ដោយវុត្ថា
ស្ទឹងត្រែងៈ ក្រុមការងារថ្នាក់ជាតិរបស់ក្រសួងរៀបចំដែនដី នគរូបនីយកម្ម និងសំណង់ បានចុះទៅពិនិត្យទីតាំងដីសម្បទានសង្គម ដោយផ្ទាល់នៅក្នុងខេត្តស្ទឹងត្រែង ដើម្បីគាំទ្រដល់ដំណើរការស្នើសុំ ធ្វើអនុបយោគដីសាធារណៈរបស់រដ្ឋ ទៅជាដីឯកជនរបស់រដ្ឋ សម្រាប់រៀបចំជាដីសម្បទានសង្គមកិច្ច បែងចែកជូនប្រជាពលរដ្ឋក្រីក្រគ្មានដី ឬមានដីតិចតួចសម្រាប់សង់លំនៅឋាន និងបង្កបង្កើនផល។
ក្នុងបេសកកម្មរបស់ក្រុមការងារថ្នាក់ជាតិនេះ ត្រូវបានឡើងចាប់ពីថ្ងៃទី២៧-២៩ ខែមេសា ឆ្នាំ២០២០ ដោយមានការចូលរួមពីក្រុមការងារ ថ្នាក់ខេត្ត ស្រុក ឃុំ ភូមិ ខ័ណ្ឌរដ្ឋបាលព្រៃឈើ និងមន្ទីរវិស័យពាក់ព័ន្ធមួយចំនួន ហើយក្រុមការងារបានចុះពិនិត្យផ្ទាល់ដល់ទីតាំង និងបានបោះបង្គោលសម្គាល់ទីតាំង សម្រាប់រៀបចំដីសម្បទានសង្គមកិច្ចផងដែរ។
-->
តែយ៉ាងណាក៏ដោយ មន្ត្រីជំនាញក្រសួងរៀបចំដែនដី នគរូបនីយកម្ម និងសំណង់ មិនបានបង្ហាញពីទំហំដី ដែលត្រូវបានបោះទីតាំង និងមានគ្រួសារ ដែលមិនមានដីនិងមានដីតិចតួចប្ម៉ន្មានគ្រួសារ ដែលនឹងត្រូវបានទទួលដីសម្បទានសង្គមកិច្ចនេះ នៅឡើយទេ។
យោងអនុក្រឹត្យលេខ១៩អនក្រ/បក ចុះថ្ងៃទី១៩ ខែមីនា ឆ្នាំ២០០៣បានបង្ហាញថា ដីសម្បទានសង្គមកិច្ច គឺជាយន្តការផ្ទេរដីឯកជនរបស់រដ្ឋតាមផ្លូវច្បាប់ សម្រាប់គោលបំណង សង្គមកិច្ចដល់ជនក្រីក្រ ដែលខ្វះខាតដីសម្រាប់សង់លំនៅឋាន ឬ/និងធ្វើកសិកម្មជាលក្ខណៈគ្រួសារ។
ដីសម្បទាន សង្គមកិច្ចអាចត្រូវផ្ដល់ឲ្យសម្រាប់គោលដៅសង្គមកិច្ច ដោយអនុលោមតាមគោលដៅណាមួយ ឬគោលដៅច្រើនដូចជា ផ្តល់ដីដល់គ្រួសារក្រីក្រដែលគ្មានទីលំនៅសម្រាប់សង់លំនៅឋាន សម្រាប់ធ្វើកសិកម្មជាលក្ខណៈគ្រួសារ ដែលត្រូវផ្លាស់ប្ដូរទីលំនៅបណ្ដាលមកពីការអភិវឌ្ឍ ហេដ្ឋារចនាសម្ព័ន្ធសាធារណៈ សម្រាប់ការតាំងលំនៅឋានជាថ្មី គ្រួសារដែលរងគ្រោះដោយគ្រោះធម្មជាតិ គ្រួសារមាតុភូមិនិវត្តន៍ យោធិនរំសាយ និងគ្រួសារយុទ្ធជនពលីពិការ។
ក្រៅពីគោលដៅសង្គមកិច្ចនេះ គឺជួយសម្រួលដល់ការអភិវឌ្ឍសេដ្ឋកិច្ច និងជួយសម្រួលដល់សម្បទានដីសេដ្ឋកិច្ច ដោយផ្ដល់ដីឡូត៍ដល់កម្មករ ចម្ការធំៗសម្រាប់សង់លំនៅឋាន ឬសម្រាប់ធ្វើកសិកម្មជាលក្ខណៈគ្រួសារ ព្រមទាំងអភិវឌ្ឍតំបន់ ដែលពុំទាន់ត្រូវបានអភិវឌ្ឍសមស្រប។
ដីសម្បទានសង្គមកិច្ច ដែលត្រូវផ្ដល់ឲ្យសម្រាប់សង់លំនៅឋាន មានទំហំធំបំផុត ១,២០០ម៉ែត្រការ៉េ ប៉ុន្ដែនៅតំបន់ដែលមានលទ្ធភាពដីទំនេរ ទំហំដីសម្បទានសង្គមកិច្ចអាចដំឡើងរហូតដល់៣,៦០០ម៉ែត្រការ៉េ។
ដីសម្បទានសង្គមកិច្ច ដែលអាចផ្ដល់ឲ្យសម្រាប់ធ្វើកសិកម្ម ជាលក្ខណៈគ្រួសារ មានទំហំធំបំផុត២ហិកតា ប៉ុន្ដែនៅក្នុងតំបន់ខ្លះទំហំដីសម្បទានសង្គមកិច្ច អាចឡើងដល់ទំហំ៥ហិកតា អាស្រ័យទៅតាមលក្ខណៈដី សក្ដានុពលដី ឬប្រភេទដំណាំ និងកម្លាំងពលកម្មរបស់គ្រួសារអ្នកសុំដី៕
