ដោយ វុត្ថា
ភ្នំពេញ៖ រដ្ឋាភិបាលកម្ពុជាគ្រោងនឹងបើកការដ្ឋានសាងសង់ស្ពានអាកាស និងផ្លូវក្រោមដី នៅតំបន់រង្វង់មូលចោមចៅ ជាស្ពានអាកាសទី៦នៅមុនពេលចូលឆ្នាំប្រពៃណីខ្មែរខាងមុខនេះ។
ដំណឹងល្អ!!! រដ្ឋាភិបាលនឹងបើកការដ្ឋានសាងសង់ស្ពានអាកាស និងផ្លូវក្រោមដីទី៦
ការសាងសង់ស្ពានអាកាស និងផ្លូវក្រោមដីនៅតំបន់នេះ ដើម្បីកាត់បន្ថយការកកស្ទះ និងថ្នាក់ចរារចណ៍ស្របពេល ដែលទីក្រុងភ្នំពេញនានាពេលបច្ចុប្បន្ននេះ ត្រូវបានាគេមើលឃើញថា មានការមមាញឹក និងកើនឡើងនូវចំនួនយានយន្ត និងរថយន្តដឹកញ្ជូនយ៉ាងច្រើន ក្នុងរយៈពេលប៉ុន្មានឆ្នាំចុងក្រោយនេះ ដែលធ្វើឲ្យបណ្តាផ្លូវសំខាន់នានា មានការកកស្ទះចរាចរណ៍ ជាពិសេសខណៈដែលតំបន់នេះក្នុងមួយថ្ងៃៗ កាន់តែកើនឡើងនូវការកកស្ទះចរាចរណ៍នានា។
អ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្តីបានថ្លែងឲ្យដឹងនាព្រឹកថ្ងៃទី១៥ កុម្ភៈកន្លងមកថា ស្ថានភាពចរាចរណ៍ក្នុងរាជធានីភ្នំពេញ ពេលបច្ចុប្បន្នជាពិសេស នៅចំណុចរង្វង់មូលចោមចៅ មានការកកស្ទះចរាចរណ៍ច្រើន ហើយម្យ៉ាងទៀតចរាចរណ៍នៅផ្លូវជាតិលេខ៤ ផ្លូវជាតិលេខ៣ ផ្លូវចោមចៅ និងមហាវិថីសហព័ន្ធរុស្ស៊ី ចេញចូលមករាជធានីភ្នំពេញមានការកកស្ទះច្រើន។
លោកបន្តថា “តំបន់ចោមចៅ បើសិនជាមិនមានការគិតគូរក្នុងលទ្ធភាពដោះស្រាយបញ្ហាចរាចរណ៍ គឺរិតតែនឹងមានការកកស្ទះច្រើនជាងពេលនេះ ។ ដូច្នេះហើយ ទើបអភិបាលរាជធានីភ្នំពេញ បានដឹកនាំកិច្ចប្រជុំមួយជាមួយមន្ត្រីជំនាញ ដើម្បីបន្តគិតគូរទៅលើការស្ថាបនា សាងសង់ស្ពានអាកាសចោមចៅ ដែលជាគម្រោងបានសិក្សា អស់រយៈពេលជាច្រើនខែកន្លងមកហើយនោះ”។
លោកភក្តីបានបន្ថែមថា នៅក្នុងផែនការនេះរដ្ឋបាលរាជធានី គ្រោងនឹងបើកការដ្ឋានសាងសង់ស្ពានអាកាស និងផ្លូវក្រោមដីចោមចៅ ឲ្យបានមុនចូលឆ្នាំប្រពៃណីខ្មែរនាខែមេសា ឆ្នាំ២០១៨ខាងមុខនេះ ។ ជាលទ្ធផល នៃកិច្ចប្រជុំពិភា ក្សានេះ បានឯកភាពទៅលើជម្រើសក្នុងការពិចារណាពីខាងដើម ដែលមានចំនួន៧គម្រោង ដោយបានឯកភាពយកជម្រើសមួយចុងក្រោយ ដែលក្នុងជម្រើសនោះមានផលប៉ះពាល់តិចតួចបំផុត ក្នុងចំណោមជម្រើសផ្សេងៗ ហើយអាចកាត់បន្ថយការកកស្ទះចរាចរណ៍នៅក្នុងតំបន់ចោមចៅបាន។
បច្ចុប្បន្ននេះនៅក្នុងរាជធានីភ្នំពេញ មានស្ពានអាកាសចំនួន៥កន្លែង គឺស្ពានអាកាសក្បាលថ្នល់ នៅអតីតរង្វង់មូលក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ថិតនៅស្តុបពេទ្យលោកសង្ឃ និងស្ពានអាកាស ៥មករា ស្ថិតនៅស្ដុបតិចណូ ហើយបច្ចុប្បន្នសំណង់ស្ពានអាកាសមួយនៅស្តុបផ្សារដីហុយក៏ស្ថាបនាជិតរួចរាល់ហើយដែរ៕
