ដោយៈតារា
ភ្នំពេញៈរាជរដ្ឋាភិបាលគ្រោងចំណាយទឹកប្រាក់ជាង១៤០០លានដុល្លារ សំរាប់អន្តគមន៍ប្រយុទ្ធនឹងជំងឺកូវីដ-១៩ ដែលជាកញ្វប់ថវិកាជាតិ ក្នុងបរិការណ៍នៃការបន្តអូសបន្លាយការរីករាលដាល នៃព្រឹត្តិការណ៍សហគមន៍២០ កុម្ភៈ ដែលធ្វើឱ្យប៉ះពាល់ធ្ងន់ធ្ងរដល់សេដ្ឋកិច្ច សុខភាព និងជីវភាពរស់នៅរបស់ប្រជាពលរដ្ឋ។
យោងតាមរបាយការណ៍ស្តីពី លទ្ធផលនៃការអនុវត្តថវិការឆមាសទី១ និងការវាយតម្លៃការអនុវត្តច្បាប់ស្តីពី ហិរញ្ញប្បទានសម្រាប់គ្រប់គ្រងឆ្នាំ ២០២១ នៃក្រសួងសេដ្ឋកិច្ច និងហិរញ្ញវត្ថុ ក្នុងនោះចំពោះស្ថានភាពចំណាយអន្តរាគមន៍ ប្រយុទ្ធនឹងជំងឺកូវីដ-១៩ របស់រាជរដ្ឋាភិបាល ក្នុងបរិការណ៍នៃការបន្តអូសបន្លាយការរីករាលដាល នៃព្រឹត្តិការណ៍សហគមន៍ ២០ កុម្ភៈ ដែលធ្វើឱ្យប៉ះពាល់ធ្ងន់ធ្ងរដល់ដល់សេដ្ឋកិច្ច សុខភាព និងជីវភាពរស់នៅរបស់ប្រជាពលរដ្ឋ។
រាជរដ្ឋាភិបាលបានធ្វើការវាយតម្លៃឡើងវិញ អំពីផលប៉ះពាល់នៃការរីករាលដាលនៃជំងឺកូវីដ-១៩ មកលើក្របខ័ណ្ឌថវិកាជាតិពេញមួយឆ្នាំ២០២១ និងបានសម្រេចធ្វើវិចារណកម្ម ចំណាយទាំងផ្នែកចំណាយចរន្ត និងផ្នែកចំណាយវិនិយោគនៃថវិកាថ្នាក់ជាតិ ដោយកាត់ព្យួរឥណទាន ថវិកាសរុបប្រមាណ៩៨លានដុល្លារ ដើម្បីបង្វែរថវិកាមកជួយសម្រាលសំពាធចំណាយនេះ។
របាយការណ៍ដដែលបានបន្តថា ពាក់ព័ន្ធចំណាយអន្តគមន៍នេះ រាជរដ្ឋាភិបាលបានគ្រោងទុកពីដើមឆ្នាំ២០២១ ចំណាយប្រមាណ៧១៩លានដុល្លារអាមេរិក តែដោយសារព្រឹត្តិការណ៍សហគមន៍២០ កុម្ភៈ បានជះឥទ្ធិពលអវិជ្ជមានយ៉ាងខ្លាំងមកលើសេដ្ឋកិច្ចជាតិ និងថវិកាជាតិ ទាំងផ្នែកចំណូល និងផ្នែកចំណាយ គឺធ្វើឲ្យការចំណាយមានតម្រូវការកើនឡើងជាគំហុក ពិសេសចំណាយអន្តគមន៍ប្រយុទ្ធនឹងជំងឺកូវីដ-១៩ ត្រូវបានប៉ាន់ស្មានថា នឹងអាចឡើងដល់ប្រមាណ១ ៤៥៤ លានដុល្លារអាមេរិកពីថវិកាជាតិ។
ជុំវិញគម្រោងចំណាយអន្តរាគមន៍នេះ បានផ្តោតលើផ្នែកសំខាន់ៗ រួមមានកម្មវិធីទប់ស្កាត់និងព្យាបាលជំងឺកូវីដ-១៩ បានគ្រោងបឋមប្រមាណ៣០លានដុល្លារ ដែលបញ្ហានេះ នឹងធ្វើឱ្យចំណាយនេះកើនរហូតដល់៧៤០លានដុល្លារអាមេរិក។ កម្មវិធីឧបត្ថម្ភស្បៀងក្នុងពេលបិទខ្ទប់ រហូតដល់ដំណាច់ឆ្នាំ២០២១ ដោយគ្រងចំណាយប្រមាណ១០ លានដុល្លារ។
