ដោយ ៖ រ៉ាណេត
កំពត ៖ គម្រោងវិនិយោគក្នុងទំហំទឹកប្រាក់ប្រមាណ២០០០លានដុល្លារ លើការអភិវឌ្ឍន៍តំបន់ឆ្នេរកែបថ្មី នៅស្រុកទឹកឈូ ខេត្តកំពត នឹងត្រូវបង្ហាញវត្តមានក្នុងពេលដ៏ខ្លីខាងមុខនេះ ខណៈដែលរដ្ឋបាលខេត្តបានបើកកិច្ចប្រជុំស៊ីជម្រៅទៅលើការចាប់ចុះអនុវត្តគម្រោងឱ្យចេញជាលទ្ធផលខ្លះៗមុនចូលឆ្នាំខ្មែរ។
រដ្ឋបាលខេត្តកំពតបានបើកកិច្ចប្រជុំជាមួយនឹងប្រធានក្រុមហ៊ុន ( IGB) ពាក់ព័ន្ធនឹងការជំរុញអនុវត្តគម្រោងវិនិយោគអភិវឌ្ឍឆ្នេរនៅតំបន់កែបថ្មី ឃុំបឹងទូក ស្រុកទឹកឈូ ក្រោមកិច្ចដឹកនាំអង្គប្រជុំដោយ លោក ជាវ តាយ អភិបាលនៃគណៈអភិបាលខេត្ត រួមជាមួយនឹងមន្ត្រីក្រោមឱវាទដែលជាប់ពាក់ព័ន្ធ ក្នុងគោលបំណងផ្ដោតសំខាន់ ពិភាក្សាផ្ដល់យោបល់រាល់បញ្ហាផ្សេងៗពាក់ព័ន្ធនឹងហេដ្ឋារចនាសម្ព័ន្ធ និងការអនុវត្តឱ្យស្របទៅនឹងច្បាប់អនុញ្ញាតរបស់ក្រុមប្រឹក្សាជាតិអភិវឌ្ឍកម្ពុជា (CDC) ។
លោក ជាវ តាយ អភិបាលខេត្តកំពត បានណែនាំ និងជំរុញឱ្យមន្ទីរ អង្គភាពជំនាញពាក់ព័ន្ធ និងអាជ្ញាធរមូលដ្ឋានមានកិច្ចសហការគ្នាល្អរវាងក្រុមហ៊ុន (IGB) ដើម្បីធ្វើយ៉ាងណាឱ្យគម្រោងការអភិវឌ្ឍឆ្នេរតំបន់កែបថ្មីនេះ បានលេចរូបរាងឡើង សំដៅធ្វើឱ្យបានសម្រេចតាមគោលបំណង ដែលរដ្ឋបាលខេត្តចង់បាន ក្នុងការពង្រឹងពង្រីកសក្ដានុពលវិស័យទេសចរណ៍នៅក្នុងខេត្ត ប្រកបដោយនិរន្តរភាព និងចីរភាព ពិសេស ការបម្រើសេវាកម្សាន្តជូនប្រជាពលរដ្ឋក៏ដូចជាភ្ញៀវទេសចរជាតិ និងអន្តរជាតិ ឱ្យបានលេចរូបរាងឡើង ជាបណ្ដើរៗ មុនឱកាសបុណ្យចូលឆ្នាំថ្មីប្រពៃណីជាតិខ្មែរ មកដល់នាពេលខាងមុខនេះ ។
ក្នុងនោះពាក់ព័ន្ធនឹងគម្រោងអភិវឌ្ឍន៍នេះ ជាជំហានដំបូងនេះ រដ្ឋបាលខេត្តបានជំរុញឱ្យមានកិច្ចសហសការយកចិត្តទុកដាក់លើហេដ្ឋារចនាសម្ព័ន្ធ ផ្លូវ អគ្គិសនី ប្រព័ន្ធទឹកប្រើប្រាស់ រួមនិងសេវាកម្មបម្រើដល់ភ្ញៀវចូលមកកំសាន្តផងដែរ។ គម្រោងអភិវឌ្ឍន៍ឆ្នេរតំបន់កែបថ្មីនេះ ជាការវិនិយោគដោយមានច្បាប់អនុញ្ញាត សម្រេចរបស់ក្រុមប្រឹក្សាជាតិអភិវឌ្ឍកម្ពុជា (CDC) ដែលនៅក្នុងនោះគឺមានទំហំដី២០០ហិកតា គឺរដ្ឋបាលខេត្តទទួលបាន៤០ភាគរយ អ្នកវិនិយោគទទួលបាន៦០ភាគរយ មានន័យថារដ្ឋបាលខេត្តទទួលបានដី៨០ហិកតាអ្នកវិនិយោគទទួលបាន១២០ហិកតា។
អគ្គនាយកក្រុមហ៊ុនអចលនទ្រព្យ R Investment Group លោកឧកញ៉ា តេង រិទ្ធី បានមានប្រសាសន៍ថា ខេត្តកំពត ស័ក្ដិសមទៅនឹងការអភិវឌ្ឍលើវិស័យទេសចរណ៍ ច្រើនជាងឧស្សាហកម្ម និងពាណិជ្ជកម្ម។ លោកបានបន្តទៀតថា អ្នកវិនិយោគក្នុងស្រុកភាគច្រើន ដែលចូលទៅបណ្តាក់ទុននៅក្នុងខេត្តកំពត ភាគច្រើនគឺគេផ្តោតទៅលើការធ្វើលំនៅដ្ឋានបែបលំហែរកាយ ឬ Resort ដែលស្ថិតនៅជាយក្រុង ជិតតំបន់ភ្នំ និងជាប់តំបន់មាត់ព្រែក។
លោកឧកញ៉ាបានមានប្រសាសន៍បញ្ជាក់ថា “ការដាក់គោលដៅបែបនេះ ដោយសារតែគេសម្លឹងមើលឃើញពីស្ថានភាពអំណោយផលពីធម្មជាតិ ដែលជាទីចាប់អារម្មណ៍ពីសំណាក់ភ្ញៀវទេសចបរទេស ដែលសូម្បីតែរដ្ឋាភិបាលក៏បានដាក់គោលដៅ ធ្វើការអភិវឌ្ឍជាទីក្រុងបូកគោ ដែលស្ថិតនៅចន្លោះទីរួមខេត្តកំពត និងជើងភ្នំបូកគោ”។
