ដោយ វុត្ថា
ភ្នំពេញ៖ តើអ្នកធ្លាប់មានចម្ងល់ទេ ហេតុអីជប៉ុនជួយកសាងស្ពានអ្នកលឿង និងពង្រីកផ្លូវជាតិលេខ៥? ដែលជាច្រករបៀងតភ្ជាប់ភាគខាត្បូងកម្ពុជា ស្របពេលកំណាត់ផ្លូវជាតិលេខ៥ដំណាក់កាលទី១ បានប្រកាសសម្ភោធស្ថាបនាពង្រីកនាព្រឹកថ្ងៃទី២៦ មិនានេះ។
គម្រោងសាងសង់កំណាត់ផ្លូវជាតិលេខ៥ដំណាក់កាលទី១នេះ មានប្រវែងសរុប៨៤,៧៤គីឡូម៉ែត្រ តភ្ជាប់ពីខេត្តបាត់ដំបង ទៅសិរីសោភ័ណខេត្តបន្ទាយមានជ័យ ដោយចាប់ផ្តើមពីគីឡូម៉ែត្រលេខ ២៨២+០០០ ទៅគីឡូម៉ែត្រលេខ ៣៦៧+៨០៤ ជាប្រភេទផ្លូវចាក់បេតុងកៅស៊ូ (AC)កម្រាស់១៥សង់ទីម៉ែត្រ ដែលមានទទឹង២៣ម៉ែត្រ និងមាន៤គន្លង។ខណ្ឌដោយសួនទ្រូងផ្លូវទទឹង៣ម៉ែត្រ សម្រាប់យានយន្តគ្រប់ប្រភេទធ្វើចរាចរណ៍។
គម្រោងនេះប្រើរយៈពេល ៣៦ខែ ដោយចាប់ផ្ដើមសាងសង់ពីខែកុម្ភៈ ឆ្នាំ២០១៧ និងគ្រោងបញ្ចប់នៅខែមីនា ឆ្នាំ២០១៨ គ្រោងនឹងចំណាយទឹកប្រាក់សរុប ១៩ ៩៨៨ លានយេនជប៉ុន ស្មើនឹង ១៨៥ លានដុល្លារអាមេរិក ក្រោមគម្រោងឥន្ទទានជំនួយឥតសំណងរបស់រាជរដ្ឋាភិបាលជប៉ុន សាងសង់ដោយក្រុមហ៊ុន Tekken Taiyu Joint Venture និងក្រុមហ៊ុន Daiho Asanuma Joint Venture និងត្រូវបានត្រួតពិនិត្យបច្ចេកទេសដោយក្រុមហ៊ុន Katahira & Engineers International។ សូមបញ្ជាក់ដំណាក់កាលទីពីរ គឺពីព្រែកក្ដាមទៅខេត្តពោធិសាត់ និងដំណាក់កាលទីបី ពីពោធិសាត់ទៅបាត់ដំបង និងពីខេត្តបន្ទាយមានជ័យ ទៅប៉ោយប៉ែត (ព្រំប្រទល់ថៃ)។
ហេតុអ្វីជប៉ុនជួយកសាងផ្លូវនេះ និងពង្រីកសក្តានុពលនៅច្រករបៀងភាគខាងត្បូងកម្ពុជា? ទេសរដ្ឋមន្ត្រី ស៊ុន ចាន់ថុលរដ្ឋមន្រ្តីក្រសួងសាធារណៈការ និងដឹកជញ្ជូនបានបញ្ជាក់ថា ដោយសារប្រទេសមានសន្តិភាព និងស្ថេរភាពនយោបាយពេញលេញ បានធ្វើឱ្យផ្លូវជាតិលេខ៥ មានភាពមមាញឹក ក្នុងការដឹកផលិតផលកសិកម្មរបស់ប្រជាពលរដ្ឋ ទៅកាន់ទីផ្សារគោលដៅ និងបានទាក់ទាញវិនិយោគិនគ្រប់វិស័យ និងមានភ្ញៀវទេសចរចូលមកទស្សនា ប្រទេសកម្ពុជាកើនឡើងជាលំដាប់។ លើសពីនេះទៅទៀតផ្លូវនេះ គឺជាផ្លូវយុទ្ធសាស្ត្រយ៉ាងសំខាន់ ជាផ្លូវអាស៊ានហាយវេលេខ១ ហើយក៏ជាផ្លូវរបៀងសេដ្ឋកិច្ចកើត លិចទី២ ដ៏សក្ដានុពល សម្រាប់ប្រកួតប្រជែងពាណិជ្ជកម្ម ទេសចរណ៍ ភស្តុភារកម្ម វិនិយោគ និងសេដ្ឋកិច្ចនៃមហាតំបន់មេគង្គ GMS ដែលតភ្ជាប់រវាងទីក្រុងបាកក ទីក្រុងភ្នំពេញ និងទីក្រុងហូជីមិញ។
លើសពីនេះទៅទៀត បន្ទាប់ពីសាងសង់រួច ស្របតាមការទទួលផលពីការអភិវឌ្ឍប្រកបដោយសមធម៌ ផ្លូវជាតិលេខ៥ នឹងជួយឱ្យប្រជាពលរដ្ឋទូទាំងប្រទេស ជាពិសេសប្រជាពលរដ្ឋដែលរស់នៅតាមដងផ្លូវនេះ មានឱកាសបង្កើតមុខរបរ ពង្រីកមុខរបរ និងមានការងារធ្វើគ្រប់ៗគ្នាទៅតាមជំនាញ និងទេពកោសល្យរបស់ខ្លួន ដែលធ្វើឱ្យជីវភាពរបស់គាត់ មានភាពសម្បូរសប្បាយមួយកម្រិតទៀត។
លោកបន្តថា “ផ្លូវនេះបានភ្ជាប់គ្រប់ច្រកល្ហក ពីតំបន់ភាគខាងលិច មកតំបន់ភាគខាងកើត និងស្របតាមគោលនយោបាយរបស់រដ្ឋាភិបាលគឺ “ប្រែក្លាយប្រទេសកម្ពុជាពីប្រទេស ដែលមានសេដ្ឋកិច្ចពឹងផ្អែកលើកសិកម្ម ទៅជាប្រទេសដែលមានសេដ្ឋកិច្ចពឹងផ្អែកលើឧស្សាហកម្មន៍”។
លោកស៊ុន ចាន់ថុលបានសំណូមពរដល់គ្រប់ក្រសួងស្ថាប័នពាក់ព័ន្ធ អាជ្ញាធរដែនដី និងប្រជាពលរដ្ឋដែលមានភូមិស្ថាននៅតំបន់នោះ បន្តសហការ និងជំរុញឱ្យគម្រោងនេះ សម្រេចបានជោគជ័យជាស្ថាពរ៕