កម្មវិធីបណ្តុះបណ្តាលជំនាញ និងឧបត្ថម្ភកម្មករពេលព្យួរកិច្ចសន្យាការងារ និងក្រោយការបិទខ្ទប់ រហូតដល់ដំណាច់ឆ្នាំត្រូវបានប៉ាន់ស្មាន នឹងចំណាយប្រមាណ៥៩ លានដុល្លារ។ ដោយឡែកកម្មវិធីអន្តរាគមន៍ ដើម្បីរក្សាលំនឹងជីវភាពប្រជាជនក្រីក្រ និងក្រោយបិទខ្ទប់ ត្រូវគ្រោងបឋមត្រឹម២០០លានដុល្លារ ហើយរហូតដល់ដំណាច់ឆ្នាំ ត្រូវបានប៉ាន់ស្មានចំណាយ១៣៥ លានដុល្លារថែមទៀត ដែលចំណាយនឹងកើនរហូតដល់ ៣៣៥លានដុល្លារ។
ចំណែកកម្មវិធីសាច់ប្រាក់ពលកម្ម ត្រូវបានផ្ទេរថវិកាចំនួន១៦០លានដុល្លារ តាមការគ្រោងទុក ដើម្បីអនុវត្តសកម្មភាពការងារហេដ្ឋារចនាសម្ព័ន្ធរូបវ័ន្ត ដោយដៃនៅតាមមូលដ្ឋាន ក្នុងនោះចំពោះកម្មវិធីហិរញ្ញប្បទានអន្តរាគមន៍ ផ្នែកសេដ្ឋកិច្ចដល់សហគ្រាស ធុនតូច និងមធ្យម ត្រូវបានគ្រោងចំនួន២៧០លានដុល្លារ ប៉ុន្តែរហូតដល់ចុងឆ្នាំ ២០២១ ឬដើមឆ្នាំ ២០២២ អាចនឹងចំណាយត្រឹមប្រមាណ១៥០លានដុល្លារ សម្រាប់ការចាប់ផ្តើមដំបូង នៃការអនុវត្តស្តារសេដ្ឋកិច្ចក្រោយវិបត្តិកូវីដ-១៩ (២០២១-២០២៣)។
អនុប្រធានសភាពាណិជ្ជកម្មកម្ពុជា លោកឧកញ៉ា លឹម ហេងបានមានប្រសាសន៍ថា ការរៀបចំផែនការចំណាយដ៏ម៉ត់ចត់នេះ គឺជាការគិតគូរដ៏ខ្ពង់ខ្ពស់របស់រាជរដ្ឋាភិបាល ដើម្បីគ្រប់គ្រងនិងបញ្ចៀសហានិភ័យ ជាពិសេសការរក្សាលំនឹងសេដ្ឋកិច្ច សកម្មភាពអាជីវកម្ម និងការបន្តរក្សាលំនឹងជវីភាពប្រជាជន និងការជម្រុញកំណើនសេដ្ឋកិច្ចឡើងវិញជាដើម។
ឆ្លើយតបនឹងតម្រូវការចំណាយចំពោះមុខនេះ បន្ថែមលើឥណទានវិចារណកម្មដែលសន្សំបានខាងលើ រាជរដ្ឋាភិបាល ត្រូវប្រើប្រាស់ប្រាក់សន្សំរបស់រាជរដ្ឋាភិបាលបន្ថែមចំនួន៦៣៧លានដុល្លារ ដើម្បីទប់ទល់នឹងចំណាយនេះ។ លើសពីនេះ ចំណាយអន្តរាគមន៍ប្រយុទ្ធនឹងជំងឺកូវីដ-១៩ ក៏នៅមានប្រើប្រាស់ប្រភពថវិកាផ្សេងទៀតមាន មូលនិធិទ្រទ្រង់ថវិកាចំនួន៨០លានដុល្លារអាមេរិក និងហិរញ្ញប្បទានក្រៅប្រទេសចំនួន១៣០លានដុល្លារអាមេរិក និងថវិកាសប្បុរសជនប្រមាណជិត១០០លានដុល្លារអាមេរិកផងដែរ៕
