ដោយវុត្ថា
ភ្នំពេញ៖ រដ្ឋាភិបាលគ្រោងនឹងបញ្ចប់នូវសេចក្តីព្រាងផែនការមេស្តីពីការតភ្ជាប់ប្រព័ន្ធដឹកជញ្ជូន និងភស្តុភារកម្ម នៅពាក់កណ្តាលឆ្នាំ២០២០នេះ ដើម្បីទាក់ទាញការវិនិយោគព្រមទាំងឆ្លើយតបទៅនឹងការបញ្ចុះតម្លៃនៃការដឹកជញ្ជូន និងការប្រកួតប្រជែងកាន់តែខ្ពស់នៅក្នុងប្រទេសកម្ពុជា។
លោក ស៊ុន ចាន់ថុល ទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូន បានឲ្យដឹងកាលពីពេលថ្មីនេះថា ផែនការមេនេះ ដើរតួនាទីយ៉ាងសំខាន់ក្នុងការចង្អុលទិស ក៏ដូចជាកំណត់នូវក្របខ័ណ្ឌរួមនៃផែនការអភិវឌ្ឍហេដ្ឋារចនាសម្ព័ន្ធ ដឹកជញ្ជូនគ្រប់មធ្យោបាយ រួមទាំងប្រព័ន្ធភស្តុភារកម្ម ដែលនឹងជួយបង្កើនប្រសិទ្ធភាពវិនិយោគសាធារណលើហេដ្ឋារចនាសម្ព័ន្ធដឹកជញ្ជូន និងចូលរួមជម្រុញកំណើនសេដ្ឋកិច្ចប្រកបដោយចីរភាព និងបរិយាបន្ន។
លោកបន្ថែមថា ក្នុងរយៈពេលបន្ទាប់ ក្រុមប្រឹក្សាជាតិភស្តុរភារកម្ម កំណត់ផែនការ និងរៀបចំយន្តការមេគ្រប់ជ្រុងជ្រោយស្ពីពី ការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្ម ដោយបំពេញបន្ថែមនូវសមាភាគសំខាន់ ពីរគឺ ការដឹកជញ្ជូនតាមផ្លូវអាកាស និងការដឹកជញ្ជូនពហុមធ្យោបាយ។
លោកថា “ផែនការមេស្តីពីការតភ្ជាប់ប្រព័ន្ធដឹកជញ្ជូន និងតស្តុរភាកម្ម នឹងត្រូវបញ្ចប់ការនៅត្រឹមខែឧសភាឆ្នាំនេះ បន្ទាប់ពីសេចក្តីព្រាងច្បាប់ផែនការអន្តរការ ត្រូវបានអនុម័តរួចហើយដោយអន្តរក្រសួង កាលពីថ្ងៃទី៦ ខែមករា ឆ្នាំ២០២០”។
សេចក្តីព្រាងផែនការមេអន្តរកាលស្តីពី ការតភ្ជាប់ប្រព័ន្ធដឹកជញ្ជូនពហុមធ្យោបាយ និងភស្តុភារកម្ម រៀបចំដោយក្រសួងសាធារណការ និងដឹកជញ្ជូន ដោយមានការកិច្ចសហការពីទីភ្នាក់ងារសហប្រតិបត្តិការអន្តរជាតិរបស់ប្រទេសជប៉ុន JICA តាំងពីខែកញ្ញា ឆ្នាំ២០១៨។
សេចក្តីព្រាងច្បាប់ផែនការមេអន្តរកាល នេះបាន រួមបញ្ជូលផែនការមេវិស័យចំនួន ៥ ដែលបានមកពីការសិក្សាយ៉ាងលំអិត ដោយដៃគូអភិវឌ្ឍន ក្នុងនោះ មាន ផែនការមេដឹកជញ្ជូនតាមថ្នល់ និងផែនការសុវត្ថិភាពចរាចរណ៍ផ្លូវគោក ផែនការមេដឹកជញ្ជូនតាមផ្លូវដែក ផែនការមេដឹកជញ្ជូនតាមផ្លូវទឹក ផ្លូវសមុទ្រ និងកំពង់ផែ ផែនការមេកំពង់ផែស្វយ័តក្រុងព្រះសីហនុ និងកំពង់ផែស្វយ័តភ្នំពេញ និងផែនការមេភស្តុភារកម្ម។
ម្យ៉ាងទៀត ការបង្កើតផែនការមេនេះផងដែរ គឺយោងតាមតម្រូវការចាំបាច់នៃផែនការយុទ្ធសាស្រ្តអភិវឌ្ឍន៍ជាតិឆ្នាំ២០១៩-២០២៣ និងគោលនយោបាយអភិវឌ្ឍន៍វិស័យឧស្សាហកម្មឆ្នាំ២០១៥-២០២៥ ក្នុងគោលបំណងបញ្ចុះតម្លៃដឹកជញ្ជូន និងភស្តុភារកម្ម ប្រកបដោយភាពប្រកួតប្រជែង ដែលអាចឱ្យកម្ពុជាមានឱកាសទាក់ទាញវិនិយោគបង្កើតការងារធ្វើជូន ប្រជាពលរដ្ឋ៕
