ដោយៈ សុខុម
ភ្នំពេញៈ ក្រោយពីចាក់វ៉ាក់សាំងចំនួន២ដូសរួចរាល់ អតីតស្ដេចប្រដាល់គុនខ្មែរ ដ៏ល្បីល្បាញលោក អេ ភូថង នៅតែមិនអាចគេចផុតពីការឆ្លងវីរុសកូវីដ-១៩ ដោយលោកបានឆ្លងវីរុសដ៏កាចសាហាវនេះកាលពី២សប្ដាហ៍មុន។ នេះបើយោងតាមសារព័ត៌មាន South China Morning Post ចុះផ្សាយកាលពីថ្ងៃទី២៧ កក្កដា។
អ្នកស្រីតាំង សុម៉ាលីដែលត្រូវភរិយាបានរៀបរាប់អំពីស្ថានភាពជំងឺរបស់ស្វាមីថា លោក អេ ភូថត ស្ថិតក្នុងសភាពធ្ងន់ធ្ងរ ដោយត្រូវការដាក់ខ្យល់អុកស៊ីហ្សែនជាប់រហូត ហើយត្រូវប្ដូរធុងខ្យល់អុកស៊ីហ្សែនស្ទើរតែរាល់៤ម៉ោងម្ដងសម្រាប់ការសង្គ្រោះរយៈពេល២៤ម៉ោងដំបូង។
-->
ប៉ុន្តែអតីតស្ដេចប្រដាល់ និងជាគ្រូបង្ហាត់ប្រដាល់វ័យ៤៦ឆ្នាំដែលមានជំងឺបេះដូងប្រចាំកាយរូបនេះមានសភាពធូរស្បើយឡើងវិញ បន្ទាប់ពីទទួលការព្យាបាលបានប្រហែលមួយសប្តាហ៍។ អ្នកស្រី សុម៉ាលី និយាយអំពីស្ថានភាពជំងឺរបស់ស្វាមីថា “គាត់បានធូរស្រាលច្រើនហើយ។ ក្រុមគ្រូពេទ្យប្រាប់ខ្ញុំថា បើគ្មានវ៉ាក់សាំងទេ ស្ថានភាពរបស់គាត់អាចធ្ងន់ធ្ងរជាងនេះទៀត”។
ចាប់តាំងពីប្រទេសកម្ពុជា បានចាប់ផ្តើមយុទ្ធនាការចាក់វ៉ាក់សាំងកូវីដ-១៩ នៅខែកុម្ភៈ ដើមឆ្នាំ២០២១ មក ជាង៦០%នៃមនុស្សពេញវ័យប្រមាណ១០លាននាក់នៅក្នុងប្រទេសបានទទួលការចាក់វ៉ាក់សាំងយ៉ាងហោចណាស់១ដូស ហើយប្រហែល៤៤%ចាក់វ៉ាក់សាំងបានគ្រប់ចំនួន២ដូស។
ភាគច្រើននៃវ៉ាក់សាំងចំនួន១៧លានដូសនៅក្នុងប្រទេសកម្ពុជា គឺជាវ៉ាក់សាំងចិន ស៊ីណូវ៉ាក់ (Sinovac) និងស៊ីណូហ្វាម (Sinopharm) ដែលខ្លះទិញផ្ទាល់ និងខ្លះទៀតជាជំនួយបរិច្ចាគពីរដ្ឋាភិបាលក្រុងប៉េកាំង។ ទន្ទឹមនេះ កម្ពុជា ក៏ទទួលបានជំនួយវ៉ាក់សាំង Covax ពីអង្គការសុខភាពពិភពលោក (WHO) ផងដែរ។ ហើយកាលពីថ្ងៃសុក្រ សប្តាហ៍មុន ប្រទេសជប៉ុន ក៏បានបញ្ជូនវ៉ាក់សាំងអង់គ្លេស AstraZeneca ចំនួន៣៣២.០០០ដូសជាជំនួយសម្រាប់ប្រទេសកម្ពុជា ផងដែរ។
ទោះជាយ៉ាងណា ប្រទេសកម្ពុជា នៅតែបន្តជួបការលំបាកនៅក្នុងការប្រយុទ្ធប្រឆាំងវីរុសកូវីដ-១៩ ដោយការឆ្លងថ្មីប្រចាំថ្ងៃផ្ទុះឡើងជាច្រើនរយករណីគួរឱ្យព្រួយបារម្ភយ៉ាងខ្លាំង។ ដោយសារតែបែបនេះ រដ្ឋាភិបាលកម្ពុជា បានដាក់ចេញនូវវិធានការថ្មី គឺឱ្យកុមារអាយុចាប់ពី១២ឆ្នាំ ដល់១៧ ឆ្នាំទទួលការចាក់វ៉ាក់សាំង។ យុទ្ធនាការចាក់វ៉ាក់សាំងថ្មីនេះនឹងចាប់ផ្ដើមពីថ្ងៃទី០១ សីហា តទៅ។
