ដោយ គង់ សូរិយា
ភ្នំពេញ៖ របាយការណ៍របស់ក្រសួងសេដ្ឋកិច្ច និងហិរញ្ញវត្ថុបានបង្ហាញថា ដោយសារស្ថានភាពម៉ាក្រូសេដ្ឋកិច្ចឆ្នាំ២០១៧ មានស្ថិរភាពល្អប្រសើរ សេដ្ឋកិច្ចកម្ពុជាត្រូវបានរំពឹងថានឹងនៅបន្តកំណើនក្នុងរង្វង់៧ភាគរយនៅឆ្នាំ២០១៨នេះ ដោយសារកំលាំងចលករទ្រទ្រង់សេដ្ឋកិច្ចនៅតែមានភាពរ៉ឹងមាំ។
តាមសេចក្តីប្រកាសព័ត៌មានរបស់ក្រសួងសេដ្ឋកិច្ច និងហិរញ្ញវត្ថុស្តីពី ក្របខណ្ឌគោលនយោបាយម៉ាក្រូសេដ្ឋកិច្ច និងគោលនយោបាយហិរញ្ញវត្ថុសាធារណៈ សម្រាប់ការរៀបចំសេចក្តីព្រៀងច្បាប់ស្តីពី ហិរញ្ញវត្ថុសម្រាប់ការគ្រប់គ្រងឆ្នាំ២០១៩ បានឲ្យដឹងកាលពីម្សិលម៉ិញនេះថា ក្របខណ្ឌម៉ាក្រូសេដ្ឋកិច្ចកម្ពុជាឆ្នាំ២០១៧ មានស្ថិរភាពល្អគឺការបន្តសម្រេចបានកំនើនប្រមាណ៧ភាគរយ ដោយគាំទ្រដោយកំណើនរឹងមាំនៃវិស័យសំណង់ ការបន្តកំណើននៃវិស័យកាត់ដេរ និងវិស័យកសិកម្ម ជាពិសេសការងើបឡើងវិញខ្លាំងលើវិស័យទេសចរណ៍ រួមជាមួយវិស័យលក់ដុំ និងលក់រាយ ។
ជាមួយនឹងកំនើនល្អប្រសើរនៃវិស័យទាំងនេះ ក្រសួងសេដ្ឋកិច្ចរំពឹងថានៅឆ្នាំ២០១៨ និងឆ្នាំ២០១៩ សេដ្ឋកិច្ចកម្ពុជាត្រូវបានរំពឹងថា នឹងនៅបន្តកំណើនក្នុងរង្វង់៧ភាគរយ ដែលទ្រទ្រង់ដោយមូលដ្ឋានកំណើនស្រដៀងឆ្នាំ២០១៧ ក្នុងនោះវិស័យកសិកម្ម នឹងបន្តសម្រេចកំណើនយឺតក្នុងរង្វង់១,៨ភាគរយ ដោយឡែកអនុវិស័យដំណាំក៏ត្រូវបានរំពឹងថា មានកំណើនប្រមាណ២,២ភាគរយ ព្រោះកត្តាអកាសធាតុអំណោយផល និងភាពប្រសើរឡើងនៃប្រព័ន្ធធារាសាស្រ្ត ព្រមទាំងការបន្តកើនឡើងថ្លៃអង្ករនៅលើទីផ្សារអន្តរជាតិ ។
សេចក្តីប្រកាសព៌តមានដដែលបានបន្តថា ចំណែកវិស័យឧស្សាហកម្មកម្ពុជា នឹងរក្សាបានកំណើនរឹងមាំ ក្នុងអត្រាកំណើនប្រចាំឆ្នាំរង្វង់១០ភាគរយនៅក្នុងឆ្នាំ២០១៨ និងឆ្នាំ២០១៩ ហើយនៅឆ្នាំ២០១៩ ដែលគាំទ្រដោយភាពរឹងមាំនៃវិស័យសំណង់ និងបន្តកំណើនវិស័យកាត់ដេរ។ ដោយឡែកវិស័យសំណង់បន្តការរីកចម្រើន នៅក្នុងកំណើនអត្រាកំណើនប្រមាណ១៦,៧ភាគរយ ក្នុងឆ្នាំ២០១៨ និង១៧,៩ភាគរយនៅឆ្នាំ២០១៩។
