ដោយ វុត្ថា
ភ្នំពេញ៖ អ្នកជំនាញបានឱ្យដឹងថា តម្លៃជួលអាផាតម៉ិនដែលជាទីផ្សារដ៏សំខាន់នៅក្នុងទីក្រុងភ្នំពេញ បានធ្លាក់ចុះចន្លោះប្រមាណ៥ ទៅ១០ភាគរយនៅក្នុងដើមឆ្នាំ ២០២០ ដោយសារបង្ករឡើងដោយសារ តែការរាតត្បាតជំងឺកូវីដ១៩ និងការចាកចេញរបស់ប្រជាជនចិន។
លោកប៉ូ អ៊ាវគង់ អគ្គនាយកក្រុមហ៊ុន Advance Real Estate បានប្រាប់គេហទំព័រ propertyarea.asia នៅថ្ងៃទី ២០ ខែមេសាកន្លងមកថា ទីផ្សារអាផាតម៉ិននៅដើមឆ្នាំ ២០២០នេះ មានសភាពធ្លាក់ចុះខ្លះ បើធៀបទៅនឹងឆ្នាំចាស់ ដោយសារតែជំងឺ Covid-19និងការចាកចេញរបស់ចិន បន្ទាប់ពីការបិតហ្គេមអនឡាញនាពេលកន្លងមកនេះ។
-->
លោកបន្តថា បន្ថែមពីនេះក៏មានការផ្គត់ផ្គង់អាផាតម៉ិនថ្មីៗ ដាក់ចូលនៅក្នុងទីផ្សារផងដែរ ដែលជាកត្តាធ្វើឱ្យតម្លៃ និងការជួលធ្លាក់ចុះ រួមជាមួយនឹងតម្រូវការក៏ធ្លាក់ចុះដែរដែលមានទំហំ១០ ទៅ១៥ ភាគរយ ហើយភាគច្រើនជាតម្រូវការរបស់ជនជាតិចិន។
លោកបន្ថែមថា តម្លៃជួលនាពេលបច្ចុប្បន្ននេះ ធ្លាក់ចុះចន្លោះប្រមាណ៥ ទៅ ១០ ភាគរយ គ្រប់ប្រភេទនៃអាផាតម៉ិន បើធៀបនឹងឆ្នាំមុន។ ឧទាហរណ៍បើពីមុនយើងអាជួលក្នុងតម្លៃ១០០០ដុល្លារក្នុងមួយម៉ែត្រ យើងទំលាក់មកនូវ៨ ០០ ទៅ ៩០០ ដុល្លារក្នុងមួយម៉ែត្រការ៉េជាដើម។
លោកស្រីតាំង ហ៊ួរ នាយិកាក្រុមហ៊ុនក្រុមហ៊ុនអចលនទ្រព្យ Amatak Property Service បានឱ្យដឹងដែរថា ស្ថានភាពនៃតម្លៃជួលអាផាតម៉ិន នាពេលបច្ចុប្បន្ននេះ មានស្ថានភាពធ្លាក់ចុះ ដោយសារម្ចាស់អាផាតម៉ិនជួលឲ្យអ្នកចំណូលថ្មី ព្រោះភ័យខ្លាចចំពោះការរឆ្លងជំងឺCovid-19 ។
លោកស្រីបន្តថា សម្រាប់អ្នកដែលបានជួលរួចហើយ អស់រយៈពេលជាច្រើនខែ គឺនៅដដែលមិនមានផលប៉ះពាល់នោះទេ តែយ៉ាងណាក៏ដោយទីផ្សារមួយនេះ នឹងងើបឡើងវិញក្រោយស្ងប់ស្ងាត់នូវវិបត្តិ Covid-19 ។
ចំណែក លោកស្រីអាន សុធីតានាយិកាប្រចាំប្រទេស នៃក្រុមហ៊ុន CBRE Cambodia បានឱ្យដឹងដែរថា តម្លៃនៃការជួលអាផាតម៉ិន បានធ្លាក់ចុះប្រមាណ១០ភាគរយដោយសារតែម្ចាស់អគារមួយចំនួន បានបញ្ចុះតម្លៃជូនដល់ភ្ញៀវ ។ តែសម្រាប់ម្ចាស់អាផាមិនមួយចំនួន ក៏បានផ្តល់នូវអត្ថប្រយោជន៍ផ្សេងៗទៀតផងដែរ ជាវិធីសាស្ត្រល្អជាជាងការបញ្ចុះតម្លៃ។
លោកស្រីបន្តថា សម្រាប់ទីផ្សារនាពេលបច្ចុប្បន្ននេះវិញ ហាក់ពិបាកក្នុងការស្វែងរកភ្ញៀវជួល ដោយសារបង្កឡើងដោយវីរុស Covid-19 ។ ម្យ៉ាងទៀត ភាគច្រើននៃការជួលអាផាតម៉ិនជាជនបរទេស ហើយពួកគេត្រឡប់ទៅស្រុកកំណើតវិញ ដែលធ្វើឱ្យធ្លាក់ចុះនៃការជួល ក៏ដូចជាការស្នាក់នៅក្នុងអាគារមានការថយចុះ។
បើយោងតាមរបាយការណ៍របស់ក្រុមហ៊ុន CBRE Cambodia បានបង្ហាញថា ចំនួនអាផាតម៉ិនកើនឡើង២៣៤យូនីត ស្មើនឹង២,៧២៥យូនីតនៅក្នុងឆមាសទី៤ ឆ្នាំ ២០១៩ កើនឡើង២៨ភាគរយ បើធៀបនឹងនៅត្រីមាសទី៤ ឆ្នាំ ២០១៨ ខណៈអគារអាផាតម៉ិនថ្មីចំនួន៣ បានបញ្ចប់ការសាងសង់នៅឆមាសទី២ នៃឆ្នាំ ២០១៩ រួមមានអាគារអាផាតម៉ិន Grade A ចំនួន១ អាគារ និងGrade B ចំនួន២ អាគារ។
នៅឆ្នាំ២០២០ ខណ្ឌដូនពេញ និងទួលគោក បានត្រៀមខ្លួនទទួលចំណែកផ្គត់ផ្គង់កាន់តែច្រើនលើវិស័យអាផាម៉ិន ជាពិសេសប្រតិបត្តិករអន្តរជាតិពេញចិត្ត នឹងទីតាំងដែលនៅជិតនឹងតំបន់ពាណិជ្ជកម្ម៕
