ដោយ ហ្សូលី
បាងកក៖ ផ្លូវដែករដ្ឋថៃ The State Railway of Thailand (SRT) គ្រោងនឹងស្នើសុំក្រុមប្រឹក្សាភិបាលរបស់ខ្លួនឱ្យពន្យារពេលការចុះហត្ថលេខាលើកិច្ចសន្យាសាងសង់សម្រាប់ផ្លូវរថភ្លើងល្បឿនលឿនចាប់ពីទីក្រុងបាងកក – ណាខនរ៉ាឆាតស៊ីម៉ា។
គម្រោងផ្លូវដែកតម្លៃជាង ១៥០០លានដុល្លារ បានពន្យារពេលសាងសង់
កាសែតបាងកកប៉ុស្តិ៍បានរាយការណ៍ថា The State Railway of Thailand នឹងស្នើកិច្ចសន្យាដែលមានតម្លៃប្រមាណ ៥០.៦កោដិបាត (១,៥៤ពាន់លានដុល្លារ) នឹងត្រូវចុះហត្ថលេខានៅខែតុលា ឆ្នាំ ២០២០វិញ ។
លោក Worawut Mala អភិបាលរងនៃ The State Railway of Thailand បានមានប្រសាសន៍ថា ការចុះហត្ថលេខាលើកិច្ចសន្យាមិនអាចដំណើរការទៅបានទេ ខណៈដែលមន្ត្រីមិនបានឯកភាពលើការចំណាយលើផ្លូវដែកប្រព័ន្ធផ្តល់សញ្ញានិងការដឹកជញ្ជូន។ លើសពីនេះទៀត កិច្ចប្រជុំគណៈកម្មការចម្រុះថៃ-ចិនលើកទី ២៨ ដែលជាផ្នែកមួយនៃការចុះហត្ថលេខាលើកិច្ចសន្យាមិនបានកើតឡើងទេ ដោយសារការរីករាលដាលនៃជំងឺ Covid-19 ដូច្នេះហើយទើបបានជាត្រូវលើកពេលទៅវេលាសមគួរណាមួយ។
ផ្លូវដែកតម្លៃ ៥,៤៦ ពាន់លានដុល្លារ ដែលមានប្រវែងសរុបប្រមាណ ២៥៣គីឡូម៉ែត្រ ចេញពីទីក្រុងបាងកក-ណាខនរ៉ាឆាតស៊ីម៉ាមានចំនួន ១៤ កិច្ចសន្យា។ ក្នុងចំណោមកិច្ចសន្យាទាំង១៤នេះ ដំណើរការដេញថ្លៃសាងសង់សម្រាប់ ១៣គម្រោងបានដំណើរការ នៅសល់តែកិច្ចសន្យាចុងក្រោយ ពាក់ព័ន្ធនឹងការសាងសង់ផ្លូវដែកចាប់ពី Bang Sue-ដុង មឿង តែប៉ុណ្ណោះ។ ខ្សែផ្លូវដែកនេះប្រសព្វគ្នាជាមួយបណ្តាញផ្លូវដែកល្បឿនលឿនតម្លៃ ៧,៤ ពាន់លានដុល្លារ ដើម្បីភ្ជាប់អាកាសយានដ្ឋានធំៗចំនួន ៣ ប៉ុន្តែការដេញថ្លៃនេះត្រូវរង់ចាំសិន។
The State Railway of Thailand នឹងជួបជាមួយសម្ព័ន្ធក្រុមហ៊ុនដឹកនាំដោយ Charoen PokPhand ដែលទទួលខុសត្រូវក្នុងការសាងសង់គម្រោងផ្លូវដែក។ កាលពីខែមុនរដ្ឋាភិបាលថៃបានប្តេជ្ញាវិនិយោគជាង ២១ពាន់លានដុល្លារអាមេរិកចូលទៅក្នុងបណ្តាញផ្លូវដែករបស់ប្រទេស ដើម្បីកែលំអការតភ្ជាប់និងកាត់បន្ថយការបំពុលបរិស្ថាន។
ប្រទេសថៃបានរុញច្រានពេលវេលាចុងក្រោយរបស់ខ្លួនសម្រាប់ការចរចាលើផ្លូវដែកល្បឿនលឿនដែលគ្រោងនឹងលាតសន្ធឹងដល់ប្រទេសចិន។ ផ្លូវដែករដ្ឋថៃ The State Railway of Thailand បាននិយាយកាលពីពាក់កណ្តាលខែមេសាថា ចិនមិនបានឆ្លើយតបនឹងការសាកសួររបស់ខ្លួនទេ។ គម្រោងនេះទំនងជាត្រូវបានធ្លាក់ចុះនៅក្នុងបញ្ជីអាទិភាពរបស់ទីក្រុងប៉េកាំង ព្រោះថាវាទំនងជាមិនត្រូវបានបញ្ចប់នៅពេលណាមួយឆាប់ៗនេះទេ៕
Nikkei Asian Review
