ដោយ វុត្ថា
ឮភ្នំពេញ អ្នកវិនិយោគតៃវ៉ាន់ គ្រោងបោះទុនវិនិយោគ១០០លានដុល្លារ ដើម្បីសាងសង់អាគារការិយាល័យកំពស់៤០ជាន់ថ្មីមួយ នៅកណ្តាលទីក្រុងកោះពេជ្រ ជាតំបន់ដែលមានការអភិវឌ្ឈលឿនជាងគេនៅទីក្រុងភ្នំពេញ។
គម្រោងអគារការិយាល័យ Gia Tower ត្រូវបានអនុម័តជាផ្លូវការ ដែលវិយោគដោយក្រុមហ៊ុនចិនតៃវ៉ាន់។ គំរោងនេះ នឹងចាប់ផ្តើមសាងសង់នៅពេលឆាប់ៗខាងមុខនេះ នៅកោះពេជ្រ ហើយគំរោងនេះមានទីតាំងនៅជិតអគារ Diamond Twin Tower Phnom Penh។ អគារនេះមានកំពស់១៧៨ម៉ែត្រ និង៤០ជាន់។
អគ្គនាយករងក្រុមហ៊ុន OCIC លោកទូច សំណាងបានថ្លែងឲ្យដឹងកាលពីសប្តាហ៍មុនថា ពិតជាមានក្រុមហ៊ុនតៃវ៉ាន់ ចូលមកវិនិយោគលើគំរោងនេះនៅទីក្រុងកោពេជ្រពិតប្រាកដមែន ហើយពេលនេះក្រុមហ៊ុនកំពុងរៀបចំការដ្ឋានសាងសង់។ លោកបន្តថាលើសពីនេះ នៅពេលឆាប់ៗនេះនឹងមានក្រុមហ៊ុនតៃវ៉ាន់មួយទៀត នឹងសាងសង់អាគារការិយាល័យ ននិងសណ្ឋាគារនៅក្នុងទីក្រុងកោះពេជ្របន្ថែមទៀតផងដែរ។
លោកបន្តថា រហូតមកទល់ពេលនេះ ផ្ទៃដីកោះពេជ្រទាំងមូល ទើបអភិវឌ្ឍន៍បានចន្លោះពី៣០ទៅ៤០ភាគរយប៉ុណ្ណោះ ដូច្នេះផ្ទៃដីជាច្រើនទៀតកំពុងនៅទំនេរ និងត្រូវសាងសង់គំរោងអភិវឌ្ឍន៍ថ្មីៗជាច្រើនទៀត។
លោកបន្តថា “តាមធម្មតាការអភិវឌ្ឍទីក្រុងទំនើបមួយ ត្រូវចំណាយពេល១០ទៅ២០ឆ្នាំ ទើបបញ្ចប់បានតាមអ្វីដែលយើងចង់បាន”៕
