ដោយ ៖ រ៉ាណេត
ភ្នំពេញ ៖ ស្ថានភាពទីផ្សារលំនៅដ្ឋាននៅដើមឆ្នាំ២០២០នេះ ត្រូវបានអ្នកជំនាញនៅក្នុងវិស័យនេះធ្វើការអះអាងថាមានភាពស្ងប់ស្ងាត់បន្តិច ស្របពេលការផ្គត់ផ្គង់មានការកើនឡើងយ៉ាងគំហុក។
ស្របពេលដែលស្ថានភាពទីផ្សារលើវិស័យដីធ្លីមានភាពស្ងប់ស្ងាត់នៅដើមឆ្នាំ២០២០នេះ ងាកមកចាប់អារម្មណ៍នឹងវិស័យលំនៅដ្ឋានគ្រប់ប្រភេទក៏មិនសូវមានសកម្មភាពពុះកញ្ជ្រោលដូចកាលពីដើមឆ្នាំ២០១៩នោះដែរ។
អគ្គនាយកក្រុមហ៊ុនអចលនទ្រព្យ TOWN CITY Real Estate លោក វ៉ន ចាន់ថន បានមានប្រសាសន៍ប្រាប់តាមទូរស័ព្ទកាលពីព្រឹកថ្ងៃទី៣០ ខែមករា ឆ្នាំ២០២០ នេះថា ការទិញ-លក់លំនៅដ្ឋាននៅដើមឆ្នាំ២០២០នេះ ហាក់មានភាពស្ងប់ស្ងាត់ ហើយតំបន់ខ្លះមានសកម្មភាព ប៉ុន្តែតិចតួចបំផុត។ លោកបន្តថា “ជាទូទៅសម្រាប់វិស័យលំនៅដ្ឋាន គឺតែងមានភាពស្ងប់ស្ងាត់នៅរៀងរាល់ចុងឆ្នាំ និងដើមឆ្នាំ ប៉ុន្តែអាចឈានចូលចុងត្រីមាសមួយនៃដើមឆ្នាំអាចនឹងមានសកម្មភាពឡើងវិញ”។ លោកបានបញ្ជាក់ថា “លំនៅដ្ឋានគ្រប់ប្រភេទនៅតែមានតម្រូវការទីផ្សារ ជាពិសេសប្រភេទលំនៅដ្ឋានតម្លៃសមរម្យ និងក្រោមមធ្យម ដែលមានតម្រូវការខ្ពស់ជាងគេ ជាមួយតម្លៃត្រឹមក្រោម១០ម៉ឺនចុះក្រោម”។
អគ្គនាយកក្រុមហ៊ុនអចលនទ្រព្យ Easy Property Investment Co.,Ltd លោក ម៉ម សិរីបញ្ញា បានមានប្រសាសន៍ថា ចាប់តាំងពីចុងឆ្នាំ២០១៩រហូតមកដល់ដើមឆ្នាំ២០២០ នេះ សកម្មភាពនៃការទិញ-លក់ លំនៅដ្ឋានគ្រប់ប្រភេទហាក់មានភាពថមថយជាងកាលពីឆ្នាំកន្លងទៅ។ លោកបានបន្តថា “តាមការសង្កេតរបស់ខ្ញុំចាប់តាំងពីពាក់កណ្តាលឆ្នាំ២០១៩រហូតមកដល់ដើមឆ្នាំ២០២០នេះ គឺមានតែការដាក់លក់ និងជួល ប៉ុន្តែមិនសូវមានអ្នកទិញនោះទេ”។
លោក ម៉ម សិរីបញ្ញា បានមានប្រសាសន៍បន្តទៀតថា “នៅដើមឆ្នាំនេះ មានតែសកម្មភាពអ្នកដើរទិញដី ប៉ុន្តែមិនចាប់អារម្មណ៍នឹងការទិញលំនៅដ្ឋាននោះទេ ប៉ុន្តែអាចរង់ចាំរហូតដល់ពាក់កណ្តាលឆ្នាំ នឹងមានសកម្មភាពឡើងវិញ ជាពិសេសក្រោយពេលដែលក្រុមហ៊ុនអភិវឌ្ឍផ្លាស់ប្ដូរវិធីសាស្ត្រក្នុងការលក់ ដែលអាចជាការផ្តល់ជម្រើសកាន់តែងាយស្រួលដល់អតិថិជន”៕
