ផ្សារ​ទំនើប​លំដាប់​អន្តរជាតិ​ចំនួន៦ នឹង​បើក​ដំណើរការ​នៅ​ឆ្នាំ​ក្រោយនេះ

0

ដោយ៖ គង់ សូរិយា

ភ្នំពេញ៖ ផ្សារ​ទំនើប​លំដាប់​អន្តរជាតិ​ចំនួន៦ទៀត នឹង​បើក​ដំណើរការ​នៅ​ទីក្រុង​ភ្នំពេញ​ក្នុង​ឆ្នាំ២០១៨ខាងមុខនេះ ដែល​ធ្វើ​ឲ្យ​ទីក្រុង​នេះ​កាន់​តែមាន​ភាព​ទាក់ទាញ និង​ក្លាយជា​មជ្ឈមណ្ឌល​ពាណិជ្ជកម្ម​លំដាប់​អន្តរជាតិ​មួយ​នាពេល​ខាងមុខនេះ។

ផ្សារ​ទំនើបធំៗទាំង៦នោះ រួមមាន ផ្សារ​ទំនើប AEON Mall2, Phnom Penh Mega Mall ,Olympia Plaza និង​ផ្សារ​ទំនើប​ក្នុង​គំរោង The Bridge, ផ្សារ​ទំនើប MAKRO ជា​ផ្សារ​លក់ទំនិញ​បោះ​ដុំ​របស់​ប្រទេស​ថៃ និង​ផ្សារ​ទំនើប​ក្រោម​ដី ដែលជា​គំរោង​វិនិយោគ​របស់​ក្រុមហ៊ុន​វឌ្ឍនៈ​គ្រុប។

នាយិការ​គ្រប់គ្រង​ទូទៅ​នៃ​ក្រុមហ៊ុន​អចលនទ្រព្យ​លំដាប់​អន្តរជាតិ CBRE Cambodia អ្នកនាង​អាន សុធី​តា​បាន​ថ្លែង​ឲ្យ​ដឹង​កាលពីពេលថ្មីៗនេះ​ថា ជាមួយនឹង​ការចូល​មកដល់​នូវ​ផ្សារ​ទំនើបថ្មីៗ និង​ផ្សារ​ទំនើប​ជាច្រើន​ទៀត​កំពុង​ត្រៀម​បើក​ដំនើរការ​នៅ​ឆ្នាំ២០១៨ខាងមុខ អ្នកនាង​គិតថា​អ្នកវិនិយោគ​បាន​សិក្សា​ច្បាស់លាស់​ហើយពី​ស្ថានភាព​ទីផ្សារ និង​កំលាំង​នៃ​ការទិញ​របស់​ប្រជាពលរដ្ឋ​ខ្មែរ​រួចហើយ មុន​ធ្វើការ​វិនិយោគ ប៉ុន្តែ​យ៉ាងណាក៏ដោយ​អ្នកវិនិយោគ​គួរ​សិក្សា​ពី​កត្តា​មួយ​ចំនូ​ន​ទៀត​ដូចជា កំលាំង​នៃ​ការទិញ ការរៀបចំ និង​រចនា​កន្លែង​លក់​ឲ្យ​មាន​ភាព​ទាក់ទាញ និង​តម្រូវការ​នៅក្នុង​ទីផ្សារ​នេះ។

អ្នកនាង​បន្តថា “កំលាំង​ទិញ​នៅ​កម្ពុជា​កើនឡើង ប៉ុន្តែ​ភាគច្រើន​ប្រជាពលរដ្ឋ​ផ្តោតលើ​ការកំសាន្ត និង​ការ​ញុំ​ា​ច្រើនជាង​នៅតាម​បណ្តា​ផ្សារ​ទំនើប​នានា។ អ្នកនាង​បន្ថែមថា “ការមកដល់​នូវ​ផ្សារ​ទំនើបថ្មីៗ មិនមាន​បញ្ហា​នៅក្នុង​ទីផ្សារ​នោះទេ យើង​ស្វាគមន៍​ការវិនិយោគ​នានា ដែល​ផ្តល់​អត្ថប្រយោជន៍​ច្រើន​ដល់​ប្រ ជា​ពលរដ្ឋ​កម្ពុជា។

ទំហំ​ផ្សារ​ទំនើប​នៅ​ទីក្រុង​ភ្នំពេញ ធៀប​នឹង​មនុស្សម្នា​ក់មាន​ប្រមាណ០,១ម៉ែត្រការ៉េ ខណៈ​ប្រទេស​ថៃ​ទំហំ​ផ្សារ​ទំនើប​ធៀប​នឹង​មនុស្សម្នា​ក់មាន០,៤ម៉ែត្រការ៉េ។