កាលពីថ្ងៃច័ន្ទ ដើមសប្ដាហ៍នេះ ប្រទេសកម្ពុជា បានកត់ត្រាករណីឆ្លងថ្មីចំនួន៧៧៨ករណី ដោយក្នុងនោះចំនួន៤៧៥ករណីត្រូវបាននាំចូល ដែលភាគច្រើននាំចូលដោយពលករខ្មែរ ដែលត្រឡប់មកពីប្រទេសថៃ ក្បែរខាង។ ទោះជាយ៉ាងណា ប្រទេសកម្ពុជា នៅតែបន្តអនុញ្ញាតជើងហោះហើរអន្តរជាតិ។
សម្រាប់ពេលនេះ ករណីឆ្លងភាគច្រើនពាក់ព័ន្ធនឹងវីរុសកូវីដ-១៩ បំប្លែងថ្មី Alpha ដែលត្រូវបានកត់ត្រាដំបូងបង្អស់នៅក្នុងប្រទេសអង់គ្លេស កាលពីឆ្នាំមុន ហើយវីរុសបំប្លែងថ្មីនេះឆ្លងសាហាវណាស់។
ទោះជាយ៉ាងណា កាលពីថ្ងៃអង្គារ ដើមសប្ដាហ៍នេះ ក្រសួងសុខាភិបាលបានបញ្ជាក់ថា ករណីឆ្លងវីរុសបំប្លែងថ្មីរបស់ឥណ្ឌា Delta មានចំនួនមាន៣៩ ហើយប្រហែលពាក់កណ្ដាល់ក្នុងចំណោមនោះជាករណីនាំចូលដោយពលករខ្មែរ ដែលវិលត្រលប់ពីប្រទេសថៃ។ ចំណែកឯករណីផ្សេងទៀតគឺឆ្លងតាមរយៈការប៉ះពាល់ផ្ទាល់ដូចជាបុគ្គលិកសុខាភិបាលជាដើម ហើយនេះសរបង្ហាញឱ្យឃើញថា មានករណីឆ្លងចូលទៅសហគមន៍រួចទៅហើយ ហើយការឆ្លងនឹងកាន់តែសាហាវ។
វេជ្ជបណ្ឌិត Dr Michael C. Thigpen ដែលមកពីមជ្ឈមណ្ឌលត្រួតពិនិត្យនិងបង្កាជំងឺឆ្លង (CDC) របស់សហរដ្ឋអាមេរិក ប្រចាំកម្ពុជា បានលើកឡើងថា ការផ្ទុះការឆ្លងនេះបណ្តាលមកពីការបំពាននីតិវិធីធ្វើចត្តាឡីស័ក “ដោយអ្នកឆ្លងវីរុសរាប់រយនាក់បានធ្វើដំណើរបាចសាចពេញរាជធានី និងខេត្តជាច្រើន”។
ប្រទេសថៃ កាលពីថ្ងៃច័ន្ទ ដើមសប្ដាហ៍នេះបានរាយការណ៍អំពីចំនួនករណីឆ្លងវីរុសកូវីដ-១៩ ខ្ពស់បំផុតមិនធ្លាប់មានៅក្នុងរលកទី៣ ដែលបង្កឡើងដោយវីរុសបំប្លែងថ្មី Delta ខណៈករណីឆ្លងសរុបនៅក្នុងប្រទេសម៉ាឡេស៊ី បានឈានដល់១លានករណីកាលពីថ្ងៃអាទិត្យ ចុងសប្ដាហ៍មុន។ ប្រទេសហ្វីលីពីន បានហាមឃាត់ជើងហោះហើរពីប្រទេសម៉ាឡេស៊ី និងប្រទេសថៃ ជាវិធានការទប់ស្កាត់ការរីករាលដាលនៃវីរុសបំប្លែងថ្មីនេះ។
យោងតាមសេចក្ដីរាយការណ៍ឱ្យដឹងថា អ្នកចាក់វ៉ាក់សាំងរួចនៅជុំវិញពិភពលោកដែលបានឆ្លងការឆ្លងវីរុសបំប្លែងថ្មី Delta មិនធ្លាក់ខ្លួនឈឺធ្ងន់ធ្ងរដូចអ្នកដែលមិនបានចាក់វ៉ាក់សាំងឡើយ។
យោងតាមអង្គការសុខភាពពិភពលោក (WHO) ឱ្យដឹងថា គិតត្រឹមថ្ងៃទី១៩ កក្កដា ឆ្នាំ២០២១ ករណីឆ្លងវីរុសបំប្លែងថ្មី Delta សរុបចំនួន៧០ករណីត្រូវបានរកឃើញក្នុងចំណោមពលករខ្មែរ ដែលវិលត្រលប់ពីប្រទេសថៃ។ ទោះជាយ៉ាងណា អង្គការនេះបានបញ្ជាក់ថា គិតមកទល់ពេលនេះមិនទាន់រកឃើញករណីឆ្លងវីរុសបំប្លែងថ្មីនេះនៅក្នុងសហគមន៍នៅឡើយទេ៕
