួកគេនៅក្នុងប្រទេសនេះ ដោយផ្តោតលើជនជាតិបរទេស និងរំលោភអធិបតេយ្យភាពរបស់ខ្លួន។
លោក Trump បានឆ្លើយតប និងវាយប្រហារដល់សមាជិកសភាអ៊ីរ៉ាក់ និងបានគំរាមដាក់ទណ្ឌកម្មធ្ងន់ធ្ងរលើប្រទេសនេះ។
លោកTrump បាននិយាយកាលពីថ្ងៃសៅរ៍ថា “ប្រសិនបើពួកគេស្នើសុំឱ្យយើងចាកចេញ ប្រសិនបើយើងមិនធ្វើវាដោយភាពរាក់ទាក់ យើងនឹងចោទប្រកាន់ពួកគេដោយដាក់ទណ្ឌកម្មដូចជាពួកគេមិនដែលបានឃើញ។ វានឹងដាក់ទណ្ឌកម្មអ៊ីរ៉ង់មើលទៅ ដូចជាមានភាពតានតឹង”។
លោក Trump បានបន្ថែមទៀតថា អាមេរិកក៏នឹងមិនចាកចេញដែរ រហូតដល់អ៊ីរ៉ាក់បានបង់លុយឱ្យរដ្ឋាភិបាលអាមេរិក សម្រាប់មូលដ្ឋានទ័ពអាកាសមួយ នៅក្នុងប្រទេសនេះ។
លោកបានថ្លែងថា “យើងមានមូលដ្ឋានអាកាសថ្លៃខ្លាំងណាស់នៅទីនោះ។ ខ្លួនចំណាយថវិការាប់ពាន់លានដុល្លារដើម្បីសាងសង់ យូរមុនពេលវេលាកាន់តំណែងរបស់ ខ្ញុំ។ យើងនឹងមិនចាកចេញទេ លុះត្រាតែពួកគេសងយើងវិញ”៕
