ដោយៈ រ៉ាណេត
ភ្នំពេញៈ មានមនុស្សជាច្រើនបានបង្ហាញពីការចាប់អារម្មណ៍ និងចង់ប្រឡូកនៅក្នុងវិស័យអចលនទ្រព្យ ត្បិតថាវិស័យមួយនេះ អាចផ្តល់ឱកាសទទួលបានចំណេញច្រើនបន្ទាប់ពីការវិនិយោគ។
ប្រការនេះត្រូវបានអ្នកជំនាញធ្វើការព្រមានថា វិស័យអចលនទ្រព្យអាចផ្ដល់ផលចំណេញច្រើន ប៉ុន្តែវាក៏អាចឱ្យជួបការខាតបង់យ៉ាងធ្ងន់ធ្ងរផងដែរ ប្រសិនបើអ្នកប្រឡូកទាំងនោះមិនមានជំនាញពិតប្រាកដ និងមិនបានស្គាល់ច្បាស់ពីវិស័យមួយនេះ។
អគ្គនាយកក្រុមហ៊ុនភ្នាក់ងារអចលនទ្រព្យ Century21 Fortuna Investment លោក វ៉ា វីរៈ បានមានប្រសាសន៍ប្រាប់ឱ្យដឹងថា នៅក្នុងរយៈពេលប្រមាណ៥-៦ ឆ្នាំចុងក្រោយ ខណៈពេលដែលវិស័យអចលនទ្រព្យនៅកម្ពុជា មានភាពរីកចម្រើនខ្លាំងបានធ្វើ ឱ្យមនុស្សជាច្រើន ងាកមកចាប់អារម្មណ៍ជាមួយនឹងវិស័យមួយនេះ ដោយអ្នកខ្លះបង្កើតជាក្រុមហ៊ុនភ្នាក់ងារលក់ អ្នកខ្លះបង្កើតក្រុមហ៊ុនអភិវឌ្ឍន៍ ហើយក៏មានមនុស្សជាច្រើនបានចំណាយលុយយ៉ាងសន្ធឹកសនន្ធាប់ ទៅលើការវិនិយោគដីធ្លី ដើម្បីទទួលបានចំណេញ។
លោកបន្តទៀតថា “ត្បិតថាវិស័យអចលនទ្រព្យ បានផ្តល់ឱកាសចំណេញច្រើនពីការវិនិយោគ ប៉ុន្តែវាក៏បានធ្វើឱ្យមនុស្សមួយចំនួន ជួបនឹងភាពខាតបង់ផងដែរ ជាពិសេសចំពោះអ្នកដែលមិនមានជំនាញ និងចំណេះដឹងពាក់ព័ន្ធទៅនឹងវិស័យមួយនេះ ហើយអ្នកខ្លះរហូតផុងខ្លួនជាប់ពាក់ព័ន្ធទៅនឹងផ្លូវច្បាប់ក៏មាន។
នៅក្នុងវិស័យអចលនទ្រព្យ គឺត្រូវបានបែងចែកចេញជាផ្នែកផ្សេងៗគ្នាជាច្រើន ដែលតម្រូវឱ្យអ្នកដែលចូលប្រឡូកនៅក្នុងវិស័យនេះ មានការស្វែងយល់ឱ្យបានច្បាស់លាស់ មុនពេលសម្រេចចិត្តចាប់កាន់ផ្នែកមួយណា នៅក្នុងវិស័យមួយនេះ ដើម្បីទទួលបានផលប្រយោជន៍។
លោកវ៉ា វីរៈ បានពន្យល់ថា “អ្នកខ្លះគាត់មិនបានយល់ច្បាស់ ពីវិស័យអចលនទ្រព្យ ហើយរឹតតែមិនមានជំនាញ ប៉ុន្តែគាត់មានសំណាងអាចទទួលបានជោគជ័យ ទៅលើការទិញ-លក់ដីធ្លី បានចំណេញច្រើន ដោយសារតែគាត់ទិញតាមគេដែលមានជំនាញ ឬអាចទិញប៉ះចំទីតាំងល្អ ដែលមានតម្រូវការប្រើប្រាស់ពីអ្នកអភិវឌ្ឍន៍ ប៉ុន្តែឱកាសនេះមិនមែនចេះតែកើតមានរហូតនោះទេ។
លោកបានបញ្ជាក់ថា សម្រាប់អ្នកដែលមានជំនាញ មានចំណេះដឹងពីវិស័យអចលនទ្រព្យពិតប្រាកដ ជាពិសេសមានធនធានគ្រប់គ្រាន់ មិនថាទោះជាស្ថិតនៅក្នុងកាលៈទេសៈណានោះទេ ភាពបរាជ័យរបស់គេគឺមានអត្រាទាបបំផុត ជាក់ស្ដែងដូចជានៅពេលបច្ចុប្បន្ននេះ ទោះជាវិស័យអចលនទ្រព្យទទួលរងនូវផលប៉ពាល់ ពីវិបត្តិសេដ្ឋកិច្ចសាកលក៏ដោយ ក៏គេមិនភ័យព្រួយនោះដែរ ដោយសារតែគេមានដាក់គោលដៅច្បាស់លាស់ទៅលើការវិនិយោគ ឬគេអាចឆក់យកឱកាសពេលមានវិបត្តិ ធ្វើជាទ្រព្យរបស់គេក៏ថាបាន ដែលខុសពីអ្នកគ្មានជំនាញ ឬមានធនធានមិនគ្រប់គ្រាន់ អាចស្ទុះស្ទារក្នុងការលក់ទ្រព្យចេញ (លក់ដី) បើទោះជាដឹងថា ទទួលបានតម្លៃទាបជាងទីផ្សារ និងប្រឈមនឹងការខាតបង់ក៏ដោយ ៕
