ដោយ គង់ សូរិយា
ភ្នំពេញ៖ ជាមួយនឹងគំរោងសាងសង់ផ្លូវក្រវ៉ាត់ក្រុងទី៣ ដើម្បីពង្រីកសក្តានុពលក្រុងភ្នំពេញ និងអភិវឌ្ឍន៍សេដ្ឋលកិច្ចនៅជុំវិញទីក្រុងនេះ រដ្ឋាភិបាលបាននិងកំពុងចេញពង្រាងផ្លូវក្រវ៉ាត់ក្រុងទី៣ជាបណ្តើរៗហើយ។
កាលពីពេលថ្មីៗនេះគេហទំព័រអចលនទ្រព្យ និងសេដ្ឋកិច្ចឈានមុខគេនៅកម្ពុជា Propertyarea.asia បានចេញប្លង់ផ្លូវក្រវ៉ាត់ក្រុងមួយផ្នែក ដែលស្ថិតនៅភាគខាងលិច និងខាងត្បូងក្រុងភ្នំពេញរួចហើយ ប៉ុន្តែថ្ងៃនេះយើងនឹងបង្ហាញគំនូស និងហេដ្ឋារចនាស ម្ព័ន្ឋ ដែលត្រូវសាងសង់ផ្លូវក្រវ៉ាត់ក្រុងនៅភាគខាងកើត និងខាងជើងរាជធានីភ្នំពេញ ដែលបាននិងកំពុងគូសវាស និងរៀបចំសាងសង់ដោយក្រុមហ៊ុនសៀងហៃ ស្ពានថ្នល់ ជាក្រុមហ៊ុនដ៏ធំមួយ ដែលបាននិងកំពុងសាងសង់ផ្លូវ និងស្ពានជាច្រើននៅកម្ពុជា។
គំរោងផ្លូវក្រវ៉ាត់ក្រុងទី៣ ដែលចាកចេញពីតំបន់ព្រែកព្នៅ តភ្ជាប់តាមខ័ណ្ឌដង្កោ ខ័ណ្ឌពោធិសែនជ័យ មុនភ្ជាប់មកស្រុកកៀនស្វាយ ស្ថិតក្នុងតំបន់កំពង់ផែស្វយ័ត្នក្រុងភ្នំពេញបាន គឺជាផ្នែកនៃខ្សែក្រវ៉ាត់ក្រុងភាគខាងជើងឆផងខាងលិច និងតភ្ជាប់មកភាគខាងត្បូងរាជធានីភ្នំពេញ។
ប្រភពព៌តមានជាក់លាក់ដែលអាចទុកចិត្តបាន បានបង្ហើបឲ្យដឹងថា បច្ចុប្បន្នក្រុមហ៊ុនសៀងហៃ កំពុងធ្វើការងារយ៉ាងសកម្ម ដើម្បីចាប់ផ្តើមសាងសង់ផ្លូវនេះនាឆ្នាំ២០១៩ខាងមុខនេះ ប្រសិនជាគ្មានអ្វីប្រែប្រួលទេនោះ។
ផ្លូវក្រវ៉ាត់ក្រុងទី៣ ដែលតភ្ជាបពីកំពង់ផែស្វយ័ត្នក្រុងភ្នំពេញ នឹងកាត់ទៅតំបន់វិហារសួគ៌ក្នុងស្រុកខ្សាច់កណ្តាល ខេត្តកណ្តាល និងតភ្ជាប់មកកាន់តំបន់មួយចំនួនក្នុងស្រុកពញ្ញាឮ ខេត្តកណ្តាល តភ្ជាប់មកកាន់ស្រុកអង្គស្នួល ឆ្លងកាត់ផ្លូវជាតិលេខ៤ ផ្លូវជាតិលេខ៣ តាមរយៈការសាងសង់ផ្លវអាកាសចំនួនពីរ ឆ្លងកាត់ផ្លូវជាតិដ៏សំខាន់នេះ ដើម្បីតភ្ជាប់មកកាន់ខ័ណ្ឌមួយចំនួននៃក្រុងភ្នំពេញ។
ទោះជាយ៉ាងណាក្រសួងសាធារណៈការ និងដឹកជញ្ជូន មិនទាន់បញ្ជាក់ព៌តមានលំអិតពីការសាងសង់ផ្លូវក្រវ៉ាត់ក្រុងទី៣ ដែលនឹងចំណាយថវិការដ្ឋាភិបាល ឬហិរញ្ញប្បទានសម្បទានពីរដ្ឋាភិបាលចិននៅឡើយទេ ហើយទំហំនៃការចំណាយសម្រាប់សាងសង់ផ្លូវនេះក៏មិនទាន់ដឹងនៅឡើយទេ៕