ដោយវុត្ថា
ភ្នំពេញៈ អ្នកជំនាញបានជំរុញឱ្យមានការវិនិយោគ លើវិស័យអចលនទ្រព្យនៅតាមបណ្តោយផ្លូវក្រវ៉ាត់ក្រុងនានា ខណៈគម្រោងរោងចក្រ សហគ្រាស បុរី បណ្តុំលំនៅឋានបែបលក្ខណៈបុរី និងផ្សារទំនើបជាដើមបាន និងកំពុងបាញ់ឆ្ពោះទៅតាមក្រវ៉ាត់ក្រុង និង ជាយក្រុងភ្នំពេញ។
អ្នកជំនាញជំរុញឱ្យវិនិយោគអចលនទ្រព្យនៅតាមបណ្តោយផ្លូវក្រវ៉ាត់ក្រុង
លោកស្រី តាំង ហ៊ួរ នាយិការក្រុមហ៊ុន Amatak property service ធ្លាប់បានប្រាប់គេហទំព័រ propertyarea.asia កន្លងមកនេះ នថា វិស័យអចលនទ្រព្យនៅតាមបណ្តោផ្លូវក្រវ៉ាត់ក្រុងនានារបស់ទីក្រុងភ្នំពេញ បាននិងកំពុងមានការរីកចំរើន តែកន្លែងខ្លះមានការរីកចំរើនលឿនដែលធ្វើឱ្យអ្នកវិនិយោគមានផលចំណេញច្រើន។
លោកស្រីបន្តថា “មិនតែប៉ុណ្ណោះនៅតាមបណ្តោយក្រវ៉ាត់ក្រុង នៅក្នុងតំបន់ខ្លះមានគម្រោងវិនិយោគជាច្រើន ទាំងរោងចក្រ សហគ្រាស និងផ្សារំនើបដែលធ្វើឱ្យតម្លៃដីធ្លីនៅក្នុងតំបន់នោះ កាន់តែមានភាពល្អប្រសើរចាប់ពីឆ្នាំ២០២០នេះតទៅ”។លោកស្រីបន្តថា “បើចង់វិនិយោគលើវិស័យអចលនទ្រព្យ ឆាប់បានចំណេញខ្ពស់ គួរវិនិយោគនៅតាមបណ្តោយផ្លូវក្រវ៉ាត់ក្រុង ដែលនៅគៀកនឹងរាជភ្នំពេញ ដូចជា ផ្លូវទំនប់កប់ស្រូវ ជាដើមដែលនៅក្បែររាជធានីភ្នំពេញ នឹងកំពុងមានសន្ទុះនៃការរីកចំរើនខ្លាំង បើទៅទិញវិយោគនៅតាមនៅកន្លែងឆ្ងាយៗ នឹងត្រូវប្រើពេលយូរ បើទិញត្រូវទិញកន្លែងដែលមានការអភិវឌ្ឍន៍ខ្លាំង”។
លោកច្រឹក សុខនីម ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា បានឱ្យដឹងដែរថា បើនិយាយផ្លូវក្រវ៉ាត់ក្រុង មានលក្ខណៈធំទូលាយណាស់ មានទី១ទី ២ ទី ៣ និងទី៤ជាដើម តែសម្រាប់តំបន់ខ្លះនៅតាមផ្លូវក្រវ៉ាត់ក្រុង មានការរីកចម្រើនយ៉ាងខ្លាំង ដោយសារមានគម្រោងវិនិយោគធំ និងតំបន់ខ្លះទៀត បាននឹងកំពុងមានសន្ទុះប ណ្តើរៗ។
លោកបន្តថា “ផ្លូវក្រវ៉ាត់ក្រុង ចាប់ពីផ្លូវជាតិលេ៤ ទៅកាន់ផ្លូវជាតិលេខ៣ មិនទាន់ពុះកញ្ជ្រោលនោះនោះទេ ព្រោះការអភិវឌ្ឍន៍នៅមានកម្រិតនឡើយ តែនៅតាមផ្លូវក្រវ៉ាត់ចាប់ពីផ្លូវជាតិលេខ៦ មានសន្ទុះរីកចំរើនខ្លាំង ព្រោះមានគម្រោងជាច្រើនបានរីកដុះដាលច្រើន”។ លោកបន្ថែមថា “សម្រាប់អ្នកដែលមានដើមទុនអាចទិញដី សម្រាប់ធ្វើការវិនិយោគ ក្នុងម៉ែត្រការ៉េតម្លៃចន្លោះពី២០០ ទៅ៣០០ដុល្លារឬច្រើនជាងនេះ គួរតែវិនិយោគនៅតាមជាយក្រុងដែលមានការអភិវឌ្ឍន៍”។
លោក ហ៊ឹម សីហា នាយកស្រាវជ្រាវក្រុមហ៊ុន VTrust Appraisal បានឱ្យដឹងថា មានគម្រោងលំនៅឋានជាច្រើនបាន និងកំពុងរីកចំរើននៅតាមបណ្តោយផ្លូវក្រវ៉ាត់ក្រុង ដែលមានទាំងបុរី និងសំណង់បែបលំនៅឋានបែបបុរី ព្រមទាំងការវិនិយោគលើវិស័យអចលនទ្រព្យ។
លោកបន្តថា “នេះជាសញ្ញាល្អ ជំរុញឱ្យប្រជាពលរដ្ឋទៅរស់នៅតំបន់ក្រវ៉ាត់ក្រុង និង ធ្វើឱ្យអោយមានការរីកចំរើនលើវិស័យអចលនទ្រព្យ”។ លោកបន្ថែមថា “ក្នុងមួយឆ្នាំៗ កម្ពុជាត្រូវការលំនៅឋានប្រមាណ ជិតម៉ឺនខ្នង”។
ជាមួយគ្នានេះ រដ្ឋបាលរាជធានីភ្នំពេញ កាលពីខែកុម្ភៈ ឆ្នាំ ២០១៩ កន្លងកនេះ ក៏បានចេញសេចក្តីជូនដំណឹងស្តីពី ផែនការរៀបចំផ្លាស់ប្តូរទីតាំងរោងចក្រ សហគ្រាស ឃ្លាំងស្តុកទំនិញ និងយានដ្ឋានជួសជុល រថយន្តធំៗ ពីតំបន់ទីប្រជុំជនទៅតំបន់ជាយក្រុង ស្ថិតនៅតាមបណ្តោយផ្លូវក្រវាត់ក្រុង ក្នុងភូមិសាស្រ្តរាជធានីភ្នំពេញ។
ក្រសួងសាធារណៈការ និងដឹកជញ្ជូនបាន និងកំពុងស្ថាបនាផ្លូវឆ្លងកាត់រាជធានីភ្នំពេញ និងខេត្តកណ្តាល ចាប់ពីស្ពានព្រែកព្នៅ មហាវិថីឈ្នះៗ (ផ្លូវកប់ស្រូវ) ផ្លូវជាតិលេខ៤ ត្រង់គីឡូម៉ែត្រលេខ១៤+១០៥ ទៅភ្ជាប់នឹងផ្លូវជាតិលេខ១ ត្រង់គីឡូម៉ែត្រលេខ២៤+៨៤០ ដោយកាត់ផ្លូវជាតិលេខ៣ ផ្លូវជាតិលេខ២ និងផ្លូវជាតិលេខ២១ ដែលគម្រោងសាងសង់រួចរាល់នៅឆ្នាំ២០២១ខាងមុខនេះ៕
