ដោយ ៖ រ៉ាណេត
ភ្នំពេញ ៖ នៅក្នុងការអភិវឌ្ឍន៍វិស័យលំនៅដ្ឋាននាពេលបច្ចុប្បន្ននេះ គេកត់សម្គាល់ឃើញមានច្រើនរូបភាព និងមានទំហំនៃការវិនិយោគផ្សេងៗពីគ្នា ជាពិសេសការអភិវឌ្ឍជាបណ្តុំលំនៅដ្ឋាន ដែលមានត្រឹម២០ខ្នងចុះក្រោម និងត្រូវបានគេចាត់ទុកថាជាការអភិវឌ្ឍក្នុងទ្រង់ទ្រាយតូច និងមធ្យម។
អគ្គនាយកក្រុមហ៊ុនអចលនទ្រព្យ Khmer Foundation Appraisal លោកឧកញ៉ា នួន រិទ្ធី ដែលជាអ្នកអភិវឌ្ឍន៍ក្នុងវិស័យលំនៅដ្ឋានបានមានប្រសាសន៍ប្រាប់តាមទូរស័ព្ទកាលពីថ្ងៃទី១០ ខែមីនា ឆ្នាំ២០២០ថា មិនថាចំពោះការវិនិយោគទៅលើគម្រោងអភិវឌ្ឍន៍លំនៅដ្ឋានក្នុងទ្រង់ទ្រាយធំដូចជាបុរី ឬការអភិវឌ្ឍបណ្តុំលំនៅដ្ឋានក្នុងទ្រង់ទ្រាយតូច និងមធ្យមនោះទេ គឺសុទ្ធតែស្ថិតនៅក្នុងគោលបំណងទទួលបានប្រាក់ចំណេញត្រឡប់មកវិញ ទាស់ត្រង់ថា តើត្រូវអនុវត្តនូវគម្រោងតាមវិធីសាស្ត្រមួយណាដែលអាចគ្មានហានិភ័យ។
ជាទូទៅ ការអភិវឌ្ឍទៅលើគម្រោងលំនៅដ្ឋានក្នុងទ្រង់ទ្រាយធំតែងទទួលបានការសាទរ និងគាំទ្រពីរាជរដ្ឋាភិបាល ជាពិសេស វិស័យធនាគារក្នុងនាមជាដៃគូសហការច្រើនជាងគម្រោងអភិវឌ្ឍន៍ក្នុងទ្រង់ទ្រាយតូច ដោយសារតែគម្រោងអភិវឌ្ឍន៍ទ្រង់ទ្រាយធំបានចូលចំណែកយ៉ាងសំខាន់ជាមួយរាជរដ្ឋាភិបាលក្នុងការអនុវត្តច្បាប់ ទាំងច្បាប់សំណង់ បរិស្ថាន ក៏ដូចជាការជួយបង្កើនចំណូលដល់រដ្ឋតាមរយៈការប្រកាសពន្ធលើប្រាក់ចំណេញជាដើម ហើយក៏ជាការផ្តល់នូវទំនុកដល់បណ្តាក្រុមហ៊ុនជាដៃគូ វិស័យធនាគារ និងប្រជាពលរដ្ឋដែលជាអតិថិជន។
លោកឧកញ៉ាបានមានប្រសាសន៍ទៀតថា “ជាការពិត សម្រាប់ការអភិវឌ្ឍគម្រោងធំនឹងទទួលបានផលចំណេញត្រឡប់មកវិញក៏ធំ ដោយរាល់ការចំណាយទៅលើវត្ថុធាតុដើមនៃសំណង់ និងការចំណាយលើកម្រៃកម្លាំងពលកម្មអ្នកជំនាញស្ថិតនៅក្នុងតម្លៃទាបជាងការចំណាយទៅលើគម្រោងអភិវឌ្ឍន៍ទ្រង់ទ្រាយតូច ហើយវានៅមានលទ្ធភាពទទួលបានផលល្អប្រសើរជាច្រើនទៀត។ ដោយឡែកសម្រាប់ការអភិវឌ្ឍលំនៅដ្ឋានក្នុងទ្រង់ទ្រាយតូច ថ្វីត្បិតតែងាយស្រួលក្នុងការអភិវឌ្ឍ ក៏ដូចជាការលក់ក្នុងរយៈពេលខ្លី ប៉ុន្តែអ្វីដែលជាកត្តាប្រឈមគឺធនធាននៃលំហូរសាច់ប្រាក់សម្រាប់ដំណើរការគម្រោង”។
