បច្ចុប្បន្ននេះ ការទិញផ្ទះ ភាគច្រើនគឺត្រូវបានអនុវត្តតាមវិធីសាស្ត្រដោយទិញដោយការបង់រំលស់ ដែលប្រការនេះបានធ្វើឲ្យមានបំណុលជាប់ខ្លួនចាប់ពី 10 ទៅ 30ឆ្នាំ ទើបអាចរួចបំណុល មានន័យថា ការទិញផ្ទះគឺជាកិច្ចការដ៏ធ្ងន់ធ្ងរមួយ ព្រោះវាអាចប៉ះពាល់ដល់ប្រាក់សន្សំសម្រាប់អនាគតរបស់អ្នក។ ដូច្នេះ មុននឹងអ្នកសម្រេចចិត្តទិញផ្ទះដោយការបង់រំលស់ អ្នកត្រូវគិតឲ្យបានល្អិតល្អន់ជាមុនសិន បើមិនដូច្នេះទេ អ្នកនឹងត្រូវជំពាក់បំណុលវ័ណ្ឌករជាក់ជាមិនខាន។ តើមុននឹងទិញផ្ទះដោយការបង់រំលស់ត្រូវគិតទៅលើអ្វីខ្លះ?
01) លុយសម្រាប់បង់ថ្លៃផ្ទះ (ប្រាក់កក់) ៖ រាល់ការទិញផ្ទះបង់រំលស់ ជាដំបូងតម្រូវឲ្យអ្នកបង់ប្រាក់កក់ជាមុនសិន ដោយមានរហូតដល់ 30% បន្ទាប់មកត្រូវបង់ជាបន្តបន្ទាប់រៀងរាល់ខែ ទៅតាមចំនួនតម្លៃផ្ទះ។
02) លុយសម្រាប់បង់ប្រចាំខែ ៖ តើប្រាក់ចំណូលរបស់អ្នកអាចទ្រទ្រង់សម្រាប់បង់ថ្លៃការប្រាក់ប្រចាំខែគ្រប់គ្រាន់ដែរ ឬទេ? បើសិនជាលទ្ធភាពរបស់អ្នកនៅមិនទាន់គ្រប់គ្រាន់ទេនោះ ចូរកុំទាន់សម្រេចចិត្តទិញផ្ទះដោយបង់រំលស់អី។
03) លុយសម្រាប់តុបតែងផ្ទះ ៖ គ្រឿងសង្ហារឹមនៅក្នុងផ្ទះដែលបានទិញរួច ប្រាកដជាមិនគ្រប់គ្រាន់សម្រាប់ប្រើប្រាស់ ឬមិនត្រូវចិត្តរបស់អ្នកឡើយដូច្នេះអ្នកត្រូវការទិញថ្មីដើម្បីតុបតែលម្អបន្ថែម ឬផ្លាស់ប្ដូរ ដោយការចំណាយទៅលើការទិញគ្រឿងសង្ហារឹម ឬរបស់ប្រើប្រាស់ថ្មីនេះ មិនមែនជាលុយកាក់តិចតូចនោះទេ។
04) លុយសម្រាប់ទ្រទ្រង់គ្រួសារ ៖ ចំណុចនេះគឺសំខាន់បំផុតផងដែរ ព្រោះថាអ្នកត្រូវការលុយដើម្បីចាយវាយប្រចាំថ្ងៃ និងលុយត្រៀមបម្រុងទុកសម្រាប់គ្រាអាសន្ន។
ចំណាំ៖ បើសិនជាត្រូវបង់រំលស់ផ្ទះដោយត្រូវបង់ការប្រាក់ថ្លៃ និងប្រាក់ខែមួយខែៗក្លាយជាប្រាក់ការឲ្យគេអស់នោះ ចូរកុំទាន់សម្រេចចិត្តទិញផ្ទះដោយបង់រំលស់អី៕
