ដោយៈ រ៉ាណេត
ភ្នំពេញៈ គម្រោងអភិវឌ្ឍន៍លំនៅដ្ឋានដែលមានតម្លៃមធ្យម និងក្រោមមធ្យមចំនួន៣ធំៗ សរុបជិត១០,០០០ខ្នង ក្រោមទុនវិនិយោគជាច្រើនរយលានដុល្លារ នឹងត្រូវបញ្ចប់ការសាងសង់នៅពេលឆាប់ៗខាងមុខនេះ ខណៈដែលគម្រោងខ្លះសម្រេចបាន៩០ភាគរយ។
គម្រោងលំនៅដ្ឋានតម្លៃសមរម្យធំៗចំនួន៣ ដែលមានលំនៅដ្ឋានសរុបចំនួន៨ ៣៣១ខ្នងស្ថិតនៅទីតាំងផ្សេងៗពីគ្នា នឹងបញ្ចប់ការសាងសង់ក្នុងពេលឆាប់ៗខាងមុខនេះរួមមាន ទី ១ -គម្រោង «ទីក្រុងរណបសុភមង្គល» របស់ក្រុមហ៊ុន Woldbridge Homes Co.,Ltd អភិវឌ្ឍន៍នៅលើផ្ទៃដីទំហំ៤៥ហិកតា ជាមួយទុនវិនិយោគប្រមាណ១០០លានដុល្លារ ស្ថិតនៅភូមិកោះគរ សង្កាត់រកាខ្ពស់ ក្រុងតាខ្មៅ ខេត្តកណ្តាល មានចម្ងាយប្រមាណ១៨គីឡូម៉ែត្រពីរាជធានីភ្នំពេញ សាងសង់សម្រេចបាន៩០ភាគរយ។
ទី២ គម្រោងអភិវឌ្ឍលំនៅឋានតម្លៃសមរម្យ «បុរីសែនមនោរម្យព្រែកតាទែន» អភិវឌ្ឍដោយក្រុមហ៊ុន B&BM Development Co.,Ltd មានទីតាំងស្ថិតនៅភូមិស្លែងដីដុះ ឃុំព្រែកតាទែន ស្រុកពញាឭ ខេត្តកណ្តាល សម្រេចបាន៥០ភាគរយ។
ទី៣- គម្រោងអភិវឌ្ឍលំនៅដ្ឋានតម្លៃសមរម្យ «ហ្រ្កេនផាក» ដំណាក់កាលទី ១ មានទីតាំងស្ថិតនៅភូមិទួលកី សង្កាត់ភ្លើងឆេះរទេះ ខណ្ឌពោធិ៍សែនជ័យ រាជធានីភ្នំពេញ សម្រេចបាន៦៧ភាគរយ។ ក្រៅពីនេះនៅមានគម្រោងបណ្តុំ សំណង់លំនៅដ្ឋានលក្ខណៈបុរីមួយចំនួនទៀតដែលមិនត្រូវបានរាប់បញ្ចូល។
អគ្គនាយកក្រុមហ៊ុន PREMIUM Group លោក ម៉ាន់ ចាន់ឌី បានមានប្រសាសន៍បញ្ជាក់ប្រាប់តាមទូរស័ព្ទ កាលពីល្ងាចថ្ងៃទី២០ ខែមករាកន្លងមកថា ចំនួននៃការលំនៅ ដ្ឋានខាងលើនេះ នៅមិនទាន់គ្រប់តម្រូវការរបស់ទីផ្សារនៅឡើយនោះទេ ដែលវានៅទាមទារឱ្យមានការផ្គត់ផ្គង់បន្ថែមទៀត។
លោកបានបន្តថា “បច្ចុប្បន្ននេះ អ្នកដែលមិនទាន់មានលំនៅដ្ឋានកម្មសិទ្ធិស្នាក់នៅសមរម្យនៅមានចំនួនច្រើន ហើយវានឹងបន្តទៅឆ្នាំខាងមុខនទៀត ដោយមិនទាន់អាចកំណត់បាន”។ លោកបានបញ្ជាក់ថា “ខ្ញុំសុំនិយាយត្រឹមតំបន់ក្រុងភ្នំពេញ ដែលពីមួយឆ្នាំៗមានកំណើនមនុស្សចូលមករស់នៅកាន់តែច្រើន ដែលក្នុងនោះរាប់ទាំងសិស្សនិស្សិតដែលមកពីខេត្តបន្តការសិក្សា ទាំងអ្នកចំណូលថ្មីដែលមកប្រកបការងារ និងមុខជំនួញផ្សេងៗ ជាពិសេសអ្នកដែលទើបតែមានគ្រួសារថ្មីជាដើម គឺសុទ្ធតែមានតម្រូវការលើវិស័យលំនៅដ្ឋានទាំងអស់”។
លោកចាន់ឌីបានបន្តថា អ្វីដែលសំខាន់ អ្នកផ្គត់ផ្គង់ត្រូវដឹងពីលទ្ធភាពរបសអតិថិជនគោលដៅ ដើម្បីកំណត់ថ្លៃដើមក្នុងការសាងសង់ រួមជាមួយនឹងការផ្តល់ភាពងាយស្រួលក្នុងការទិញ។
លោកឧកញ៉ា នួន រិទ្ធី អគ្គនាយកក្រុមហ៊ុនអចលនទ្រព្យ Khmer Foundation Appraisal ដែលកំពុងអភិវឌ្ឍន៍លំនៅដ្ឋានកម្រិតមធ្យម កៀនស្វាយ ផាក ស្ថិតនៅភូមិស្រែអំពិល ឃុំឈើទាល ស្រុកកៀនស្វាយ ខេត្តកណ្តាល បានមានប្រសាសន៍ថា បច្ចុប្បន្ន ក្រុមហ៊ុនអ្នកអភិវឌ្ឍវិស័យលំនៅដ្ឋាន បានផ្តល់ភាពងាយស្រួលជាច្រើន ដល់អតិថិជនក្នុងការទិញ ដោយផ្តល់ជម្រើស តាមរយៈវិធីសាស្ត្របង់រំលោះជាមួយក្រុមហ៊ុនផ្ទាល់ ឬជាមួយធនាគារជាដៃគូ។
លោកឧកញ៉ាបានបន្តទៀតថា វិធីសាស្ត្រទិញផ្ទះដោយការបង់រំលោះ គឺមានប្រជាប្រិយភាពខ្លាំង ដោយសារតែចំនួននៃការបង់ប្រចាំខែ ពួកគាត់សុទ្ធតែអាចមានលទ្ធភាពធ្វើទៅបាន ស្របពេលដែលចំណូលប្រចាំខែរបស់ពួកគាត់ មានភាពល្អប្រសើរជាងពេលមុន។
លោកឧកញ៉ាបានបញ្ជាក់ថា “សេដ្ឋកិច្ចកម្ពុជាពេលនេះ មានភាពល្អប្រសើរជាងមុន ដែលជំរុញឱ្យប្រជាពលរដ្ឋ មន្ត្រីរាជការអាចទទួលបានចំណូលសមរម្យ ដែលអាចមានលទ្ធភាពគ្រប់គ្រាន់ ក្នុងទិញដោយបង់រំលោះក្នុងរយៈពេលវែង”។ លោកបានបញ្ជាក់ថា “មិនថាពេលនេះ ឆ្នាំក្រោយ ឬឆ្នាំណានោះទេ វិស័យលំនៅដ្ឋាននៅតែមានតម្រូវការជានិច្ច”៕
