ដោយ គង់ សូរិយា
ភ្នំពេញ៖ ទីបំផុតព៌តមានដែលគេរង់ចាំជាយូរមកហើយ បានលេចចេញច្បាស់លាស់ហើយ ដោយក្រុមហ៊ុន Royal Group សហការជាមួយ Huashi Group បានសម្រេចបោះទុនរួមគ្នា១៥០លានដុល្លារ ដើម្បីសាងសង់អាគារRoyal Oneកំពស់៦២ជាន់នៅទីក្រុងភ្នំពេញ។
ការចុះហត្ថលេខារវាងក្រុមហ៊ុន OTK Royal One ដែលជាបុត្រសម្ព័ន្ឋជាមួយក្រុមហ៊ុន Royal Group ដែលតំណាងដោយលោកឧកញ៉ាគិត ធាងប្រធានក្រុមហ៊ុន OTK Royal One ជាមួយក្រុមហ៊ុន Huashi Group បានចាប់ផ្តើមកាលពីម្សិលម៉ិញនេះ ដើម្បីសាងសង់អាគារកំពស់៦២ជាន់ ស្ថិតនៅចំណុចប្រសព្វរវាងមហាវិថីសហព័ន្ឋរុស្ស៊ី និងមហាវិថីព្រះមុនីវង្ស។
លោកឧកញ៉ាគិត ធាងបានមានប្រសាសន៍ឲ្យដឹងថា ការសាងសង់អាគារខ្ពស់កប់ពពកនេះ នឹងចាប់ផ្តើមនៅខែកញ្ញាខាងមុខនេះ និងគ្រោងចំណាយពេលរយៈពេល៣ឆ្នាំដើម្បីបញ្ចប់គំរោងនេះ។
អាគារភ្លោះ Royal One នឹងប្រើប្រាស់ចម្រុះសម្រាប់ជាសណ្ឋាគារ ខុនដូ ផ្សារទំនើប អាគារការិយាល័យជាដើម។
លោកឧកញ៉ាគិត ធាងបានបន្តថា “អាគារ Royal One នឹងជាអាគារខ្ពស់ជាងគេមួយ ដែលនឹងលើកកំពស់មុខមាត់កម្ពុជានាពេលអនាគតផងដែរ”។
ប្រធានប្រឹក្សាភិបាលក្រុមហ៊ុន Hutton CPL លោកឧកញ៉ាចេង ខេងបានមានប្រសាសន៍ថា ការសាងសង់អាគារ Royal One ជារឿងល្អប្រសើរសម្រាប់សេដ្ឋកិច្ចកម្ពុជា និងឆ្លុះបញ្ចាំងពីទំនុកចិត្តរបស់អ្នកវិនិយោគ លើបរិយាកាសវិនិយោគនៅកម្ពុជា ខណៈដែលទីផ្សារអចលនទ្រព្យកំពុងមានភាពរីកចម្រើន ហេតុនេះវត្តមានអាគារនេះ នឹងជួយលើកកំពស់មុខមាត់កម្ពុជាបន្ថែមទៀត។
លោកបន្តថា “ទីតាំងសាងសង់អាគារនេះ ស្ថិតនៅចំណុចពិសេសមួយដែលអាចបញ្ចៀសបាននូវការកកស្ទះចរាចរណ៍”។លោកបន្តថា “ដោយសារកំនើននៃការមកដល់របស់អ្នកវិនិយោគ ភ្ញៀវទេសចរណ៍ និងទីតាំងអាគារនេះជាតំបន់ដ៏ទាក់ទាញ ខ្ញុំគិតថាវានឹងធ្វើឲ្យគំរោងនេះទទួលបានជោគជ័យ”៕