ដោយ គង់ សូរិយា
ភ្នំពេញ៖ ក្រុមហ៊ុន Prince Real Estate Group ដែលជាក្រុមហ៊ុនយក្សមានមូលដ្ឋាននៅប្រទេសចិន បានបង្ហាញគំរោងមជ្ឈមណ្ឌលពាណិជ្ជកម្ម និងលំនៅ ដ្ឋានដ៏ធំមួយទៀតនៅខេត្តព្រះសីហនុ។
តាមរយៈបណ្តាញព៌តមានសង្គមរបស់ខ្លួន ក្រុមហ៊ុននេះបានសរសេរថា នៅថ្ងៃទី២៦ កុម្ភៈ ព្រីនស៍ ស៊ីធី សិនធើ ស្ថិតនៅលើផ្ទៃដីទំហំ១៦ហិកតា កណ្តាលទីក្រុងព្រះសីហនុ។ គំរោងនេះមានទីតាំងក្បែរនឹងសណ្ឋាគារលំដាប់ផ្កាយ៥ ព្រីនស៍ថាម ហូថេល ដែលជាគម្រោងបណ្តុំនូវអគារចម្រុះលំដាប់ខ្ពស់ មានដូចជា៖អគារស្នាក់នៅ អគារការិយាល័យ និងតំបន់លំហែកាយតាមតំបន់ឆ្នេរសមុទ្រអន្តរជាតិ។
ក្រុមហ៊ុន Prince Real Estate ជាក្រុមហ៊ុនយក្សមួយ ដែលបាននិងកំពុងវិនិយោគលើមជ្ឈមណ្ឌលពាណិជ្ជកម្ម លំនៅដ្ឋាននៅរាជធានីភ្នំពេញ និងខេត្តព្រះសីហនុ។ នៅរាជធានីភ្នំពេញ ក្រុមហ៊ុននេះបានវិនិយោគលើគំរោងលំនៅដ្ឋានបែបអាជីវកម្ម និងខុនដូ Diamond One នៅទីក្រុងកោះពេជ្រ និងមជ្ឈមណ្ឌលលំនៅដ្ឋាន និងអាគារពាណិជ្ជកម្ម Prince Plaza កំពស់៣៩ជាន់ ស្ថិតនៅតាមមហាវិថីព្រះនរោត្តម។
អ្នកនាង អាន សុធីតា នាយិកាប្រចាំប្រទេសនៃក្រុមហ៊ុន CBRE Cambodia បានថ្លែងថា ក្រុមហ៊ុនវិនិយោគចិនជាច្រើនបាន និងកំពុងវិនិយោគនៅកម្ពុជាហើយ ពួកគេផ្តោតលើអតិថិជនចម្រុះ ប៉ុន្តែអ្វីគួរឲ្យកត់សំគាល់គឺគំរោងរបស់ក្រុមហ៊ុនចិននីមួយៗ ជាគំរោងដែលមានទំហំធំៗ ដោយមិនសូវបានគិតពីភាពបៃតង ឬលំហបៃតងក្នុងគំរោងរបស់ពួកគេនោះទេ។
អ្នកនាងបន្តថា “នេះជាអ្វីដែលគួរយកចិត្តទុកដាក់ ហើយរដ្ឋាភិបាលគួរគិតគូរពីបញ្ហានេះផងដែរ។
នាយកប្រតិបត្តិនៃក្រុមហ៊ុន Prince Real Estate បានថ្លែងថា ការវិនិយោគនៅកម្ពុជា ដោយសារទំនាក់ទំនងល្អប្រសើររវាងរដ្ឋាភិបាល នៃប្រទេសទាំងពីរ និងគោលនយោបាយខ្សែក្រវ៉ាត់មួយ ផ្លូវមួយ ដែលផ្តល់ផលប្រយោជន៍ជាច្រើនដល់ក្រុមហ៊ុនចិន មកវិនិយោគនៅកម្ពុជា ក៏ដូចជា អ្វីដែលរដ្ឋាភិបាលចិនចង់ចូលរួមអភិវឌ្ឍន៍ប្រទេសកម្ពុជាឲ្យកាន់តែមានភាពរីកចម្រើនបន្ថែមទៀត។
លោកបន្តថា “ទំនាក់ទំនងល្អ គោលនយោបាយល្អ និងការរីកចម្រើនសេដ្ឋកិច្ចកម្ពុជា ផ្តល់ឳកាសកាន់តែច្រើនដល់អ្នកវិនិយោគ ដើម្បីឈានជើងមកកាន់ប្រទេសកម្ពុជា”៕
