ដោយ ប៊ី
ភ្នំពេញៈ ធនាគារពិភពលោកនឹងកែប្រែឡើងវិញ នូវការព្យាករណ៍កំណើនសេដ្ឋកិច្ចសកលរបស់ខ្លួនថា នឹងធ្លាក់ចុះដោយសារការផ្ទុះឡើងនៃជំងឺកូរ៉ូណាវីរុសថ្មី។
កាលពីខែមុន ធនាគារពិភពលោកព្យាករណ៍ពីការស្ទុះងើបឡើងវិញ នៃកំណើនសេដ្ឋកិច្ចពិភពលោកនៅឆ្នាំនេះ បន្ទាប់ពីការបន្ធូរបន្ថយភាពតានតឹងពាណិជ្ជកម្ម រវាងអាមេរិក និងចិនដែលបានរួមចំណែកដល់ការធ្លាក់ចុះនៅឆ្នាំ២០១៩។
ប៉ុន្តែលោកDavid Malpass ប្រធានធនាគារពិភពលោក បានព្រមានវីរុសថ្មីនេះ ដែលបានសម្លាប់មនុស្សរាប់រយនាក់ នៅក្នុងប្រទេសចិន និងបានបិទអាជីវកម្មនិងព្រំដែនដែលបង្កការគំរាមកំហែងដល់ការព្យាករណ៍ពីកំណើនសេដ្ឋកិច្ច។
លោក Malpass បាននិយាយថា “នឹងមានការធ្លាក់ចុះនៃការព្យាករណ៍យ៉ាងហោចណាស់នៅដើមឆ្នាំ២០២០ ដោយសារតែការផ្ទុះឡើងជំងឺកូរ៉ូណាវីរុស នៅប្រទេសចិន ហើយមួយផ្នែកដោយសារតែបណ្តាញផ្គត់ផ្គង់សាកល”។
លោក Malpass បានថ្លែងថា “ទំនិញចិនជាច្រើន បានចេញមកក្រៅពិភពលោកតាមរយៈយន្តហោះដែលដឹកអ្នកដំណើរ។ក្នុងន័យនេះលោកសំដៅថា ទំនិញចិនមានធ្លាក់ចុះ”។
ប៉ុន្តែក្រុមហ៊ុនអាកាសចរណ៍នៅទូទាំងពិភពលោក បានផ្អាកការហោះហើរទៅកាន់ និងពីប្រទេសចិន និងប្រទេសជិតខាងមួយចំនួនរបស់ខ្លួនបានបិទព្រំដែនរបស់ខ្លួន “អ្នកត្រូវកែសម្រួលខ្សែសង្វាក់ផ្គត់ផ្គង់ ដើម្បីយកទំនិញចេញដើម្បីធ្វើឱ្យផលិតផល ដែលសេដ្ឋកិច្ចពិភពលោកទាំងមូលកំពុងដំណើរការ”។ នេះបើយោងតាមលោក Malpass។
ទស្សនវិស័យសេដ្ឋកិច្ចរបស់ធនាគារពិភពលោកបានព្យាករណ៍ថា សេដ្ឋកិច្ចពិភពលោកនឹងកើនឡើងដល់ ២,៥% នៅឆ្នាំនេះបើធៀបនឹង២,៤%កាលពីឆ្នាំមុន។
លោកMalpass កំពុងពិភាក្សាអំពីទស្សនវិស័យសេដ្ឋកិច្ចជាមួយលោក Janet Yellen អតីតប្រធានធនាគារកណ្តាលអាមេរិក ដែលបានយល់ស្របថា វីរុសនេះនឹងបង្អាក់រីកចម្រើនរបស់ពិភពលោក។
លោកYellen បាននិយាយថា វីរុសនេះហាក់ដូចជាមានឥទិ្ធពលគួរឱ្យកត់សម្គាល់យ៉ាងហោចណាស់១ ឬ២ត្រីមាសលើប្រទេសចិន និងផ្តល់ផលប៉ះពាល់ដល់សេដ្ឋកិច្ចរបស់ខ្លួន ហើយនោះប្រាកដជាប៉ះពាល់ដល់សេដ្ឋកិច្ចពិភពលោក។
ធនាគារពិភពលោកនៅថ្ងៃចន្ទ ទី៣ ខែកុម្ភៈ បានអំពាវនាវដល់បណ្តាប្រទេសនានានៅទូទាំងពិភពលោកពង្រឹង “ប្រព័ន្ធតាមដាន និងឆ្លើយតបសុខភាព” របស់ខ្លួន ហើយបានឱ្យដឹងថា ខ្លួនកំពុងសំឡឹងមើលនូវធនធាន និងជំនាញណាដែលវាអាចចូលរួមក្នុងការប្រយុទ្ធប្រឆាំងនឹងជំងឺនេះ។
វីរុសនេះបានលេបត្របាក់ជីវិត មនុស្សយ៉ាងហោចណាស់៤៩០នាក់ នៅក្នុងប្រទេសចិនដែលលើសពីចំនួនអ្នកស្លាប់៣៤៩នាក់ ដែលបណ្តាលមកពីការផ្ទុះរោគសញ្ញាធ្ងន់ធ្ងរនៃជំងឺផ្លូវដង្ហើមធ្ងន់ធ្ងរ (SARS) កាលពីឆ្នាំ ២០០២-២០០៣៕ (rappler)
