ដោយៈ រ៉ាណេត
ភ្នំពេញៈ ការសាងសង់លំនៅដ្ឋានដែលមានភាពទាក់ទាញ និងអាចធានាបានការរស់នៅប្រកបដោយផាសុកភាពខ្ពស់ គឺជាកត្តាសំខាន់បំផុត ដែលស្ថាបត្យករត្រូវយកចិត្តទុកដាក់ និងធ្វើយ៉ាងណាឱ្យមានសោភ័ណភាព គុណភាព និងសុវត្ថិភាពខ្ពស់។
គ្រប់ម្ចាស់លំនៅដ្ឋានទាំងអស់ សុទ្ធតែប្រាថ្នាចង់បានលំនៅដ្ឋាន ដែលមានសោភ័ណភាពស្រស់ស្អាតគួរជាទីទាក់ទាញ និងអាចធានាបាននូវផាសុកភាព ក្នុងការរស់នៅប្រកបដោយភាពយូរអង្វែង។
លោកបណ្ឌិត វ៉ាន់ វ៉ាត អ្នកជំនាញផ្នែកនគរូបនីយកម្មបានមានប្រសាសន៍ឲ្យដឹងនាព្រឹកថ្ងៃទ២០ កុម្ភៈនេះថា ការសិក្សារកគំនិតថ្មីៗ ដើម្បីរំលេចចេញជាស្ថាបត្យកម្ម ដែលល្អឥតខ្ចោះ និងទាក់ទាញ គឺជាចំណុចដែលស្ថាបត្យករត្រូវគិត និងអាចធានាបានថាមានលទ្ធភាពផ្តល់នូវផាសុកភាពខ្ពស់ ដល់អ្នករស់នៅទាំងពេលបច្ចុប្បន្ន និងបន្តទៅថ្ងៃអនាគត។
លោកបន្តថា “លំនៅដ្ឋានដែលពោរពេញទៅដោយភាពទាក់ទាញ និងមានផាសុកភាពក្នុងការរស់នៅ គឺមានពាក់ព័ន្ធទៅនឹងកត្តា៣ធំៗជាសំខាន់ រួមមានកត្តាសេដ្ឋកិច្ចម្ចាស់គម្រោងលំនៅដ្ឋាន កត្តាតំបន់ និងកត្តាបច្ចេកទេស”។ លោកបណ្ឌិតបន្តទៀតថា “គ្រប់គម្រោងលំនៅដ្ឋានទាំងអស់ អ្នកជំនាញដែលជាស្ថាបត្យករ ត្រូវតែពិចារណាឱ្យបានល្អិតល្អន់ទៅលើបរិស្ថាន និងស្ថានភាពទីតាំងលំនៅដ្ឋាន ដែលស្ថិតនៅក្នុងផែនការនៃនគរូបនីយកម្មទាំងអស់”។
កាលពីសម័យមុន គម្រោងលំនៅដ្ឋានភាគច្រើន មិនសូវបានគិតគូរទៅដល់ប្រណីតភាព និងភាពយូរអង្វែងនៃការរស់នៅ ប្រកបទៅដោយផាសុកភាពនោះទេ ប៉ុន្តែបច្ចុប្បន្ននេះ សម័យកាលមានការវិវឌ្ឍជឿនលឿន ស្របពេលដែលកំណើនប្រជាសាស្ត្រទូទាំងប្រទេសកើនឡើងខ្ពស់។
អ្នកជំនាញរូបនេះបានបន្តទៀតថា នៅពេលមនុស្សមានធនធានកាន់តែច្រើន ក្រៅពីតម្រូវការចំណីអាហារ សម្លៀកបំពាក់គឺនៅប្រាថ្នាទាមទារ ទីជម្រកដែលមានភាពប្រណីត។ ជាក់ស្ដែងបច្ចុប្បន្ននេះ យើងឃើញទិដ្ឋភាពសង្គមមានការវិវឌ្ឍកាន់តែច្រើន ដូច្នេះ សម្រាប់អ្នកជំនាញផ្នែកស្ថាបត្យកម្ម ត្រូវតែមានគំនិតក្នុងការបង្កើតផែនការ ក្នុងរូបភាពថ្មីដែលតម្រូវទៅតាមស្ថានភាពនាពេលបច្ចុប្បន្ន និងបន្តទៅថ្ងៃអនាគត ហើយប្រាកដថានៅតែអាចរក្សាបាននូវភាពល្អប្រសើរ និងមានផាសុកភាពខ្ពស់។
នៅក្នុងច្បាប់នគរូបនីយកម្ម និងសំណង់ បានកំណត់ច្បាស់នូវលក្ខខណ្ឌបច្ចេកទេសក្នុងការសាងសង់សំណង់ ដែលអាចធានាបាននូវផាសុកភាព សុវត្ថិភាព ដូច្នេះសម្រាប់អ្នកជំនាញ ដែលជាស្ថាបត្យករត្រូវតែគោរព និងអនុវត្តន៍តាមក្បួនច្បាប់ ដោយបន្ថែមនូវគំនិតស្រមើស្រមៃស្របតាមបច្ចេកទេស ដើម្បីរចនាសិល្បៈស្ថាបត្យកម្មក្នុងរូបភាពថ្មី ដើម្បីបង្កើតចេញជាគម្រោង ឬប្លង់សំណង់ដែលទាក់ទាញ។
ក្រៅពីនេះ អ្វីដែលត្រូវពិចារណា គឺការរក្សាទុកនូវគម្លាតនៃហេដ្ឋារចនាសម្ព័ន្ធទាំងក្នុងលំនៅដ្ឋាន និងបរិវេញខាងក្រៅ ដែលអាចធានាបាននូវលំហូរខ្យល់អាកាសធម្មជាតិ និងពន្លឺចេញចូលគ្រប់គ្រាន់ ព្រមគ្នាជាមួយនឹងការបង្កើតនូវបរិស្ថានបៃតង នៅជុំវិញលំនៅដ្ឋានផងដែរ៕