ទាក់ទង​នឹង​ទំហំ​ផ្សារ ធៀប​នឹង​ចំនួន​ប្រជាជន​កម្ពុជា អ្នកនាង​អាន សុធី​តា​បាន​ពន្យល់ថា ទំហំ​ផ្សារ​ទំនើប​ធៀប​នឹង​មនុស្សម្នា​ក់នៅ​ក្រុងភ្នំពេញ មានការ​កើនឡើង តែ​ទាប​ជាង​ប្រទេស​ថៃ ប៉ុន្តែ​ផ្សារ​ទំនើប​នៅ​កម្ពុជា​ពឹងផ្អែក​លើ​ប្រជាជន​ក្នុងស្រុក​ច្រើនជាង ខុសពី​ប្រទេស​ថៃ​ដែល​ផ្សារ​ទំនើប​មិន​ត្រឹមតែ​ពឹងផ្អែក​ប្រជាជន​ក្នុងស្រុក​នោះទេ ប៉ុន្តែ​ប្រទេស​ថៃ​មាន​កំលាំង​ទិញ​ខ្លាំង និង​មានការ​រួមចំណែក​ពី​ភ្ញៀវ​ទេសចរណ៍​ច្រើន​ផងដែរ។

លោក​ប៉ែន សុខ​គា​នាយក​ផ្នែក​ស្រាវជ្រាវ​នៃ​ក្រុមហ៊ុន​ប៊ុណ្ណា​រៀល​ធី​គ្រុប​បាន​ថ្លែងថា វត្តមាន​ផ្សារ​ទំនើប​លំដាប់​អន្តរជាតិ​នៅ​កម្ពុជា​កាន់តែច្រើន ដែល​វិនិយោគ​ដោយ​អ្នកវិនិយោគ​ក្នុងស្រុក និង​អន្តរជាតិ​ឆ្លុះបញ្ចាំង​ពី​កំនើន​ប្រជាសាស្ត្រ កំនើន​ប្រាក់ចំណូល និង​សេដ្ឋកិច្ចកម្ពុជា​បន្ត​កើនឡើង ដែល​ធ្វើ​ឲ្យ​កំលាំង​ទិញ​ក្នុងចំណោម​ប្រជាពលរដ្ឋ​ខ្មែរ​កើនឡើង។លោក​បន្តថា កំនើន​ប្រាក់ចំណូល​ពិតជា​ផ្នែក​មួយ​យ៉ាងសំខាន់ ដែល​ទាក់ទាញ​អ្នកវិនិយោគ​ជាតិ អន្តរជាតិ​មកកាន់​ទីក្រុង​ភ្នំពេញ ព្រោះ​ប្រសិនជា​គ្មាន​កំលាំង​ទិញ​ទេ នឹង​គ្មាន​ការវិនិយោគ​ពី​វិស័យ​ឯកជន​នោះទេ។

ប្រធាន​នាយក​ប្រតិបត្តិ​ធនាគារ​អេស៊ីលីដា​ភី​អ៊ិ​ល​ស៊ី លោក​អ៊ិន ចាន់នី​បាន​ថ្លែងថា ការផ្លាស់ប្តូរ​ចេញពី​ប្រទេស​ក្រីក្រ មកកាន់​ប្រទេស ដែល​ប្រជាជនមាន​ជីវភាព​មធ្យម​កម្រិត​ខ្ពស់ ពិតជា​ផ្នែក​មួយ​នៃ​ការទាក់ទាញ​អ្នកវិនិយោគ ព្រោះ​អ្នកវិនិយោគ​មុន​សម្រេចចិត្ត​ទៅកាន់​ប្រទេស​ណាមួយ ពួកគេ​សម្លឹង​លើ​កត្តា​បីសំខាន់ៗ គឺ​សន្តិភាព កំនើនសេដ្ឋកិច្ច និង​ស្ថិរភាពសង្គម​រយៈពេល​វែង។

លោក​បន្តថា “នៅពេល​ប្រជាជនមាន​ជីវភាព​ធូរធារ​ជាង​មុន មានន័យ​ការតម្រូវ​ការ​ពួកគេ​ច្រើនជាង​មុន កំលាំង​ទិញ​ធំ​ជាង​មុន ហេតុនេះ​អ្នកវិនិយោគ​បាន​ចូលមក​វិនិយោគ​ច្រើន ព្រោះ​ពួកគេ​មិន​ចង់ទៅ​វិនិយោគ​នៅ​ប្រទេស​ក្រីក្រ​នោះទេ”៕

LEAVE A REPLY

Please enter your comment!
Please enter your name here