ដោយៈ រ៉ាណេត
ភ្នំពេញៈ នៅដើមឆ្នាំ២០២០នេះ បើទោះជាបញ្ហានៃវិបត្តិជំងឺCovid-19 បានធ្វើការគំរាមកំហែង និងប៉ះពាល់ទៅលើវិស័យជាច្រើននៅកម្ពុជា ប៉ុន្តែសម្រាប់ទីផ្សារខុនត្រូវបានអ្នកជំនាញនៅក្នុងផ្នែកមួយនេះអះអាងថា នៅតែបន្តរក្សាបានភាពវិជ្ជមាន ខណៈដែលតម្រូវការទីផ្សារអតិថិជនជាតិខ្មែរ និងមាននិន្នាការក្នុងការទិញក្នុងទិសដៅផ្សេងគ្នា។
អ្នកជំនាញនៅក្នុងវិស័យអចលនទ្រព្យ លោកឡុង គឹមសួគ៌ អគ្គនាយកក្រុមហ៊ុនភ្នាក់ងារអចលនទ្រព្យអន្តរជាតិCentury21 Advance Property បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី២១ ខែមេសា ឆ្នាំ២០២០នេះ ដោយទទួលស្គាល់ថា តម្រូវការទីផ្សារខុនដូនៅកម្ពុជានាពេលបច្ចុប្បន្ននេះ គឺជាជនជាតិខ្មែរ ច្រើនជាងបរទេស ខណៈដែលអ្នកអភិវឌ្ឍន៍ ក៏បានបង្វែរទិសដៅចាប់យកអតិថិជនក្នុងស្រុកជាចម្បង។
លោកបញ្ជាក់ថា “អ្នកទិញខុនដូបច្ចុប្បន្ននេះ ជាជនជាតិខ្មែរច្រើនជាងបរទេស ប៉ុន្តែតម្រូវការរបស់ពួកគាត់ ដែលជាអ្នកក្នុងស្រុកនេះ ក៏មានកម្រិតគុណភាពនិងតម្លៃខុសពីទីផ្សារមកពីក្រៅស្រុកដែរ”។ លោកបានបន្តទៀតថា “ប្រភេទខុនដូដែលជាតម្រូវការជនជាតិខ្មែរ គឺស្ថិតនៅក្នុងតម្រិតមធ្យម និងសមរម្យ ដែលមានតម្លៃទាបចាប់ពីជាង៧ម៉ឺនដុល្លារចុះក្រោម ដែលតម្លៃនេះមិនអាចទិញផ្ទះជាប់ដីនៅក្នុងក្រុងបាននោះទេ”។
ពាក់ព័ន្ធទៅនឹងនិន្នាការនៃការទិញរបស់ជនជាតិខ្មែរ ដែលកំពុងតែមានទីផ្សារនៅពេលបច្ចុប្បន្ននេះ ត្រូវបានអ្នកជំនាញអះអាងថា មាន២ប្រភេទគឺ ការទិញដើម្បីទុកវិនិយោគយកចំណេញបន្ត និងការទិញដើម្បីបំពេញនូវតម្រូវការចាំបាច់ជាក់ស្ដែង និងចាំបាច់។
លោកឡុង គឹមសួគ៌ បានបញ្ជាក់ថា មានអតិថិជនតិចតួច បានទិញក្នុងគោលបំណងចង់ទុកវិនិយោគបន្តដោយការដាក់ជួល ឬអ្នកខ្លះលក់បន្តយកចំណេញដុលតែម្ដង ប៉ុន្តែអតិថិជនមួយក្រុមទៀតនោះ គឺទិញដើម្បីបំពេញតម្រូវការចាំបាច់របស់ពួកគាត់ ហើយក៏ជាមនុស្សដែលមានវ័យកណ្តាល ឬអ្នកដែលបន្តការសិក្សានៅមហាវិទ្យា ក៏ដូចជាអ្នកដែលទើបតែមានគ្រួសារមិនទាន់មានសមាជិកច្រើន ដែលត្រូវបម្រើការងារ និងអាជីវកម្មនៅក្នុងក្រុង។
នាយិកាប្រចាំប្រទេសក្រុមហ៊ុនCBRE Cambodia លោកស្រី អាន សុធីតាបានមានប្រសាសន៍ឲ្យដឹងនៅថ្ងៃដដែលថា “វិស័យខុនដូនៅកម្ពុជា ត្រូវបានអ្នកអភិវឌ្ឍន៍ធ្វើឡើងជា៣កម្រិត រួមមានកម្រិតខ្ពស់ សម្រាប់បំពេញតម្រូវការទៅផ្សារមកពីក្រៅស្រុក (ទីផ្សារជនបរទេស) ខុនដូកម្រិតមធ្យម និងកម្រិតសមរម្យ សម្រាប់បំពេញតម្រូវការទីផ្សារក្នុងស្រុកដែលជាជនជាតិខ្មែរ។ ជាក់ស្ដែង ទោះជានៅក្នុងដំណាក់កាលនៃការវាយប្រហារដោយជំងឺឆ្លងCovid-19 ដែលបានធ្វើឱ្យប៉ះពាល់ដល់វិស័យអចលនទ្រព្យនៅកម្ពុជា មួយចំណែក ប៉ុន្តែសម្រាប់ការវិនិយោគលើវិស័យខុនដូកម្រិតមធ្យម និងកម្រិតសមរម្យ គឺនៅតែមានឱកាសដដែល។
លោកស្រីបានបន្តទៀតថា “ហេតុផលនៃតម្រូវការខុនដូតម្លៃមធ្យម និងតម្លៃសមរម្យ ដោយសារតែតម្លៃធូថ្លៃ ស័ក្ដិសមនឹងលទ្ធភាពពួកគាត់អាចទិញបាន ស្ថិតនៅក្នុងក្រុងដែលងាយស្រួលក្នុងការបំពេញការងារ និងប្រកបអាជីវកម្ម”។លោកស្រីបន្តថា “ភាពល្អប្រសើរនេះ រួមផ្សំជាមួយនឹងគោលការណ៍នៃការទិញ–លក់ មានភាពល្អប្រសើរ ដូចជាការបង់រំលោះ និងការធានាជួលត្រឡប់ពីសំណាក់ក្រុមហ៊ុនជាដើម”។
ម៉្យាងវិញទៀត ពួកគាត់បានសំឡឹងពីអត្ថប្រយោជន៍ ទៅថ្ងៃអនាគតដែលទីក្រុងនឹងកាន់តែរីកចម្រើន អភិវឌ្ឍន៍ខ្លាំង កាន់តែជម្រុញឱ្យតម្លៃខុនដូឡើងខ្ពស់ ផ្តល់ឱកាសចំណេញដល់ពួកគេច្រើន៕
