ដោយ ៖ រ៉ាណេត
ភ្នំពេញ ៖ រដ្ឋាភិបាលកម្ពុជា តាមរយៈក្រសួងពាណិជ្ជកម្ម នឹងរៀបចំមហាព្រឹត្តិការស្ដីពី «ទិវាកម្ពុជា ២០២០ Cambodia Festival 2020 » នៅទីក្រុងតូក្យូ ប្រទេសជប៉ុន ដើម្បីពង្រីកការផ្សព្វផ្សាយពីសិល្បៈ វប្បធម៌ អរិយធម៌ ទេសចរណ៍ ជំរុញការចាប់អារម្មណ៍ និងទាក់ទាញការវិនិយោគមកកាន់កម្ពុជាបន្ថែមទៀត។
ផ្អែកតាមសេចក្ដីជូនដំណឹងរបស់ក្រសួងពាណិជ្ជកម្ម ដែលគេហទំព័រ Propertyarea.asia ទទួលបាននៅមុននេះបន្តិចបានបញ្ជាក់ថា ជាបង្កើនភាពទាក់ទាញលើការវិនិយោគ និងទេសចរណ៍ គណៈកម្មាធិការរៀបចំពិព័រណ៍ពាណិជ្ជកម្ម សហការជាមួយស្ថានទូតនៃព្រះរាជាណាចក្រកម្ពុជា ប្រចាំនៅប្រទេសជប៉ុន នឹងរៀបចំ ទិវាកម្ពុជា២០២០ (Cambodia Festival 2020) ដែលនឹងប្រព្រឹត្តទៅចាប់ពីថ្ងៃទី០៣-០៤ ខែឧសភា ឆ្នាំ២០២០ នៅទីតូក្យូ ប្រទេសជប៉ុន ។
ជាមួយនឹងមហាព្រឹត្តិការណ៍ប្រចាំឆ្នាំ២០២០មួយនេះ គ្រប់បណ្តាពាណិជ្ជករ សេវាករ និងផលិតករ ដែលជាម្ចាស់ក្រុមហ៊ុន សហគ្រាស ដែលមានចំណាប់អារម្មណ៍សុទ្ធតែមានឱកាសចូលរួម និងផ្សព្វផ្សាយនូវប្រភេទសាវាកម្ម និងផលិតកម្មរបស់ខ្លួន ជាពិសេសអាចមានឱកាសស្វែងរកក្រុមហ៊ុនសហការជាដៃគូពាណិជ្ជកម្មតាមរយៈព្រឹត្តិការណ៍នេះបាន ដោយធ្វើការបំពេញសំណុំបែបបទនៅនាយកដ្ឋានកិច្ចការពិព័រណ៍នៃអគ្គនាយកដ្ឋានជំរុញពាណិជ្ជកម្ម ក្រសួងពាណិជ្ជកម្ម ។
ទំហំពាណិជ្ជកម្មសរុបរវាងកម្ពុជា - ជប៉ុន មានចំនួន ២,១ ពាន់លានដុល្លារ គិតចាប់ពីខែមករា ដល់ខែវិច្ឆិកាឆ្នាំ២០១៩ កើនឡើង ១២,៩៥ ភាគរយ បើប្រៀបធៀបនឹងរយៈពេលដូចគ្នាក្នុងឆ្នាំ ២០១៨ ដែលមានទំហំពាណិជ្ជកម្ម ១,៨៦ ពាន់លានដុល្លារ។ ទំនិញនាំចេញពីកម្ពុជាទៅជប៉ុនមានតម្លៃជិត ១,៦០ ពាន់លានដុល្លារ កើនឡើង ៧,៧ ភាគរយ ពី ១,៤៨ ពាន់លានដុល្លារក្នុងឆ្នាំ ២០១៨។ ការនាំចូលពីជប៉ុនមានតម្លៃ ៥០២,៨៨ លានដុល្លារកើនឡើង ៣៣,៩ ភាគរយពី ខណៈដែលឆ្នាំ២០១៨ មានត្រឹម ៣៧៥,៧០ លានដុល្លារ ៕
