ដោយៈ រ៉ាណេត
ភ្នំពេញៈ អ្នកជំនាញនៅក្នុងវិស័យអចលនទ្រព្យកម្ពុជា នៅតែបង្ហាញពីសុទិដ្ឋិនិយមខ្ពស់ទៅលើការទិញដី នៅតាមបណ្តាតំបន់ជាយក្រុង ទុកវិនិយោគបន្តយកចំណេញ ខណៈដែល នៅក្នុងស្ថានភាពប្រឈមនឹងវិបត្តិជំងឺ Covid-19 អាចមានឱកាសទទួលបានតម្លៃទាបជាងទីផ្សារ និងមានជម្រើសកាន់តែច្រើន។
នាយិកាប្រចាំប្រទេសក្រុមហ៊ុនអចលនទ្រព្យអន្តរជាតិ CBRE Cambodia លោកស្រី អាន សុធីតា បានមានប្រសាសន៍ប្រាប់តាមទូរស័ព្ទ ដោយទទួលស្គាល់ថា វិបត្តិនៃជំងឺ Covid-19 ពិតជាបានធ្វើឱ្យប៉ះទង្គិចនឹងភាពល្អប្រសើរ នៃវិស័យអចលនទ្រព្យនៅកម្ពុជាមែន ប៉ុន្តែក្នុងកាលទេសៈនេះ វាក៏ជាឱកាសល្អសម្រាប់អ្នក ដែលមានលំហូរសាច់ប្រាក់គ្រប់គ្រាន់ក្នុងការវិនិយោគវិស័យដីធ្លីផងដែរ។
លោកស្រីបញ្ជាក់ថា “នៅក្នុងកាលទេសៈនេះ សម្រាប់អ្នកដែលមានបញ្ហាលើចរន្តសាច់ប្រាក់អាចនឹងជួបវិបត្តិ ហើយបង្ខំចិត្តព្យាយាមជម្រុញ ការលក់អចលនទ្រព្យរបស់ខ្លួនឱ្យបានឆាប់រហ័ស រហូតអាចដាក់តម្លៃទាបជាងទីផ្សារ ដែលវាជាការប្រឈមនឹងហានិភ័យខ្ពស់។លោកស្រីបន្ថែមថា “ភាពប្រឈមទាំងអស់នេះ ភាគច្រើនគឺអាចកើតមានចំពោះអ្នករកស៊ីកម្រិតទាប ដែលមិនមានធនធានគ្រប់គ្រាន់តែប៉ុណ្ណោះ។
លោកស្រីអាន សុធីតា បានមានប្រសាសន៍បន្តទៀតថា នៅក្នុងស្ថានការណ៍នេះ បើនិយាយចំពោះអ្នក ដែលមានធនធានគ្រប់គ្រាន់ មានលំហូរសាច់ប្រាក់ល្អ គឺមានឱកាសខ្ពស់ ក្នុងការឆក់យកផលចំណេញពីការវិនិយោគ ជាពិសេសវិស័យដីធ្លីស្ថិតនៅតាមតំបន់ជាយក្រុងនានា ដែលមានទំហំសមល្មមសម្រាប់អភិវឌ្ឍន៍លំនៅដ្ឋាន។
ស្រដៀងគ្នានឹងការលើកឡើងខាងលើនេះ លោក ម៉ាន់ ចាន់ឌី អគ្គនាយកក្រុមហ៊ុន PREMIUM Group បានមានប្រសាសន៍ថា “បច្ចុប្បន្ននេះ អ្នកមានបញ្ហាលំហូរសាច់ប្រាក់ ឬមានតម្រូវការចាំបាច់ក្នុងការបង្វិលលុយសង់គេ គឺព្យាយាមលក់ចេញ ដោយឡែកសម្រាប់អ្នកដែលមានលុយច្រើន ព្យាយាមដើរទិញដីទុក ដោយសារតែឱកាសនៃការទទួលបានដីដែលមានតម្លៃទាប និងទីតាំងល្អ គឺមានអត្រា និងមានជម្រើសច្រើន។
លោកបានបន្តទៀត “វាស្រដៀងគ្នាទៅនឹងបទពិសោធន៍ចាស់ កាលពីអំឡុងឆ្នាំ២០០៨ ដែលកម្ពុជាធ្លាប់ទទួលរងនូវចំហាយ នៃវិបត្តិសេដ្ឋកិច្ចពិភពលោកយ៉ាងដូច្នោះ។លោកបន្តថា “ពេលនោះ អ្នករកស៊ីក្នុងវិស័យអចលនទ្រព្យជាច្រើន ប្រឈមនឹងការខាតបង់យ៉ាងច្រើន ប៉ុន្តែក៏មានអ្នកជំនួញផ្នែកដីធ្លីមួយចំនួន បានដើរទិញដីទុកក្នុងអំឡុងមានវិបត្តិ ហើយលក់ចេញវិញក្រោយការទិញទុក៣-៤ឆ្នាំ បន្ទាប់ពីវិបត្តិសេដ្ឋកិច្ចមានភាពល្អប្រសើរវិញ”៕
