ដោយ ហ្សូលី
ភ្នំពេញ៖ អ្នកជំនាញលើវិស័យអចលនទ្រព្យ និងដីធ្លីបានបង្ហើបថា ដីឡូតិ៍នៅតាមតំបន់ជាយក្រុងមួយចំនួន នៅតែបន្តមានសក្តានុពលទិញលក់ច្រើន ខណៈវិស័យផ្សេងៗបានជាប់គាំងដោយសារតែវិបត្តិជំងឺកូវីដ១៩។
អ្នកជំនាញ៖ ដីឡូតិ៍នៅជាយក្រុងបន្តមានសន្ទុះទិញលក់ច្រើនទោះបីកម្ពុជាកំពុងប្រឈម
លោកសោម កែវម៉ាលីដា ដែលជាអ្នកជំនាញអចលនទ្រព្យអន្តរជាតិបានថ្លែងប្រាប់មកគេហទំព័រ Property Area Asia កាលពីរសៀលថ្ងៃទី២៧ មីនា ឆ្នាំ ២០២០កន្លងមកថា «សក្តានុពលទិញលក់ដីឡូតិ៍នៅតែមាន អំឡុងពេលមានបញ្ហាសេដ្ឋកិច្ចនេះ ដូច្នេះខ្ញុំសូមណែនាំថា បើសិនជាអ្នកដែលមានធនធានច្រើន អាចឆ្លៀតឱកាសទិញនៅពេលហ្នឹងពិតជាល្អមែនទែន។
អ្នកជំនាញរូបនេះបានបង្ហើបពីមូលហេតុ ដែលបណ្តាលឱ្យមានសន្ទុះខ្លាំងបែបនេះគឺដោយសារតែមានអ្នកលក់ច្រើន ដូច្នេះអតិថិជនអាចមានជម្រើសច្រើន ដែលជាហេតុនាំឱ្យអ្នកលក់ប្រជែងតម្លៃគ្នា។ មួយវិញទៀត ដោយសារវិបត្តិកំពុងតែមាន ហើយអ្នកលក់ក៏ត្រូវការលុយ ដើម្បីយកមកដោះស្រាយវិបត្តិបន្ទាន់ដូចជា បង់ធនាគារ ឬក៏ការចំណាយផ្សេងៗនៅក្នុងក្រុមហ៊ុន អញ្ចឹងមានតែត្រូវបង្ខំចិត្តលក់ដីធ្លី នៅក្នុងតម្លៃណាមួយខុសពីទីផ្សារឆ្ងាយ។
លោកបន្ថែមថា «អ្នកមានលុយ ឬអ្នកវិនិយោគគួរតែចាប់ឱកាសក្នុងការទិញ អញ្ចឹងពេលដែលសេដ្ឋកិច្ចងើបឡើងវិ ញបន្ទាប់ពីជំងឺបាត់បង់ឬគ្រប់គ្រងបាន នៅពេលដែលគាត់លក់វិញគឺអាចចំណេញបាន។លោកបន្តថា “ចុងឆ្នាំនេះអាចនឹងមានសន្ទុះទិញលក់វិញបានហើយ ដោយកម្ពុជានឹងបើកទ្វារសេដ្ឋកិច្ចទីផ្សារសេរីជាមួយខាងចិនជាដើម។
អគ្គនាយក ក្រុមហ៊ុនអចលនទ្រព្យ Utrust លោក ម៉ន សុខាបានឱ្យដឹងថា តំបន់ដីឡូតិ៍នៅម្តុំផ្លូវជាយក្រុងគឺផ្លូវជាតិលេខ៥១ អាចត្រូវប៉ាន់ច្រើន ដោយសារសក្តានុពលផ្លូវ និងព័ត៌មានរបស់រដ្ឋាភិបាល ដែលផ្សាយថាតម្រូវឱ្យរោងចក្រ សហគ្រាសត្រូវរើទៅកាន់ជាយក្រុង រួមទាំងគម្រោងអភិវឌ្ឍយក្សៗ មកពីបណ្តាប្រទេសនានាដូចជាចិនជាដើម។
លោកបានបញ្ជាក់ថា “ម្យ៉ាងដោយសារតម្លៃដីនៅជាយក្រុង កាន់តែមានភាពធូរថ្លៃដូច្នេះចរន្តនៃការទិញលក់មានច្រើន ហើយសម្រាប់ឱកាសនៅក្នុងការចំណេញ ក៏មានខ្ពស់ទៅតាមហ្នឹងដែរ។
មួយវិញទៀត លោកពន្យល់ថាដីឡូតិ៍នៅតែអាចលក់ចេញបាន ព្រោះថាអ្នកលក់បានប្រើប្រាស់យុទ្ធសាស្ត្រលក់ តាមប្រព័ន្ធទំនាក់ទំនងសង្គមនានា ដោយមិនចាំបាច់ត្រូវចុះជួបភ្ញៀវនៅទីតាំងផ្ទាល់ឡើយដោយហេតុថា រដ្ឋាភិបាលបិទមិនឱ្យមានការជួបជុំ៕
