ដោយ ហ្សូលី
ភ្នំពេញៈ ស្ពានអាកាសបត់ឆ្វេងខ្សែទី១ ត្រង់ចំណុចក្បាលថ្នល់ពីមហាវិថីព្រះមុនីវង្ស បត់ឆ្វេងឆ្ពោះទៅមហាវិថីព្រះនរោត្តម នឹងដាក់ឱ្យដំណើរការមុនពិធីបុណ្យចូលឆ្នាំប្រពៃណីជាតិខ្មែរខាងមុខនេះ។
ស្ពានអាកាសបត់ឆ្វេងខ្សែទី១នៅក្បាលថ្នល់នឹងដាក់ឱ្យដំណើរការមុនពិធី បុណ្យចូលឆ្នាំខ្មែរ
លោកសាំ ពិសិដ្ឋ ប្រធានមន្ទីរសាធារណៈការ និងដឹកជញ្ជូន បានមានប្រសាសន៍ថា ស្ពានអាកាសបត់ឆ្វេងមួយខ្សែថ្មី នៅជាប់នឹងស្ពាន អាកាសក្បាលថ្នល់ចាស់នេះ ក្រុមការងារបាននិងកំពុងធ្វើការងារយ៉ាងសកម្ម ដោយអ៊ុតកៅស៊ូលើស្ពាន រៀបចំគំនូសចរាចរណ៍ដែលតភ្ជាប់ពី មហាវិថីព្រះមុនីវង្ស បត់មកមហាវិថីព្រះនរោត្តម។
លោកបន្តថា “បច្ចុប្បន្ននេះរាជធានីភ្នំពេញ ចំនួនយានយន្តរបស់ប្រជាពលរដ្ឋកើនឡើងយ៉ាងខ្លាំង ធ្វើឲ្យផ្លូវមួយចំនួនក្នុងរាជធានីភ្នំពេញ មានការកកស្ទះចរាចរណ៍ ពិសេសនៅត្រង់ចំណុចក្បាលថ្នល់នេះ”។
ការស្ថាបនាស្ពានអាកាសបត់ឆ្វេងខ្សែទី១នេះ គឺក្នុងគោលបំណងជួយសម្រួលដល់ការធ្វើដំណើរនិងកាត់បន្ថយការកកស្ទះចរាចរណ៍ ។
គម្រោងនេះគឺជាការស្ថាបនាដោយក្រុមហ៊ុនOCIC មានប្រវែង៧៧ម៉ែត្រ ដែលចាប់ពីផ្លូវដីដល់គល់ស្ពានក្បាលថ្នល់ និងពីគល់ស្ពានដល់ស្ពានអាកាសចាស់ មានប្រវែង១២៣ ម៉ែត្រមានទទឹង៧ម៉ែត្រកន្លះ។
បច្ចុប្បន្នរាជធានីភ្នំពេញ មានស្ពានអាកាសចំនួន៦កន្លែង រួមមាន ស្ពានអាកាសក្បាលថ្នល់ ស្ពានអាកាសស្ទឹងមានជ័យ ស្ពានអាកាស៧មករា ស្ពានអាកាស៥មករា ស្ពានអាកាសស្តុបផ្សារដីហុយ និងស្ពានអាកាសចោមចៅ ដែលស្ពាននេះក្រុមការងារបាន និងកំពុងសម្រុកដំណើរការសាងសង់យ៉ាងសកម្មផងដែរ៕
