ដោយ ៖ រ៉ាណេត
ភ្នំពេញ ៖ ជាទូទៅ នៅលើបណ្តាញផ្សព្វផ្សាយ ក៏ដូចជាប្រព័ន្ធឃោសនាមួយចំនួនដែលបង្ហាញពីតម្រូវការលក់អចលនទ្រព្យឱ្យកាន់តែឆាប់លក់ដាច់ ភាគច្រើនគេតែងប្រើពាក្យថា អចលនទ្រព្យតម្លៃទាបជាងទីផ្សារ ដែលជាការផ្តល់ឱកាសចំណេញដល់អ្នកទិញ។ សំណួរសួរថា តើធ្វើដូចម្ដេចទើបអាចដឹងថា អចលនទ្រព្យទាំងអស់នោះពិតជាមានតម្លៃទាបជាងផ្សារ ហើយមានឯកត្តាអ្វីដើម្បីយកមកប្រៀបធៀប ?
ជាការចែករំលែកចំណេះដឹង លោកស្រី ចេវ សុឃុន ប្រធានសមាគមអ្នកជំនាញអចលទ្រព្យកម្ពុជា បានមានប្រសាសន៍ប្រាប់តាមទូរស័ព្ទកាលពីរសៀលថ្ងៃទី១ ខែឧសភា ឆ្នាំ២០២០ថា តម្លៃនៅលើទីផ្សារ គឺជាតម្លៃដែលត្រូវបានឆ្លងកាត់ការវាយតម្លៃពីសំណាក់អ្នកជំនាញ ហើយបានដាក់លក់ជាតម្លៃចរន្តទីផ្សាររួម។ ដោយឡែកសម្រាប់តម្លៃទាបជាងទីផ្សារ គឺជាការដាក់លក់ក្នុងតម្លៃទាបជាងការវាយតម្លៃរួម ដែលទទួលស្គាល់ដោយអ្នកជំនាញ។
លោកស្រីបានលើកជាឧទាហរណ៍ថា “នៅក្នុងតំបន់មួយតម្លៃដីធ្លីត្រូវបានបណ្តាអ្នកជំនាញវាយតម្លៃ និងទទួលស្គាល់តម្លៃទីផ្សារប្រមាណ២០០ដុល្លារក្នុង១ម៉ែត្រការ៉េ ប៉ុន្តែដោយសារតែម្ចាស់អចលនទ្រព្យ ឬម្ចាស់ដីធ្លីមានតម្រូវការផ្នែកចរន្តសាច់ប្រាក់ចាំបាច់ ហើយត្រូវបានប្រកាសដាក់លក់ត្រឹម ១៩០ ឬទាបជាងនេះ ដូច្នេះមានន័យថា តម្លៃដែលប្រកាសលក់នេះជាតម្លៃដែលទាបជាងទីផ្សារ”។
លោកស្រីបានបញ្ជាក់ថា “ចំពោះការវាយតម្លៃដីធ្លី ឬអចលនទ្រព្យនៅតំបន់ណាមួយ គឺត្រូវបានធ្វើឡើងបន្ទាប់ពីមានការសិក្សាលម្អិតពីកត្តារួមផ្សំ និងជាក់ស្ដែង ដូចជាសកម្មភាពនៃការអភិវឌ្ឍ ភាពជាក់ស្ដែងនៃកត្តាប្រជាសាស្ត្រ បណ្តាញហេដ្ឋារចនាសម្ព័ន្ធ ក៏ដូចជាគម្រោងអភិវឌ្ឍន៍របស់រដ្ឋាភិបាល និងវិស័យឯកជននៅក្នុងតំបន់នាពេលអនាគតជាដើម”។
ពាក់ព័ន្ធទៅនឹងវិធីសាស្ត្រ និងគោលការណ៍នៃការវាយតម្លៃអចលនទ្រព្យឱ្យមានភាពសុក្រិត្យ ត្រឹមត្រូវ និងសមស្របទៅនឹងទីផ្សាររួម ត្រូវបានលោកស្រីប្រធានសមាគមអ្នកជំនាញអចលនទ្រព្យកម្ពុជា ចេវ សុឃុន បញ្ជាក់ថា ៖ តម្លៃទីផ្សារ គឺជាតម្លៃមួយដែលបានប៉ាន់ប្រមាណលើទ្រព្យសកម្មណាមួយ តាមរយៈកាលបរិច្ឆេទដែលតម្លៃនោះមានការព្រមព្រៀងរវាងអ្នកទិញ និង អ្នកលក់មានឆន្ទៈរួមនៅក្នុងប្រតិបត្តិការទិញលក់មួយ បន្ទាប់ពីបានធ្វើការសិក្សាតម្លៃតាមទីផ្សារបានត្រឹមត្រូវ ដោយផ្អែកលើចំណេះដឹងដោយប្រុងប្រយ័ត្ន និងដោយគ្មានការបង្ខិតបង្ខំ។
ដោយឡែក ចំពោះវិធីសាស្ត្រទីផ្សារ ឬប្រៀបធៀបការលក់ អាចជួយឱ្យយើងមានភាពងាយស្រួលក្នុងការកំណត់តម្លៃមួយដែលល្អ និងអាចទុកចិត្តបានថា ស្ថិតនៅតម្លៃទីផ្សារ ឬទាបជាងទីផ្សារ ដែលវិធីសាស្ត្រទីផ្សារបែបនេះ ត្រូវបានទាញចេញដោយការប្រៀបធៀបអចលនទ្រព្យដែលរងនូវការវាយតម្លៃចំពោះលក្ខណៈសម្បត្តិស្រដៀងគ្នា និងបានលក់ដាច់ថ្មីៗ។ បន្ទាប់មកទាញឯកត្តាសមស្របនៃការប្រៀបធៀប និងការធ្វើឱ្យការកំណត់តម្រូវទៅលើតម្លៃលក់នៃការប្រៀបធៀបដោយផ្អែកលើធាតុនៃការប្រៀបធៀបតាមរយៈការបរិច្ឆេទ ការលក់ទិញ ទីតាំង ទំហំ អាយុកាលសំណង់ រចនាបទ សេវាផ្សេងៗ និងកត្តាផ្សេងៗទៀត។ វិធីសាស្ត្រនៃការប្រៀបធៀបក្នុងការវាយតម្លៃអចលនទ្រព្យ គឺផ្អែកជាចម្បងទៅលើគោលការណ៍នៃការជំនួស ដោយការសន្មត់ថា នឹងចំណាយទៅលើអចលនទ្រព្យមិនច្រើនជាងតម្លៃដើម្បីទិញអចលនទ្រព្យប្រៀបធៀបជំនួស៕
