ដោយៈ ប៊ី
ភ្នំពេញៈ ខណៈវិស័យការងារលើពិភពលោក កំពុងជួបប្រទះនឹងបញ្ហាជាច្រើន ការបណ្តុះបណ្តាលជំនាញរបស់អ្នកធ្វើការ ឬកម្មករ នឹងជួយដោះស្រាយភាពមិនស៊ីសង្វាក់ និងលើកកម្ពស់ភាពធន់ ក្នុងកន្លែងធ្វើការនីមួយៗ។
ការអភិវឌ្ឍធនធានមនុស្សបានដើរតួនាទីយ៉ាងសំខាន់ ក្នុងការជំរុញសេដ្ឋកិច្ចរីកចម្រើន។ ទោះជាយ៉ាងណាក៏ដោយ នៅពេលដែលជំនាញរបស់កម្មករ មិនបានស្របនឹងតម្រូវការឧស្សាហកម្ម ភាពមិនស៊ីសង្វាក់ និងអតុល្យភាពនៅក្នុងទីផ្សារការងារ អាចធ្វើឱ្យសេដ្ឋកិច្ចមិនឱ្យឈានដល់កំណើនសក្តានុពលរបស់ខ្លួន។
លទ្ធផលនៃការស្ទង់មតិសហគ្រាសចុងក្រោយ របស់ធនាគារពិភពលោក (World Bank) បានបង្ហាញកាលពីថ្មីៗនេះថា និយោជិកពី១០%ទៅ១៥% នៅក្នុងប្រទេសហ្វីលីពីន ឥណ្ឌូនេស៊ីឡាវ និងម៉ាឡេស៊ី និង១៨%នៅកម្ពុជារាយការណ៍ថា មានការលំបាកក្នុងការស្វែងរកកម្មករ ដែលមានជំនាញត្រឹមត្រូវសម្រាប់ប្រតិបត្តិការរបស់ពួកគេ។ តិចជាង៥% នៃក្រុមហ៊ុននៅក្នុងប្រទេសថៃនិយាយថា ពួកគេជួបប្រទះនូវបញ្ហានេះ។
ភាពមិនស៊ីចង្វាក់គ្នានៃជំនាញ មិនត្រឹមតែប៉ះពាល់ដល់បណ្តាប្រទេស អ្នកមាននៅក្នុងអង្គការសហប្រតិបត្តិការ និងអភិវឌ្ឍន៍សេដ្ឋកិច្ច (OECD) ប៉ុណ្ណោះទេ ប៉ុន្តែថែមទាំងប៉ះពាល់ដល់ការអភិវឌ្ឍសេដ្ឋកិច្ច រួមទាំងប្រទេសនៅអាស៊ីអាគ្នេយ៍ផងដែរ។ ការសិក្សាបង្ហាញពីចំនួនកម្មករយ៉ាងច្រើន ដែលការបណ្តុះបណ្តាលមិនស៊ីចង្វាក់ នឹងតម្រូវការជាក់ស្តែងរបស់និយោជិក។
ឧទាហរណ៍ កម្មករប្រហែល៣៧%នៅថៃ និង៤៣%នៅសិង្ហបុរីមិនស៊ីគ្នានឹងមុខជំនាញរបស់ពួកគេ បើប្រៀបធៀបទៅនឹងមធ្យមភាគពិភពលោក៤០ភាគរយ ។ ជាមធ្យម២២% នៃកម្មករនិយោជិតត្រូវបានផ្តល់គុណវុឌ្ឍិមិនគ្រប់គ្រាន់ និង១៦%ត្រូវបានគេចាត់ទុកថាមានលក្ខណៈសម្បត្តិលើសពីមុខដំណែងរបស់ពួកគេ។
នៅប្រទេសសឹង្ហបូរីប្រជាជននៅអាយុ៤០ និង៥០ឆ្នាំ គឺជាក្រុមដែលប្រទេសនេះមានការព្រួយបារម្ភបំផុត នៅពេលនិយាយអំពីបញ្ហាប្រឈមជំនាញ។ នេះបើយោងតាមលោក Tze Chin Ong នាយកប្រតិបត្តិនៃ SkillsFuture៕
