ដោយៈ រ៉ាណេត
ភ្នំពេញៈ ស្ថិតនៅក្នុងត្រីមាសទី១ ដើមឆ្នាំ២០២០ ដែលកំពុងរងការគំរាមកំហែងពីជំងឺឆ្លង Covid-19 ក្រសួងសាធារណៈការ និងដឹកជញ្ជូន តាមរយៈនាយកដ្ឋានសំណង់ប្រព័ន្ធចម្រោះទឹកកខ្វក់ បានសម្រុកអនុវត្តទៅតាមផែនការ ដែលបានគ្រោងទុកនៅក្នុងជំហ៊ានទី២ ដែលប្រើប្រាស់ថវិកានៅក្នុងគម្រោងឥណទានឆ្នាំ២០១៩ ។
ទោះជាស្ថិតនៅក្នុងស្ថានភាពនៃការប្រឈម និងប្រយុទ្ធប្រឆាំងជំងឺ Covid-19 ក៏ដោយ ក្រសួងសាធារណៈការ និងដឹកជញ្ជូន តាមរយៈនាយកដ្ឋានសំណង់ប្រព័ន្ធចម្រោះទឹកកខ្វក់បានសម្រុក និងអនុវត្តការស្ដារ និងស្ថាបនាថ្មីនូវហេដ្ឋារចនាសម្ព័ន្ធសំខាន់ៗ ដើម្បីលើកកម្ពស់សមត្ថភាព អាងចម្រោះទឹកកខ្វក់នៅក្នុងជំហ៊ានទី ដោយទទួលបានលទ្ធផលផ្លែផ្កាគួរឱ្យគត់សម្គាល់។
-->
យោងតាមរបាយការណ៍ដែលចេញផ្សាយ ដោយក្រសួងសាធារណៈការ និដឹកជញ្ជូនស្ដីពីការអនុវត្តការងារលទ្ធកម្ម សម្រាប់ការងារស្ថាបនា-ជួសជុលផ្លូវស្ពាន ប្រចាំត្រីមាសទី១ ឆ្នាំ២០២០ របស់មន្ទីរសាធារណៈការ និងដឹកជញ្ជូនរាជធានី-ខេត្ត នាយកដ្ឋាន និងអង្គភាពវិស្វកម្ម បានបញ្ជាក់ថា នៅក្នុងការអនុវត្តតាមផែនការក្នុងជំហានទី២ នៃការលើកកម្ពស់សមត្ថភាព អាងចម្រោះទឹកកខ្វក់បានសម្រេចលទ្ធផលជាច្រើន។
របាយការណ៍ដដែលនេះបានបង្ហាញថា នៅក្នុងជំហានទី២នេះ ក្រុមការងារ និងមន្ត្រី ជំនាញបានបំពាក់ម៉ូទ័របាញ់ខ្យល់បណ្តែតទឹក (៣០KW) ចំនួន៨ឈុត ម៉ូទ័របាញ់ខ្យល់បណ្តែតទឹក (២២KW) ចំនួន១៥ឈុត ម៉ូទ័របូមភក់ចំនួន៥ឈុត ម៉ូទ័របូមទឹកចំនួន២ឈុត រួមទាំងប្រព័ន្ធទុយោ និងអគ្គិសនី រួមនឹងការស្ថាបនាអាងសម្ងួតភក់ (៤០ម៉ែត្រ X ២០ម៉ែត្រ) ចំនួន១កន្លែង។ ក្រៅពីនេះ ក្រុមការងារបានបំពាក់បរិក្ខារពិសោធន៍ទឹក ចំនួន១ឈុត រួមមានពិសោធន៍សារធាតុគីមី ពិសោធន៍រូបធាតុ ពិសោធន៍មីក្រូសរីរាង្គ និងឧបករណ៍ទូទៅសម្រាប់មន្ទីរពិសោធន៍ ការងារបំពាក់ម៉ាស៊ីនភ្លើង ៦០០KVA និងប្រព័ន្ធភ្ជាប់ចំនួន១ឈុត។
ដោយឡែកការងារបំពាក់ប្រព័ន្ធ ត្រួតពិនិត្យស្វ័យប្រវត្តិកម្ម រួមមាន ប្រព័ន្ធត្រួតពិនិត្យចំនួន៥ឈុត (១ឈុតនៅស្ថានីយចម្រោះ និង៤ឈុត នៅស្ថានីយបូម) និងបន្ទប់បញ្ជាបំពាក់ដោយប្រព័ន្ធកុំព្យូទ័រចំនួន១ឈុត នៅស្ថានីយចម្រោះសម្អាតទឹកកាកសំណល់ និងស្ថានីយបូមទឹក ស្ថិតនៅក្រុងព្រះសីហនុ ខេត្តព្រះសីហនុ។
រដ្ឋមន្ត្រីក្រសួងសាធារណៈការ និងដឹកជញ្ជូន លោកទេសរដ្ឋមន្ត្រី ស៊ុន ចាន់ថុល ធ្លាប់បានមានប្រសាសន៍កាលពីពេលថ្មីៗនេះថា រាជរដ្ឋាភិបាលកម្ពុជា បានគិតគូរយ៉ាងយចិត្តទុកដាក់បំផុត រិះរកគ្រប់មធ្យោបាយ និងគ្រប់នីតិវិធី ធ្វើយ៉ាងណាមិនឱ្យទឹកកខ្វក់ហូរចូលទៅក្នុងសមុទ្រទៀតឡើយ។
លោកបញ្ជាក់ថា “ដើម្បីគ្រប់គ្រងទឹកកខ្វក់ឱ្យមានប្រសិទ្ធភាព ក្រសួងត្រូវការផែនការមេមួយជាក់លាក់ សំដៅធ្វើឱ្យប្រព័ន្ឋពហុមុខងារមួយនេះ មានប្រព័ន្ធគ្រប់គ្រងទឹកកខ្វក់ ដែលមានប្រសិទ្ធភាពខ្ពស់ស្របតាមការអភិវឌ្ឍ និងការពង្រីកវិសាលភាពរបស់ខេត្តយ៉ាងគំហុក”៕
