ដោយ ៖ រ៉ាណេត
ភ្នំពេញ ៖ ការលក់អចលនវត្ថុ គឺស្រដៀងទៅនឹងការលក់ផលិតផលផ្សេងៗនៅលើទីផ្សារដែរ ប៉ុន្តែអ្វីដែលសំខាន់នោះគឺ ការលក់អចលនទ្រព្យមានតម្លៃខ្ពស់ខុសពីទំនិញផ្សេងៗនៅលើទីផ្សារ ដែលទាមទារឱ្យអ្នកលក់រៀបចំខ្លួនឱ្យបានសមរម្យ មានចរិតថ្លៃថ្នូរ ពិសេសត្រូវមានជំនាញ ចំណេះដឹង រួមទាំងការនិយាយស្តី ប្រកបដោយវិជ្ជាជីវៈ គឺធ្វើយ៉ាងណាឱ្យអតិថិជនមានទំនុកចិត្តមកលើខ្លួនទើបអាចលក់បាន។
អគ្គនាយកក្រុមហ៊ុនភ្នាក់ងារអចលនទ្រព្យ Show Up Real Estate លោក អ៉ិន ណាង បានមានប្រសាសន៍ថា បើសិនជាចង់ឱ្យបុគ្គលិកលក់អចលនទ្រព្យទទួលបានជោគជ័យ អ្នកគ្រប់គ្រងគប្បីគិតទៅដល់ពង្រឹងសមត្ថភាពសំខាន់ចំនួន៣ចំណុចជាចាំបាច់។
ទី១ – ការដុះខាត និងបណ្តុះបណ្តាលចំណេះដឹង និងជំនាញពាក់ព័ន្ធបន្ថែម ដើម្បីជួយជំរុញ និងលើកទឹកចិត្តដល់ពួកគាត់តែប៉ុណ្ណោះ បន្ថែមពីលើគ្រឹះដ៏ចាំបាច់បំផុតរបស់បុគ្គលិកដែលជាភ្នាក់ងារ ដូចជាចំណូលចិត្ត និងការតាំងចិត្តយ៉ាងពិតប្រាកដរបស់ពួកគាត់។ ក្រៅពីនេះ ក្នុងនាមជាអ្នកគ្រប់គ្រង និងជំរុញការលក់ ត្រូវតែពិចារណា និងកំណត់ ទាមទារឱ្យបុគ្គលិកផ្នែកលក់ ខំប្រឹងធ្វើការឱ្យអស់ពីសមត្ថភាព និងសក្តានុពលដែលខ្លួនមាន។
ទី២ – ត្រូវផ្តល់ក្តីសង្ឃឹមទៅដល់បុគ្គលិក បើសិនជាប្រធានក្រុមហ៊ុន ឬប្រធានផ្នែកលក់មិនមានផែនការផ្តល់ក្តីសង្ឃឹមទៅដល់បុគ្គលិក ដូចជាខែក្រោយ ឬឆ្នាំក្រោយបើប្រាក់ខែ ឬតំណែង ឬចំណេះជំនាញរបស់គាត់មិនកើនឡើងទេនោះ បុគ្គលិកនឹងមិនមានក្តីសង្ឃឹមទេ ហើយគាត់នឹងធ្វើការរង់ចាំតែថ្ងៃចាកចេញប៉ុណ្ណោះ។ ប៉ុន្តែបើសិនជាប្រធានក្រុមហ៊ុន ឬប្រធានផ្នែកផ្តល់ក្តីសង្ឃឹមឱ្យគាត់ ពួកគាត់នឹងប្រឹងប្រែងធ្វើឱ្យបានជោគជ័យដោយក្តីសង្ឃឹម ព្រោះពេលមានក្តីសង្ឃឹមហើយ គាត់នឹងប្រឹងប្រែងឱ្យអស់ពីសមត្ថភាព អស់ពីសក្តានុពលដែលគាត់មានមិនខាន។
ទី៣ – ការបំពេញតម្រូវការជាមូលដ្ឋាន ដែលចំណុចនេះក្នុងនាមជាថ្នាក់ដឹកនាំ ចាំបាច់ត្រូវគិតទៅដល់ការស្នាក់នៅសមរម្យ ការហូបចុកគ្រប់គ្រាន់ ជាចំណុចដែលមនុស្សលើពិភពលោកនេះទទួលស្គាល់ ដូចការលើកឡើងរបស់លោក Abaham Maslow បានលើកឡើងថា បើចង់ឱ្យមនុស្សស្មោះត្រង់ជាមួយយើង និងធ្វើការជាមួយយើងឱ្យអស់ពីសមត្ថភាព យើងត្រូវតែបំពេញតម្រូវការជាមូលដ្ឋានរបស់គាត់ទៅតាមការប្រឹងប្រែងរបស់បុគ្គលិកម្នាក់ៗ រួមមានតម្រូវការហូបចុកគ្រប់គ្រាន់ មានកន្លែងស្នាក់នៅត្រឹមត្រូវ តាមរយៈការបង្កើតអត្ថប្រយោជន៍ផ្សេងៗដល់គាត់។
លោក អុិន ណាង បានបញ្ជាក់ថា ចំណុចទាំង៣ខាងលើនេះ គ្រាន់តែគោលការណ៍សំខាន់នៅក្នុងគោលការណ៍ជាច្រើនច្រើនទៀតនៅក្នុងយុទ្ធសាស្ត្រគ្រប់គ្រង និងជំរុញការលក់ចំពោះភ្នាក់ងារអចលនទ្រព្យ ខណៈដែលយុទ្ធសាស្ត្រគ្រប់គ្រងជាច្រើនទៀតដែលនឹងត្រូវបានគេយកមកអនុវត្តតាមភាពជាក់ស្ដែង និងចាំបាច់៕
