ដោយ គង់ សូរិយា
ភ្នំពេញ៖ ទេសរដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ លោកជា សុផារ៉ា បានស្នើឲ្យម្ចាស់អគារទំនើបៗ បុរីលំនៅឋាន ផ្ទះល្វែងទាំងអស់ត្រូវសាងសង់សំណង់ឲ្យមានគុណភាពនិងតាមស្តង់ដារ ដើម្បីធានាបាននូវសុខសុវត្តិភាព ផាសុខភាព និងបរិស្ថានជូនដល់ប្រជាពលរដ្ឋ។
លោកជា សុផារ៉ា បានថ្លែងក្នុងពិធីបិទសន្និបាត សមាគមអ្នកអភិវឌ្ឍន៍លំនៅឋានកម្ពុជា កាលពីល្ងាចថ្ងៃទី២៧ កុម្ភះ ២០១៨កន្លងមកថា ស្របពេលដែលបុរី និងផ្ទះល្វែងមួយចំនួនបានសាងសង់ មិនសមស្របទៅតាមលក្ខណៈបច្ចេកទេស ដែលធ្វើឲ្យផ្ទះខ្លះជ្រាបទឹក ឬមានស្នាប្រេះ និងបង្កការព្រួយបារម្ភដល់អ្នករស់នៅ។ ដូចនេះ អ្នកអភិវឌ្ឍន៍លំនៅដ្ឋានទាំងអស់ ត្រូវត្រួតពិនិត្យមើលការសាងសង់នៅតាមបុរី លំនៅឋាន និងផ្ទះល្វែងរបស់ខ្លួនឲ្យបានម៉ត់ចត់ ដើម្បីបញ្ជៀសនូវហានិភ័យផ្សេងដល់ប្រជាពលរដ្ឋដែលជាអតិថិជនរបស់ខ្លួន។
លោកបន្តថា “វាជារឿងគួរឲ្យអៀនខ្មាស់ខ្លាំងណាស់ បើសិនជាយើងសាងសង់សំណង់គ្មានគុណភាព ធ្វើឲ្យបែកប្រេះ និងស្រុតលំនៅដ្ឋានដែលប្រជាពលរដ្ឋបានទិញយកទៅប្រើប្រាស់។លោកបន្តថា “សំណង់មានគុណភាព និងស្របតាមស្តង់ដាមិនត្រឹមតែជួយធានាបាននូវសុខសុវត្តិភាព ដល់អតិថិជនប៉ុណ្ណោះទេ ថែមទាំងផ្តល់នូវផាសុខភាព បរិស្ថានល្អ និងបង្កើននូវទំនុកចិត្ត និងជឿជាក់មកលើម្ចាស់បុរី សំណង់ផ្ទះល្វែងផងដែរ។
ជាមួយគ្នានេះ លោកជា សុផារ៉ាក៏បានស្នើឲ្យម្ចាស់អភិវឌ្ឍន៍លំនៅដ្ឋានទាំងអស់ ត្រូវបង្កើនសាងសង់លំនៅដ្ឋាន ដែលមានតំលៃសមរម្យសម្រាប់អ្នកដែលមានប្រាក់ចំណូលទាប និងមធ្យមខណៈដែលតំរូវការលំនៅដ្ឋាននៅកម្ពុជាក្នុងឆ្នាំៗមានប្រមាណ១ម៉ឺនផ្ទះ ស្មើនឹងប្រជាពលរដ្ឋប្រមាណ៥ម៉ឺននាក់ ខណៈកំនើនប្រជាសាស្ត្រមាន១,៥៦ភាគរយប្រចាំឆ្នាំ។
ប្រធានសមាគមអ្នកអភិវឌ្ឍន៍លំនៅឋានកម្ពុជាលោកឧកញ៉ា លី ហួរ បានគាំទ្រចំពោះការលើកឡើងរបស់ឯកឧត្តម ជា សុផារ៉ា នេះ ដោយឧកញ៉ាបានថ្លែងថា នឹងធ្វើការផ្សព្វផ្សាយបន្តដល់សមាជិក សមាជិការបស់សមាគម ដើម្បីជួយធានាឲ្យវិស័យសំណង់លំនៅដ្ឋាននៅកម្ពុជា កាន់តែមានគុណភាពក៏ដូចជាបង្កើន នូវជំនឿទុកចិត្តពីសំណាក់អ្នកវិនិយោគអន្តរជាតិ ឲ្យមកបោះទុននៅប្រទេសកម្ពុជាកាន់តែច្រើនថែមទៀត។
លោកឧកញ៉ាបានបន្តថា ដើម្បីធ្វើឲ្យសមាគមអ្នកអភិវឌ្ឍន៍លំនៅឋានកម្ពុជាយើង មានភាពរីកចម្រើន និងមានចីរភាព សមាគមបានកំណត់ទិសដៅផែនការអនុវត្តសម្រាប់ឆ្នាំ២០១៨ ដូចជា ពង្រីកកិត្តិនាម និងកិត្យានុភាពរបស់សមាគមឱ្យកាន់តែល្បីសុសសាយ ដល់អ្នកវិនិយោគវិស័យសំណង់ នៅក្នុងស្រុក និងលើឆាកអន្ដរជាតិផងដែរ និងទាក់ទាញក្រុមហ៊ុនវិនិយោគសំណង់លំនៅឋានថ្មីៗ ដែលមានសក្ដានុពលខ្លាំង ចូលជាសមាជិកសមាគមឲ្យបានជាអតិបរិមា ជាពិសេសជម្រុញឱ្យអ្នកវិនិយោគបរទេស ឱ្យមកប្រទេសកម្ពុជាកាន់តែច្រើន និងបង្កើតវេទិកាធុរកិច្ចក្នុងស្រុកសម្រាប់ពង្រឹង និងពង្រីកទំនាក់ទំនងជាមួយស្ថាប័នដែលពាក់ព័ន្ធឱ្យកាន់តែជិតស្និទ្ធថែមទៀត៕