ដោយ ហ្សូលី
ឥណ្ឌូនេស៊ីៈ អគារមួយដែលមានកម្ពស់ដល់ទៅជិត៣០០ម៉ែត្រ ស្ថិតនៅកណ្តាលទីក្រុងហ្សាការតា បានក្លាយជាអគារដែលខ្ពស់ជាងគេនៅប្រទេសឥណ្ឌូនេស៊ី។
ហេតុអ្វីGama Towerនៅតែឈរដំណែងអាគារខ្ពស់ជាងគេរបស់ឥណ្ឌូនេស៊ី
អគារនេះមានឈ្មោះថា Gama Tower ដែលមានកម្ពស់២៨៨.៦ ម៉ែត្រ និងមាន ៦៩ជាន់។ សាងសង់នៅលើផ្ទៃដីជាង១ហិចតា ដែលចាប់ផ្តើមបើកការដ្ឋានសាងសង់នៅឆ្នាំ ២០១១ និងបញ្ចប់នៅឆ្នាំ២០១៥។
ទុនវិនិយោគសម្រាប់អគារមួយនេះ មានចំនួន២៥០លានដុល្លារ ដែលជាអគារបម្រើវិស័យសណ្ឋាគារ រីសត និងពាណិជ្ជកម្ម។
Gama Tower គឺជាអគារការិយាល័យលំដាប់ខ្ពស់ ដែលមានការអភិវឌ្ឍរចនាបថតាមអគារបៃតង ជួយដល់បរិស្ថាន មិនធ្វើឱ្យជះឥទ្ធិពលដល់ការរស់នៅដល់ប្រជាពលរដ្ឋជិតខាងឡើយ។ ចាប់ពីជាន់ទី៥០ទៅ៦៩ គឺជាសណ្ឋាគារWestin Hotel ដែលជាសណ្ឋា គារបណ្តុំទៅដោយអភិជនស្នាក់អាស្រ័យ។
ទិដ្ឋភាព៣៦០ដឺក្រេ ដែលអាចមើលឃើញពីទេសភាព និងទីក្រុងដ៏ទាន់សម័យ ហ្សាការតាបាន ដោយគ្រាន់តែលោកអ្នកឈរនៅជាន់ទី៥១ប៉ុណ្ណោះ។
នៅអគារនោះ អាចចតយានយន្តដល់ទៅ១១០០យានយន្ត ព្រោះមានទីធ្លាចំណតធំទូលាយ បង្ករភាពងាយស្រួលដល់អតិថិជន និងបុគ្គលិក។
មកដល់បច្ចុប្បន្ន មិនទាន់មានអគារមួយណា ដែលអាចបំបែកឯទគ្គកម្មអគារមួយនេះបាននៅឡើយ ដែលជាហេតុធ្វើឱ្យគេកោតសរសើរថាGama Tower នៅតែជាអគារដែលខ្ពស់ជាងគេបំផុតនៅឥណ្ឌូនេស៊ី៕