របាយការណ៍នេះបានព្យាករណ៍ថា វិស័យនេះនឹងនៅរក្សាបានកំណើនក្នុងរង្វង់៥ភាគរយក្នុងឆ្នាំ២០១៨ និងឆ្នាំ២០១៩។ រីឯវិស័យផ្សេងៗទៀតត្រូវបានរំពឹងថា នូវរក្សាបានកំណើនល្អដដែលក្នុងរង្វង់១១,៩ភាគរយ ។ វិស័យសេវាកម្មត្រូវបានព្យាករថា នឹងមានកំណើនខ្ពស់ក្នុងរង្វង់ប្រមាណ៧ភាគរយផងដែរ។ វិស័យទេសចរណ៍ ក៏ត្រូវបានរំពឹងងើបឡើង ក្នុងអត្រាកំនើន៤,៥ភាគរយ វិស័យលើកដុំនិងលក់រាយមានកំណើនរឹងមាំក្នុងអត្រា៧,២ភាគរយ។
ចំណែកអតិផរណានៅកម្ពុជាត្រូវបានព្យាករណ៍ថា នឹងបន្តស្ថិតក្នុងកម្រិតអាចគ្រប់គ្រងបាន ដែលវានឹងមានកំនើនក្នុងអត្រា៣,៤ភាគរយក្នុងឆ្នាំ២០១៨ និង៣,១ភាគរយនៅក្នុងឆ្នាំ២០១៩។ ចំពោះវិស័យអត្រាប្តូរប្រាក់រៀល ធៀបនឹងប្រាក់ដុល្លារ ត្រូវរំពឹងមានស្ថិរភាពក្នុងឆ្នាំ២០១៨ និងឆ្នាំ២០១៩ គឺរក្សាក្នុងរង្វង់៤០៥០រៀល ក្នុងមួយដុល្លារអាមេរិកផងដែរ។
លោកបណ្ឌិតម៉ី កល្យាណប្រធានវិទ្យាកម្ពុជាសិក្សាការអភិវឌ្ឍន៍បានមានប្រសាសន៍ថា ស្ថានភាពសេដ្ឋកិច្ចកម្ពុជានៅតែមានភាពល្អប្រសើរ ប៉ុន្តែដើម្បីសម្រេចបានកំណើន៧ភាគរយបន្តទៀត ទាមទារឲ្យយើងខិតខំប្រឹងប្រែងច្រើន ព្រោះបើយើងមិនខិតខំទេ យើងមិនអាចរក្សាបានកំនើនបែបនេះទេ។លោកបន្តថា នៅពេលសេដ្ឋកិច្ចយើងកាន់តែធំ កំណើនអាចថមថយបន្តិច ប៉ុន្តែមិនមែនមានន័យថាថយចុះទេ គឺយើងនៅតែរក្សាបានកំនើននិងប្រាក់កាន់តែច្រើន ផ្ទុយទៅវិញបើយើងខិតខំហើយរក្សាបានកំនើន៧ភាគរយរយៈពេលវែងបន្តទៀត ជាអ្វីដែលយើងត្រូវទះដៃអបអរសាទរទាំងអស់គ្នាហើយ។
លោកបន្តថា “បើមើលពីសូចនាករ ដែលជាកំលាំងចលករជំរុញសេដ្ឋកិច្ចរបស់យើង ខ្ញុំគិតថាសុខភាពសេដ្ឋកិច្ចរបស់យើង នៅតែមានភាពល្អប្រសើរសម្រាប់រយៈពេលវែងបន្តទៀត”៕