ដោយ ហ្សូលី
ភ្នំពេញៈ ការស្ថាបនាឡើងវិញនូវអាងហែលទឹក នៅពហុកីឡដ្ឋានជាតិអូឡាំពិកប្រើនប្រាស់ទឹកប្រាក់អស់ប្រមាណជិត៣លានដុល្លារ។ នេះបើតាមឱ្យដឹងពីទេសរដ្ឋមន្រ្តី រដ្ឋមន្ត្រីក្រសួងសាធារណការ និងដឹកជញ្ជូននៅព្រឹកថ្ងៃទី២៣ ខែមេសា ឆ្នាំ ២០២០នេះ។
លោកស៊ុន ចាន់ថុលៈ អាងហែលទឹកតម្លៃជិត៣លានដុល្លារបានបញ្ចប់ការជួសជុលនៅស្តាតអូឡាំពិក
លោកស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានសហព័ន្ធខ្មែរកីឡាហែលទឹកបានប្រាប់ឱ្យដឹងថា អាងហែលទឹកនេះ ត្រូវជួសជុលសារឡើងវិញដើម្បីឱ្យត្រូវតាមស្តង់ដាអន្តរជាតិ និងចាយទឹកប្រាក់ប្រមាណជាជិត៣លានដុល្លារ។
លោកបន្តថា អាងហែលទឹកនេះ បានប្រើរយៈពេលស្ថាបនាឡើងវិញចំនួន១៨ខែ ក្រោមជំនួយរបស់ក្រុមហ៊ុន Shanghai Construction ដែលជាក្រុមហ៊ុនមួយសាងសង់ផ្លូវថ្នល់នៅកម្ពុជា។ ជាពិសេសអាងហែលទឹកនេះ ត្រូវស្ថាបនាឱ្យស្របទៅស្តង់ដាអាងទឹកអន្តរជាតិ ដែលមានបណ្តោយ៥០ ម៉ែត្រ និងទទឹង២៥ម៉ែត្រ។ ជារួមមានខ្សែបន្ទាត់ចំនួន ១០ និងមានអាងលោតទឹក ដែលត្រូវពង្រីកដល់ទៅ២៥ម៉ែត្រផងដែរ។
រដ្ឋមន្ត្រីរូបនេះបានរៀបរាប់ថា មានសម្ភារៈជាច្រើន ដែលត្រូវផ្លាស់ប្តូរថ្មីក្នុងនោះមានដូចជា ម៉ាស៊ីនបូមទឹក ម៉ាស៊ីនចម្រោះទឹក និងកៅអីអង្គុយទស្សនាចំនួន១៦០០កៅអី ដែលសុទ្ធសឹងជាសម្ភារៈផ្លាស់ប្តូរថ្មីទាំងអស់។ មិនតែប៉ុណ្ណោះ ក៏មានបន្ទប់ដាក់ឧបករណ៍ហ្វឹកហាត់សម្រាប់កីឡាករហែលទឹកមួយទៀតផង។
បច្ចុប្បន្ននេះកម្ពុជា ក៏មានកន្លែងស្នាក់នៅសម្រាប់កីឡាផងដែរ ដោយមានដូចជាបន្ទប់គេង បន្ទប់ចម្អិនអាហារ ដើម្បីត្រៀមខ្លួនឆ្ពោះទៅដល់ការរៀបចំ ជាម្ចាស់ផ្ទះនៅកីឡាលំដាប់អន្តរជាតិនាពេលខាងនេះ។
ឆ្លៀតក្នុងឱកាសនេះ លោកស៊ុន ចាន់ថុល បានបង្ហើបថា ក្រៅពីការស្ថាបនាអាងហែលទឹក នៅពហុកីឡដ្ឋានជាតិអូឡាំពិកនេះ ក៏នៅមានការសាងសង់អាងហែលទឹកខ្នាតអន្តរជាតិនៅខេត្តបាត់ដំបង អាងហែលទឹកខ្នាតតូច ឬពាក់កណ្តាលអន្តរជាតិនៅកោះធំ នៅខេត្តកំពង់ចាម ជាពិសេសគឺអាងទឹកនៅពហុកីឡដ្ឋានជាតិថ្មីមរតកតេជោ៕