លោកឧកញ៉ា នួន រិទ្ធី បានបញ្ជាក់ថា “សម្រាប់អ្នកដែលមានដើមទុនគ្រប់គ្រាន់សម្រាប់ដំណើរការគម្រោងអភិវឌ្ឍន៍គឺមិនសូវមានភាពប្រឈមនោះទេ មានន័យថា ក្រោយពេលសំណង់បញ្ចប់ការសាងសង់រួចរាល់ ហើយលក់មិនអស់ក៏មិនជាបញ្ហា ប៉ុន្តែសម្រាប់អ្នកដែលមានដើមទុនមិនគ្រប់គ្រាន់ ដែលពឹងអាស្រ័យទៅលើទុនពីប្រភពទី២ ឬទី៣ ដូចជាអាស្រ័យទៅលើលំហូរសាច់ប្រាក់ដែលទទួលបានពីអតិថិជនយកមកសាងសង់ ឬអាស្រ័យទៅលើកម្ចីធនាគារ វាគឺជាហានិភ័យមួយយ៉ាងធំ”។ លោកបានបន្តទៀតថា “សម្រា់អតិថិជន មុនពេលសម្រេចចិត្តទិញគម្រោងអភិវឌ្ឍន៍លំនៅដ្ឋានណាមួយចាំបាច់ត្រូវតែមានការសិក្សាឱ្យបានច្បាស់ថា តើក្រុមហ៊ុនអភិវឌ្ឍន៍មានប្រវត្តិបែបណា មានអជ្ញាប័ណ្ណ និងច្បាប់សាងសង់ទេ មានការបំបែកក្បាលរួចហើយឬនៅ ដើម្បីឱ្យមានភាពច្បាស់លាស់ក្នុងការសម្រេចចិត្ត ជៀសវាងពេលកើតមានបញ្ហាក្លាយទៅជាប្រទាក់ក្រឡាគ្នានាំឱ្យមានការខាតបង់”។
ដូចទៅនឹងការលើកឡើងខាងលើនេះ លោក អុី ពិសិដ្ឋ អគ្គនាយកក្រុមហ៊ុន Star Heritage Residence ដែលជាអ្នកអភិវឌ្ឍន៍គម្រោងលំនៅដ្ឋានទ្រង់ទ្រាយមធ្យមលើគម្រោង លំនៅដ្ឋានបែបអាជីវកម្ម ដែលមានលក្ខណៈពិសេសកូនកាត់បែបអឺរ៉ុបលើកដំបូកគេនៅកម្ពុជាបានមានប្រសាសន៍ថា “ហានិភ័យដែលអាចកើតមានទៅលើគម្រោង គឺភាគច្រើនកើតមានចំពោះអ្នកដែលមិនមែនជាអ្នកអភិវឌ្ឍន៍ពិតប្រាកដ ឬចំពោះអ្នកដែលមិនធ្លាប់មានបទពិសោធន៍ក្នុងការអភិវឌ្ឍន៍គម្រោង”។ លោកបានបន្តទៀតថា “សម្រាប់ការអភិវឌ្ឍគម្រោងលំនៅដ្ឋាន មិនថាចំពោះទ្រង់ទ្រាយបែបណានោះទេ ក្រៅពីការអនុវត្ត និងគោរពទៅតាមច្បាប់ដែលកំណត់ដោយរដ្ឋាភិបាល បញ្ហាទុនវិនិយោគគឺសំខាន់បំផុតដែលត្រូវពិចារណាមុនពេលចាប់អនុវត្តគម្រោង”។
លោក អុី ពិសិដ្ឋ បានមានប្រសាសន៍បន្តទៀតថា “នៅពេលអ្នកមានទុនគ្រប់គ្រាន់សម្រាប់អនុវត្តគម្រោង បន្ទាប់ពីទទួលបានច្បាប់អនុញ្ញាតសាងសង់ត្រឹមត្រូវ នោះដំណើរការគម្រោងអាចមានអត្រាខ្ពស់ក្នុងការទទួលបានជោគជ័យ ប៉ុន្តែសម្រាប់គម្រោងដែលមិនមានភាពច្បាស់លាស់ គ្មានទុនគ្រប់គ្រាន់ ឬទុនអាស្រ័យលើចំណូលបានពីអតិថិជនបងរំលោះប្រចាំខែ ក៏ដូចជាកម្ចីពីធនាគារ គឺជាការប្រឈមហានិភ័យដ៏ខ្ពស់បំផុត ដែលក្រៅពីខាតបង់ទ្រព្យបរាជ័យលើគម្រោង ថែមទាំងបណ្តាលឱ្យប៉ះពាល់ដល់អតិថិជន និងអ្នកអភិវឌ្ឍន៍ផ្សេងៗទៀតដែលស្ថិតនៅក្នុងវិស័យរួមគ្នាផងដែរ” ៕
