ដោយគង់ សូរិយា
ភ្នំពេញៈ ក្រុមហ៊ុនCPA Property Co, Ltd ដែលជាបុត្រសម្ព័ន្ឋរបស់CPA Group បាននិងកំពុងចាប់ផ្តើមដំណើរការ ដោយផ្តល់សេវាកម្មអចលនទ្រព្យថ្មីមួយ តាមរយៈសេវាកម្ដេញថ្លៃអចលនទ្រព្យ។
ក្រុមហ៊ុនដេញថ្លៃលក់អចលនទ្រព្យដំបូងគេត្រៀមចាប់ផ្តើមបង្ហាញវត្តមាននៅកម្ពុជា
នាយកប្រតិបត្តិក្រុមហ៊ុនCPA Group លោកសន សំរេចភារៈបានមានប្រសាសន៍ឲ្យដឹងនាព្រឹកថ្ងៃទី៥ មិនានេះថា ការចាប់ផ្តើមក្រុមហ៊ុនថ្មី ដោយមានអ្នកជំនាញជាតិ អន្តរជាតិ ក្នុងស្ថានភាពអចលនទ្រព្យបែបនេះជាឳកាសល្អ ដើម្បីអាចជួយអ្នកទិញលក់អចលនទ្រព្យទទួលបានសេវាកម្មប្រកបដោយទំនុកចិត្តខ្ពស់ ពិសេសសេវាកម្មដេញថ្លៃអចលនទ្រព្យ ដែលម្ចាស់អចលនទ្រព្យអាចដាក់អចលនទ្រព្យ របស់ខ្លួនដេញថ្លៃនៅក្រុមហ៊ុនបាន ដោយគ្រាន់តែម្ចាស់អចលនទ្រព្យ បង់សេវាកម្មវាយតម្លៃទីផ្សារជាមុន មុនពេលម្ចាស់អចលនទ្រព្យនោះអាចដាក់ចូលដេញថ្លៃនៅទីផ្សារបាន។
លោកបន្តថា “សេវាកម្មដេញថ្លៃអចលនទ្រព្យ នឹងជួយឲ្យម្ចាស់អចលនទ្រព្យលក់បានតាមស្ថានភាពទីផ្សារជាក់ស្តែង និងអាចលក់អចលនទ្រព្យរបស់ខ្លួនបានលឿន និងទទួលបានតម្លៃអចលនទ្រព្យរបស់ខ្លួនពិតប្រាកដ”។ លោកបន្តថា “យើងនឹងរៀបចំការដេញថ្លៃអចលនទ្រព្យ ដោយមានការចូលរួមពីអ្នកវិនិយោគជាតិ អន្តរជាតិច្រើន តាមរយៈកម្មវិធីពិសេសរបស់យើង”។
លោកសន សំរេចភារៈបានបន្តថា ក្នុងស្ថានភាពទីផ្សារអចលនទ្រព្យ ហាក់ស្ថិតក្នុងសភាពទ្រឹងបែបនេះ ម្ចាស់អចលនទ្រព្យនានាដែលត្រូវលក់ មិនគួរប្រញាប់ប្រញាល់ទេ ប៉ុន្តែពួកគេគួរដាក់អចលនទ្រព្យរបស់ពួកគេ តាមរយៈអ្នកជំនាញរបស់CPA Property Co, Ltd ដែលយើងមានអ្នកជំនាញជាតិ អន្តរជាតិរង់ចាំជួយប្រឹក្សាយោបល់ លើការទិញលក់ វាយតម្លៃ និងផ្តល់សេវាកម្មប្រកបដោយទំនុកចិត្ត ផ្តល់សេវាកម្មប្រកបដោយភាពស្មោះត្រង់ គុណធ៌ម និងប្រកបដោយស្នាមញញឹមរួសរាយរាក់ទាក់។
សេវាកម្មនេះនឹងចាប់ផ្តើមនៅពេលឆាប់ៗខាងមុខនេះ ជាមួយការិយាល័យមានទីតាំងនៅលើបណ្តោយផ្លូវ២៧១ (ហួសពីច្រកចូលវត្តសន្សំកុសល ឆ្ពោះមកក្បាលថ្នល់២០០ម៉ែត្រ) ស្ថិតក្នុងសង្កាត់បឹងទំពុន២ ខ័ណ្ឌមានជ័យ រាជធានីភ្នំពេញ៕
